1 Korintobii 10 - ŊMALƐ KRƆŊKRƆŊ LƐ

Wɔji ahe kɔkɔbɔɔ

¹ Shi, anyɛmimɛi, misumɔ̃ɔɔ akɛ nyɛhiɛ aje nɔ akɛ wɔtsɛmɛi lɛ fɛɛ hi atatu lɛ shishi, ni amɛ fɛɛ amɛfo Ŋshɔ Tsuru lɛ,

² ni abaptisi amɛ fɛɛ awo Mose mli yɛ atatu lɛ kɛ Ŋshɔ Tsuru lɛ mli.

³ Ni amɛ fɛɛ lɛ mumɔŋ niyenii kome lɛ nɔŋŋ amɛye,

⁴ ni amɛ fɛɛ amɛnu mumɔŋ nu kome lɛ nɔŋŋ; ejaakɛ amɛnu mumɔŋ tɛsaa ni kɛ amɛ nyiɛ lɛ mli nu, ni tɛsaa lɛ ji Kristo.

⁵ Shi kɛ̃lɛ Nyɔŋmɔ naaa amɛteŋ mɛi pii ahe tsui, ejaakɛ aplene amɛ yɛ ŋa lɛ nɔ.

⁶ Shi akɛ enɛɛmɛi eto wɔ okadi, koni wɔkahã nibii fɔ̃ji miifee wɔ akɔnɔ, tamɔ bɔ ni efee amɛ lɛ.

⁷ Asaŋ nyɛkatsɔmɔa amãgãjalɔi tamɔ amɛteŋ mɛi komɛi fee lɛ, tamɔ bɔ ni aŋma akɛ, “Maŋ lɛ ho tara shi ni amɛye nii ni amɛnu nii, ni amɛte shi ni amɛshwɛ.”

⁸ Ni wɔsaa wɔkabɔ ajwamãŋ tamɔ bɔ ni amɛteŋ mɛi komɛi bɔ ajwamãŋ ni gbi kome nɔ lɛ mɛi akpei nyɔŋmai enyɔ kɛ etɛ̃ nyɔnyɔɔ lɛ.

⁹ Ni asaŋ wɔkaka Nuŋtsɔ lɛ tamɔ bɔ ni amɛteŋ mɛi komɛi ka lɛ ni onufui bakpãtã amɛhiɛ lɛ.

¹⁰ Ni nyɛsaa nyɛkawiea huhuuhu tamɔ bɔ ni amɛteŋ mɛi komɛi hu wie huhuuhu ni hiɛkpãtãlɔ lɛ bakpãtã amɛhiɛ lɛ.

¹¹ Shi enɛɛmɛi fɛɛ ba amɛnɔ ni akɛto okadi ahã wɔ, ni aŋma ni akɛbɔ wɔ kɔkɔ, wɔ mɛi ni je lɛ naagbee bei lɛ enina wɔ lɛ.

¹² No hewɔ lɛ, mɔ ni susuɔ akɛ edamɔ shi lɛ akwɛ ehe ni ahi koni ekagbee shi.

¹³ Kaa ko bako nyɛnɔ ni jeee gbɔmɔ he nɔ; shi anɔkwafo ji Nyɔŋmɔ, ni ehãŋ aka nyɛ fe bɔ ni nyɛaanyɛ; moŋ, yɛ kaa lɛ mli lɛ, ebaaje gbɛ ni nyɛkɛaaje mli koni nyɛnyɛ mli nyɛmɔ.

¹⁴ No hewɔ lɛ, misuɔmɔ mɛi, nyɛjoa wɔŋjamɔ naa foi!

¹⁵ Mikɛ nyɛ miiwie tamɔ akɛ nilelɔi wieɔ; nɔ ni mikɛɔ lɛ nyɛ diɛŋtsɛ nyɛhalaa mli.

¹⁶ Jɔɔmɔ kpulu lɛ ni wɔjɔɔ lɛ, ani jeee Kristo lá lɛ naanyobɔɔ lɛ ni? Aboloo ni wɔkumɔɔ lɛ, ani jeee Kristo gbɔmɔtso lɛ naanyobɔɔ lɛ ni?

¹⁷ Ejaakɛ aboloo kome ni, ni wɔyi pii moŋ, shi gbɔmɔtso kome ji wɔ, ejaakɛ wɔ fɛɛ wɔyeɔ aboloo kome lɛ eko.

¹⁸ Nyɛkwɛa Israel! Ani mɛi ni yeɔ afɔleshãanii lɛ, jeee naanyo amɛkɛ afɔleshãa latɛ lɛ bɔɔ lɛ?

¹⁹ Belɛ mɛni mikɛɛ mɔ? Akɛ amãgã afɔle ji nɔ ko, aloo akɛ amãgã ji nɔ ko?

²⁰ Dabi, shi moŋ miikɛɛ akɛ afɔle ni wɔŋjalɔi lɛ shãa lɛ, mumɔi fɔ̃ji amɛshãa amɛhãa, shi jeee Nyɔŋmɔ; ni misumɔ̃ɔɔ akɛ nyɛkɛ mumɔi fɔ̃ji bɔɔ naanyo.

²¹ Nyɛnyɛŋ Nuŋtsɔ lɛ kpulu lɛ kɛ mumɔi fɔ̃ji akpulu fɛɛ nyɛnu shi kome; nyɛnyɛŋ Nuŋtsɔ lɛ okplɔ̃ lɛ nɔ nii kɛ mumɔi fɔ̃ji anɔ lɛ nɔ nii fɛɛ nyɛye shi kome.

²² Aloo wɔmiifee ni Nuŋtsɔ lɛ aye awuŋã? Ani wɔhe wa fe lɛ?

Wɔŋ loo he ŋaawoo

²³ Wɔyɛ nibii fɛɛ hegbɛ, shi jeee nibii fɛɛ hi; wɔyɛ nibii fɛɛ hegbɛ, shi jeee nibii fɛɛ hãa mɔ nane mɔɔ shi.

²⁴ Mɔ ko mɔ ko akapele miihã lɛ diɛŋtsɛ ehe, shi moŋ mɔ fɛɛ mɔ apele ahã enaanyo.

²⁵ Nɔ fɛɛ nɔ ni ahɔ̃ɔ yɛ loo jara nɔ lɛ nyɛyea; shi henilee hewɔ lɛ, nyɛkabia mli;

²⁶ ejaakɛ “shikpɔŋ lɛ kɛ emlinii lɛ fɛɛ lɛ, Nuŋtsɔ lɛ nɔ ni.”

²⁷ Shi kɛ mɛi ni heee yeee lɛ ateŋ mɔ ko kpee nyɛ okplɔ̃ he ni nyɛmiisumɔ akɛ nyɛaatee lɛ, nɔ fɛɛ nɔ ni akɛaama nyɛhiɛ lɛ, nyɛyea ni nyɛkabia mli, yɛ henilee hewɔ.

²⁸ Shi kɛji mɔ ko kɛɛ nyɛ akɛ, “Enɛ lɛ akɛshã afɔle ahã amãgã” lɛ, nyɛkayea yɛ mɔ ni tswa adafi lɛ kɛ henilee hewɔ.

²⁹ Shi henilee ni mitsɔ̃ɔ nɛɛ, jeee bo diɛŋtsɛ onɔ lɛ, shi moŋ mɔ kroko lɛ nɔ lɛ; ejaakɛ mɛɛ hewɔ sa akɛ mɔ kroko henilee akojo mihe ni mihiɛ lɛ?

³⁰ Kɛ shidaa mikɛye lɛ, mɛɛba awieɔ mihe efɔŋ yɛ nii ni mida shi yɛ he lɛ hewɔ?

³¹ No hewɔ lɛ, nii nyɛyeɔ jio, nii nyɛnuɔ jio, aloo nɔ kroko nyɛfeɔ jio, nyɛfea fɛɛ nyɛkɛwoa Nyɔŋmɔ hiɛ nyam.

³² Nyɛkatsɔmɔa pampii nyɛhãa Yudafoi kɛ Helabii kɛ Nyɔŋmɔ asafo lɛ fɛɛ;

³³ tamɔ bɔ nɔŋŋ ni mi hu misumɔɔ akɛ nibii fɛɛ mli lɛ masa mɛi fɛɛ hiɛ, ni mitaooo nɔ ni hi hã mi diɛŋtsɛ, shi moŋ nɔ ni hi hã mɛi pii koni ahere amɛyiwala lɛ.