Zipania 1 - Ngudradreadrekadhane Ka Sisiu 魯凱語聖經

¹ Kai lebe amani saka talialalai ki swa Yuda ku Yusia ka lalake ki Amune, ku Tamatama peaelaela ki Zipania ku matiakiragai ka vaga. Kai Zipania yai lalake ki Kusi, agane ki Gidalria, kacui ki Amaria, pungapungai ki Hezekia ka talialalai.

Asaibangane ki Tamatama ka vai

² Ku Tamatama amia kai, “Lri pakitulreepengaku amudu kai yabelenge ki daedae sanaka maneemanenga;

³ lri amudaku ki umawmase, si sanaka walrawlrawlrakwane ka lawaudriwdripi, si langiapalapalai, ki lakange, lri patubakebakaku ki manganga ka umawmase; lri patwaladhaku belenge ki kadaengane pakamudu ki umawmase. Tamatamaku; ka amia kikai pelaela.

⁴ “Lri pathavungaku ki laumawmase ki swa Yerusalrime si swa Yuda. Lri kabebetethaku pakamudu kwini ki yakai kwini ku wasukusukubwana ki Baale; kadrwa ku umawmase kulri ngulringau kwini ki labarakalai ki Baale.

⁵ Lri pakamudaku kwini ki lawamwa cavalri si sukusukubu ki vai, ki dramare, si latariau. Lai lri amudaku kudra ki la wasukusukubu nakwane, si kiketekete ku asavaevane ku kidremedreme papia nakwane, ai la pangukaikaai ku nagane ki Malukame ka twaumase kiketekete.

⁶ Lri amudaku kudra la ngiabangulu siwlri si kai tupapalranga nakwane si kudra la kai pasalaladha nakwane, kai kiatubi nakwane ku akililukane.”

⁷ Isaselebana ikai cucubungu ki abebeelengenga ka Tamatama, asi lwiyane padalrudalrunga si kela ku asaibangane ki Tamatama, ku Tamatama padulrunga ku acilriane ki kawkawluini, la paravase ki badha ki swa Yuda.

⁸ Ku Tamatama amia kai, “Ikai kwidra ki tapatarumaramarane ka vai, lri pathavungaku ki tabebelenge ka swa kunkwane, ki lalake ki talialalai, si kudra twalralralrau ku kakwakudhane ki maelane ka zuku.

⁹ Ikai kwidra ki vai, lri pathavungaku kudra la arakai ku ngikarakacanane ribici, si tavuvulrucane vutha malra ku lamanemane ki twaramuru ka umawmase; kwi lalasu kiadremedreme ku alrane ku niravasane ku lamanemane si pasuete ki daane ki tawki.”

¹⁰ Ku Tamatama amia kai, “Ikai Yerusalrime ki Kange ka lrawlrawdru, ikai cekele ka bavane ka taikaiyane yakai ku lingau ku wakaralealeale, ikai ki lrelrelrege yakai ku lingau ki maburuku.

¹¹ Kunumi ka yakai ki talebeane ka valrwalru, karaleala tubi; asi lwiyane ku tarasiwbawbai ku laumawmase wapacainga, ku yakai ku paisu ku umawmase kia mwalrathenga.

¹² “Lukamaninga kwidra, lri malraku ku tinaki si silape Yerusalrime. Lri pathavungaku kudra ki la ngiapaparamuru, si ngiasasudralru ku umawmase; kwini lalasu ngiakakawrivariva iya kai, ‘Ku Tamatama lri kai pulebe ku akaesadhane, lai lri kai pulebe ku amatikurwane.’

¹³ Ku tinukucingalrane ku tacekecekelane lini lri kiravase; ku daane lini kiaburuku. Kwini lalasu kai lri maka udaane si ikai ki tudaane lini palralrawthu, lrika palralrawthu kai ungulu ku twalai ki babudwane lini ku bava.”

¹⁴ Ku maadrau ka vai ki Tamatama lri padaalrunga si kela, lri kelanga! Kwini lrika matiangeange ka vai! Lukamani kwidra, adravane ka garagarange ka tarakikaruburu ka kwapingi lri kiangeange ku kidremedreme tubi!

¹⁵ Lri ka amani ku takaelaelane ka vai, ka akwalriane matikuru ka vai, akikabebetethane ka vai, ka akadradrimitane kai cege ka vai, akikabungane ki atubiane mia ki ememe ka vai!

¹⁶ Lukamaninga kwini vai lri suete ku lingau ki rapa ki kwapingi si wakaraleale, mwadaane ki makeecenge ku kepale ki cekele si buruku ki palralramathane ka vai.

¹⁷ Ku Tamatama amia kai, “Lri pulebeaku kilakikai amatikurwane pakakai ki umawmase, kwini lalasu lai lri mia ki mukimukici sakerakerape. Kai lalasu pasalriu nakwane, lakamani ku erai lini lri mia ki acilai ka kiagugu; ku wapacai ka kinawmasane lini lri idaedaae kaburau.”

¹⁸ Ikai ki takalisiane ki Tamatama ka vai, adravane ka kingi si gingi kwini ki lalasu lri kai maka palribulunga liniane. Ku apwi ka lisiane ki Twaumase lri karidare lama kai ki kawmasane patuelre; lri pakituleepenge amudu kai yakawmasane ka umawmase.