1 Korintobii 1 - ŊMALƐ KRƆŊKRƆŊ LƐ

Ŋamɔ kɛ shidaa

¹ Paulo, Yesu Kristo bɔfo ni atsɛ yɛ Nyɔŋmɔ suɔmɔ naa lɛ, kɛ wɔnyɛmi Sostene,

² ŋma wolo nɛɛ yahã Nyɔŋmɔ asafo ni yɔɔ Korinto lɛ, ni ji mɛi ni atsuu amɛhe yɛ Kristo Yesu mli lɛ. Mɛi krɔŋkrɔŋi ni atsɛ amɛ kɛ mɛi fɛɛ ni yɔɔ he fɛɛ he ni tsɛɔ wɔNuŋtsɔ Yesu Kristo ni ji wɔ kɛ amɛ fɛɛ Nuŋtsɔ lɛ gbɛi lɛ.

³ Dromɔ kɛ hejɔlɛ ni jɛ wɔTsɛ Nyɔŋmɔ lɛ kɛ Nuŋtsɔ Yesu Kristo dɛŋ lɛ ahã nyɛ.

⁴ Miida miNyɔŋmɔ lɛ shi daa nɛɛ yɛ nyɛhewɔ, yɛ Nyɔŋmɔ dromɔ ni akɛhã nyɛ yɛ Kristo Yesu mli lɛ hewɔ.

⁵ Akɛ nibii fɛɛ mli lɛ ahã nyɛshwere yɛ emli, yɛ wiemɔ fɛɛ wiemɔ kɛ nilee fɛɛ nilee gbɛfaŋ.

⁶ Tamɔ bɔ ni ama Kristo he odase lɛ nɔ mi yɛ nyɛmli,

⁷ ni dromɔ nikeenii ko eshwɛɛɛ nyɛ mɛi ni nyɛkwɛɔ wɔNuŋtsɔ Yesu Kristo kpojiemɔ lɛ gbɛ lɛ.

⁸ Lɛ nɔŋŋ eeewaje nyɛ kɛaatee naagbee ni nyɛhe akaba kpa ko yɛ wɔNuŋtsɔ Yesu Kristo gbi lɛ nɔ.

⁹ Anɔkwafo ji Nyɔŋmɔ, mɔ ni tsɛ nyɛ kɛba eBi Yesu Kristo, wɔNuŋtsɔ lɛ, naanyobɔɔ lɛ mli lɛ.

Mligbalamɔi yɛ asafo lɛ mli

¹⁰ Shi, anyɛmimɛi, miikpa nyɛ fai yɛ wɔNuŋtsɔ Yesu Kristo gbɛi mli, akɛ nyɛnaabu afee ekome ni mligbalamɔi akaba nyɛteŋ, shi moŋ nyɛ fɛɛ nyɛhiɛa jwɛŋmɔ kome kɛ susumɔ kome.

¹¹ Ejaakɛ Kloe webii lɛ batswa mi adafi yɛ nyɛhe, minyɛmimɛi, akɛ bei yɛ nyɛteŋ.

¹² Nɔ ni mitsɔ̃ɔ nɛɛ ji akɛ nyɛteŋ mɔ fɛɛ mɔ kɛɔ akɛ, “Mi lɛ, Paulo nɔ ji mi;” “Mi lɛ, Apolo nɔ ji mi;” “Mi lɛ, Kefa nɔ ji mi;” “mi lɛ, Kristo nɔ ji mi.”

¹³ Ani agbala Kristo mli? Ani Paulo asɛŋ ahã nyɛ lɛ? Aloo Paulo gbɛi mli abaptisi nyɛ awo lɛ?

¹⁴ Miida Nyɔŋmɔ shi akɛ mibaptisiii nyɛteŋ mɔ ko akɛ ja Krispo kɛ Gaio,

¹⁵ koni mɔ ko akakɛɛ akɛ mibaptisi lɛ yɛ mi diɛŋtsɛ migbɛi mli.

¹⁶ Lɛɛlɛŋ, mibaptisi Stefana we lɛ, shi mikaiii akɛ mibaptisi mɔ ko mifata he dɔŋŋ.

¹⁷ Ejaakɛ Kristo tsuuu mi baptisimɔ, shi moŋ Sanekpakpa lɛ shiɛmɔ, ni jeee yɛ nilee wiemɔi amli tete, koni Kristo sɛŋmɔtso lɛ akafee yaka.

Kristo ji Nyɔŋmɔ hewalɛ kɛ enilee

¹⁸ Ejaakɛ sɛŋmɔtso lɛ he sane lɛ ji kwashiai asane hã mɛi ni hiɛ kpãtãa lɛ; shi wɔ mɛi ni ahereɔ wɔyiwala lɛ, eji Nyɔŋmɔ hewalɛ hã wɔ.

¹⁹ Ejaakɛ aŋma akɛ, “Mafite nilelɔi anilee, Ni ŋaalɔi aŋaa lɛ hu mahã afee yaka.”

²⁰ Nɛgbɛ nilelɔ yɔɔ? Nɛgbɛ mlatsɔɔlɔ yɔɔ? Nɛgbɛ je nɛɛŋ naataalɔ yɔɔ? Ani Nyɔŋmɔ hãko je lɛ mli nilee lɛ atsɔ̃ kwashiai asane?

²¹ Shi akɛni yɛ Nyɔŋmɔ nilee naa lɛ je lɛ nyɛɛɛ etsɔ̃ lɛ diɛŋtsɛ enilee nɔ kɛle Nyɔŋmɔ lɛ, esa Nyɔŋmɔ hiɛ akɛ ekɛ kwashiai asane lɛ ni ashiɛɔ lɛ ahere mɛi ni heɔ yeɔ lɛ ayiwala.

²² Ejaakɛ Yudafoi lɛ, naakpɛɛ okadii ashi amɛbiɔ, ni Helabii hu taoɔ nilee;

²³ shi wɔ lɛ, Kristo ni asɛŋ lɛ lɛ wɔshiɛɔ, mɔ ni tsɔ̃ pampi ehã Yudafoi, kɛ kwashiai asane ehã jɛŋmaji lɛ.

²⁴ Shi mɛi ni atsɛ amɛ lɛ, Yudafoi jio, Helabii jio, Kristo ji Nyɔŋmɔ hewalɛ kɛ Nyɔŋmɔ nilee hã amɛ.

²⁵ Ejaakɛ Nyɔŋmɔ kwashiai asane lɛ, nilee yɛ mli fe gbɔmɛi anilee, ni Nyɔŋmɔ gbɔjɔmɔ lɛ he wa fe gbɔmɛi ahewalɛ.

²⁶ Shi anyɛmimɛi, nyɛkwɛa nyɛtsɛmɔ lɛ, jeee heloo gbɛfaŋ nilelɔi pii, jeee hewalɔi pii, jeee abladei pii atsɛ;

²⁷ shi moŋ je nɛɛ mli kwashiaianii lɛ Nyɔŋmɔ hala, koni ekɛwo nilelɔi lɛ ahiɛgble; ni je nɛɛ mli gbɔjɔmɔnii lɛ hu Nyɔŋmɔ hala, koni ekɛwo nii ni he wa lɛ ahiɛgble;

²⁸ ni je nɛɛ mli nii ni abuuu kɛ nii ni agbe he guɔ lɛ Nyɔŋmɔ hala, kɛ nibii ni bɛ lɛ tete, koni ehã nibii ni yɔɔ lɛ afee yaka;

²⁹ bɔ ni afee ni gbɔmɔ ko gbɔmɔ ko akashwã yɛ ehiɛ.

³⁰ Shi lɛ ejɛ ni nyɛyɔɔ Kristo Yesu, mɔ ni tsɔ̃ nilee ni jɛ Nyɔŋmɔ ŋɔɔ kɛ jalɛ kɛ hetsuumɔ kɛ kpɔ̃mɔ ehã wɔ lɛ mli;

³¹ koni, tamɔ bɔ ni aŋma lɛ, “Mɔ ni shwãa lɛ, eshwã efɔ Nuŋtsɔ lɛ nɔ.”