1 Korintobii 12 - ŊMALƐ KRƆŊKRƆŊ LƐ

Mumɔŋ dromɔ keenii

¹ Agbɛnɛ, anyɛmimɛi, miisumɔ akɛ mahã nyɛle mumɔŋnii ahe nɔ ko.

² Nyɛle akɛ be ni nyɛ ji jeŋmajiaŋbii lɛ, amãgãi mumuii lɛ aŋɔɔ akpala nyɛ kɛtee, bɔ fɛɛ bɔ ni akpala nyɛ ahã lɛ.

³ No hewɔ lɛ, miihã nyɛle akɛ mɔ ko ewieee yɛ Nyɔŋmɔ Mumɔ naa ni ekɛɛ akɛ, “Yesu ji musumɔ”; ni mɔ ko nyɛŋ ekɛɛ akɛ, “Yesu ji Nuŋtsɔ” hu, akɛ ja yɛ Mumɔ Krɔŋkrɔŋ naa.

⁴ Dromɔ keenii srɔtoi yɛ, shi Mumɔ kome lɛ nɔŋŋ hãa;

⁵ ni sɔ̃ɔmɔ nitsumɔi srɔtoi hu yɛ, shi Nuŋtsɔ kome lɛ nɔŋŋ akɛsɔ̃mɔɔ;

⁶ ni nitsumɔi srɔtoi hu yɛ, shi Nyɔŋmɔ kome lɛ nɔŋŋ ji mɔ ni tsuɔ fɛɛ yɛ mɛi fɛɛ amli.

⁷ Shi mɔ fɛɛ mɔ lɛ ahãa Mumɔ lɛ jieɔ ehe kpo yɛ emli koni ahi ahã mɛi fɛɛ.

⁸ Mɔ ko lɛ, atsɔ̃ Mumɔ lɛ nɔ ahã lɛ nilee wiemɔ; ni mɔ ko hu ahã lɛ niiashishinamɔ wiemɔ yɛ nakai Mumɔ lɛ nɔŋŋ naa.

⁹ Mɔ ko lɛ, ahã lɛ hemɔkɛyeli yɛ nakai Mumɔ lɛ nɔŋŋ naa; ni mɔ kroko hu ahã lɛ tsamɔ dromɔ keenii yɛ nakai Mumɔ lɛ nɔŋŋ mli.

¹⁰ Mɔ ko lɛ hewalɛnii atsumɔ; mɔ ko lɛ gbalɛ; mɔ ko hu mumɔi ashikpamɔ ni akɛnaa mumɔi amligbalamɔi; mɔ ko lɛ wiemɔi srɔtoi awiemɔ; ni mɔ ko hu wiemɔi ashishitsɔ̃ɔmɔ.

¹¹ Shi nɛkɛ nibii nɛɛ fɛɛ lɛ Mumɔ kome lɛ nɔŋŋ tsuɔ, ni ejaa ehãa bɔ ni esumɔɔ, mɔ fɛɛ mɔ kɛ enɔ.

Wɔ fɛɛ lɛ Gbɔmɔtso Kome henii ji wɔ

¹² Shi tamɔ bɔ ni gbɔmɔtso lɛ ekome ni, shi ehiɛ henii pii, ni gbɔmɔtso lɛ henii pii lɛ fɛɛ gbɔmɔtso kome ni lɛ, nakai nɔŋŋ hu ji Kristo.

¹³ Ejaakɛ Yudafoi ji wɔ jio, Helabii ji wɔ jio, nyɔji ji wɔ jio, wɔhiɛ wɔhe jio, wɔ fɛɛ lɛ Mumɔ kome nɔ atsɔ abaptisi wɔ awo gbɔmɔtso kome mli; ni wɔ fɛɛ lɛ, Mumɔ kome akɛhã wɔ ni wɔnu.

¹⁴ Ejaakɛ gbɔmɔtso lɛ hu jeee he nɔ kome ni, shi moŋ henii pii ni.

¹⁵ Kɛji nane aaakɛɛ akɛ, “Akɛni jeee nine ji mi hewɔ lɛ, jeee gbɔmɔtso lɛ he nii lɛ eko ji mi” lɛ, ani enɛ hewɔ lɛ jeee gbɔmɔtso lɛ henii lɛ eko ji lɛ?

¹⁶ Ni kɛji toi hu aaakɛɛ akɛ, “Akɛni jeee hiŋmɛi ji mi hewɔ lɛ, jeee gbɔmɔtso lɛ henii lɛ eko ji mi” lɛ, ani enɛ hewɔ lɛ jeee gbɔmɔtso lɛ henii lɛ eko ji lɛ?

¹⁷ Kɛ gbɔmɔtso muu lɛ fɛɛ lɛ hiŋmɛi ni lɛ, nɛgbɛ ninumɔ yɔɔ? Kɛ ninumɔ sɔŋŋ ni lɛ, nɛgbɛ nifuu yɔɔ?

¹⁸ Shi agbɛnɛ Nyɔŋmɔ kɛ henii lɛ eko fɛɛ eko ema gbɔmɔtso lɛ he, bɔ ni esumɔɔ.

¹⁹ Shi kɛ amɛ fɛɛ lɛ henɔ kome ni lɛ, nɛgbɛ gbɔmɔtso lɛ yɔɔ?

²⁰ Shi agbɛnɛ lɛ henii pii ni moŋ, shi gbɔmɔtso kome ni.

²¹ Hiŋmɛi nyɛŋ ekɛɛ nine akɛ, “Ohe ehĩaaa mi;” ni asaŋ yitso nyɛŋ ekɛɛ naji akɛ, “Nyɛhe ehĩaaa mi.”

²² Shi gbɔmɔtso lɛ henii ni efeɔ wɔ akɛ amɛhe waaa kwraa lɛ, amɛ moŋ amɛhe hiaa wɔ titri;

²³ ni nii ni efeɔ wɔ akɛ amɛ ji gbɔmɔtso henii ni hiɛ bɛ nyam kwraa lɛ, nomɛi titri ahiɛ nyam wɔwoɔ, ni wɔhenii ni bɛ fɛo lɛ moŋ naa hefɛo titri ko;

²⁴ shi wɔhenii ni yɔɔ fɛo momo lɛ, enɛ he ehĩaaa amɛ. Shi Nyɔŋmɔ tsara gbɔmɔtso lɛ henii lɛ, ni nɔ ni shwɛɔ lɛ nɔ ko lɛ, no titri ekɛ woo hãa

²⁵ koni mligbalamɔ akaba gbɔmɔtso lɛ mli, shi moŋ henii lɛ abaabaa amɛhe yi pɛpɛɛpɛ.

²⁶ Ni kɛji henɔ kome miina nɔ lɛ, henii lɛ fɛɛ kɛ lɛ naa nɔ, ni kɛji henɔ kome hiɛ ba nyam hu, henii lɛ fɛɛ kɛ lɛ naa miishɛɛ.

²⁷ Shi nyɛ lɛ, Kristo gbɔmɔtso ji nyɛ; ni nyɛteŋ mɔ fɛɛ mɔ lɛ ehenii lɛ eko ji lɛ.

²⁸ Ni klɛŋklɛŋ lɛ, Nyɔŋmɔ wo mɛi komɛi bɔfoi yɛ asafo lɛ mli, nɔ ni ji enyɔ lɛ, gbalɔi, nɔ ni ji etɛ̃ lɛ, tsɔɔlɔi, no sɛɛ lɛ, hewalɛ nitsulɔi, no sɛɛ lɛ, mɛi ni yɔɔ helaiatsamɔ he dromɔ keenii, yelikɛbualɔi, hiɛnyiɛlɔi, mɛi ni wieɔ wiemɔi srɔtoi.

²⁹ Ani mɛi fɛɛ ji bɔfoi? Ani mɛi fɛɛ ji gbalɔi?

³⁰ Ani mɛi fɛɛ yɔɔ helaiatsamɔ dromɔ keenii? Ani mɛi fɛɛ wieɔ wiemɔi srɔtoi? Ani mɛi fɛɛ tsɔ̃ɔ wiemɔi ashishi?

³¹ Shi nyɛhiɛ adɔa dromɔ keenii ni fe fɛɛ lɛ ahe. Ni masaa matsɔ̃ɔ nyɛ gbɛ ni hi fe fɛɛ.