1 Korintobii 13 - ŊMALƐ KRƆŊKRƆŊ LƐ

Suɔmɔ fe dromɔ keenii fɛɛ

¹ Kɛji mikɛ gbɔmɛi kɛ ŋwɛi bɔfoi alilɛi wieɔ, shi mibɛ suɔmɔ lɛ, no lɛ mitsɔ̃ ayawa ni jijeɔ loo ŋmɛlɛ ni gbɛɔ.

² Ni kɛji miyɛ gbalɛ dromɔ keenii, ni minaa teemɔŋnii fɛɛ naa, ni mile nii fɛɛ, ni kɛji miyɛ hemɔkɛyeli fɛɛ hu, bɔ ni manyɛ gɔji mafãmɔ, shi mibɛ suɔmɔ lɛ, no lɛ mijeee nɔ ko.

³ Ni kɛji mikɛ minii fɛɛ kuma mɛi, ni kɛji mikɛ migbɔmɔtso hã ni ashã mi, shi mibɛ suɔmɔ lɛ, no lɛ minaaa sɛɛ ko.

⁴ Suɔmɔ toɔ etsui shi; emli hi; suɔmɔ hiɛ ekɔ̃ɔɔ mɔ nɔ; suɔmɔ eshwãaa; efeee pupuupu;

⁵ efeee nii ni esaaa; epeleee lɛ diɛŋtsɛ enɔ, emli wooo la; eniŋŋ efɔŋ he;

⁶ enyãaa nɔ sha he; shi anɔkwale moŋ he enyãa;

⁷ emiɔ ŋɔɔ yɛ nii fɛɛ mli; eheɔ nii fɛɛ eyeɔ; ehiɛ kãa nii fɛɛ nɔ; emĩaa ehiɛ yɛ nii fɛɛ mli.

⁸ Suɔmɔ sɛɛ efooo gbi ko gbi ko. Shi kɛji gbalɛi ni lɛ, amɛsɛɛ baafo; kɛji wiemɔi ni lɛ, abaafɔ̃ɔ; kɛji nilee ni lɛ, esɛɛ baafo.

⁹ Ejaakɛ wɔnii ni wɔle lɛ, fã kɛ fã ni, ni wɔgbalɛ hu fã kɛ fã ni.

¹⁰ Shi kɛ nɔ ni eye emuu lɛ ba lɛ, no lɛ nɔ ni ji fã kɛ fã lɛ sɛɛ aaafo.

¹¹ Be ni mi ji abifao lɛ, miwieɔ tamɔ abifao, mijwɛŋɔ tamɔ abifao, misusuɔ tamɔ abifao; shi be ni mitsɔ̃ nuu nukpa lɛ, mishɛrɛ abifabiianii lɛ mishwie.

¹² Ejaakɛ amrɔ nɛɛ ashwishwɛ mli wɔtsɔ̃ɔ wɔnaa nii tuutuu, shi no mli lɛ eeefee hiɛ kɛ hiɛ; amrɔ nɛɛ mile nii fã kɛ fã, shi no mli lɛ, male nii kɛyi shi tamɔ bɔ ni ale mi kɛyi shi lɛ.

¹³ Shi agbɛnɛ hemɔkɛyeli, hiɛnɔkãmɔ, suɔmɔ, nɛkɛ nibii etɛ̃ nɛɛ, hiɔ shi; shi suɔmɔ ji amɛteŋ nɔ ni fe fɛɛ.