Zakaria 7 - Ngudradreadrekadhane Ka Sisiu 魯凱語聖經

Ku Tamatama maelaela kudra kaika patengane ku talaisane

¹ Sa tarasupatenga ka caili si bangate ka dramare ku taatinuhikanane ki Dariuse, ka amani kudra sakabangate ki dramare si supate ka vai ki swa Hiburu, ku Tamatama wabaai nakwane ku vaeva ka vaga.

² Ku swa Bithele siakawlunga ki Sarizire, Rigimilike, si twapapalra liniane mwa ki daane ki Tamatama ka abebeelengenga ki sanaka kwapingi, si kitubi ki Tamatama ku asubulrubulrwane,

³ La kivaga ki labarakalai si layuginsia, “Lri tusakamiya nai pangimia ku kakudhane twalai kunadruma pikai ki sakalrima ka dramare laisi, si pasikai tubi ku takiburukane kai ki daane ki Tamatama?”

⁴ Kai bilrilane yai vaga ki Tamatama ka abebeelengenga ki sanaka kwapingi ka baai nakwane.

⁵ Amia kai, “Lu mwa pelaela ki swakai kikai ka laumawmase si labarakalai, kai ki nitaramapitulane ka caili, kwi lalasu ku tapikaiyane ki sakalrima si sakapitu ka dramare laisi si tubi, kaika ngwalai ku usakenane nakwane.

⁶ Lu kanekane, lu ungungulu kwi lalasu, ngiapapasikaikaai ku angulwadhaanane lini.”

⁷ Kikai yai taiyane ki Tamatama pangukai ki layuginsia kunadruma. Sakamani kwidra yai yacengeecenge ngiradheradhekane Yerusalrime, ka umawmase ikai kidruanga; kaika swaeete ku umawmase ki la ngiathalringulu ki cekele sikakathane, adravane talikaai lrawdru si talikai talriwgane ki vai ki ngwalralregelrege yakaai ku yakaikai ku umawmase.

Ngwalai ku tabaebalreane si acaicali

⁸ Kai bilrilane vaga ki Tamatama ka abebeelengenga ki sanaka kwapingi papia ki Zakaria. Amia kai,

⁹ “Wadrekasenga naaku ka Tamatama ka abebeelengenga ki sanaka kwapingi, ‘Arakaiya ku dringelresane, la makilibalibake si makakalikalithi.

¹⁰ Madha tusinalremelreme ki lawalibakane, pakulrulrulu, badhabadha, si matiakukuru ka umawmase; madha pikaikai ku akabebetethane ki palrapalra ku kidremedreme.’

¹¹ “Ai, makeecenge kai ubangalre kilalra pasalaladha kai kawkawluli. Kwi lalasu wacelrepe kwi calringa lini,

¹² kwi kidremedreme lini la mia ki lrenege ku kawlukulane. Asi lwiyane kwi lalasu kai kialalra ku tapangukaiyaneli ki layuginsia kunadruma pelaela bulru, la kagirimucaku turamuru.

¹³ Kawarivaku liniane, kwi lalasu la kai kilalra; kwi lalasu lu papia nakwane inulri, lri kainaku tubalre.

¹⁴ Lri miaku ki alrilraugu malra palrivaevange liniane, si malra liniane pikai ki kaika thingale lini ka maelane ka lakuni. Kikai mathariri ka kadaengane lri kaseepelenga, ka kadrwanga ku yakaikai ku umawmase.”