Zakaria 5 - Ngudradreadrekadhane Ka Sisiu 魯凱語聖經

Patharukai ki Ngiapalapalai ka nibalrulane ka hungu ka maburusi

¹ La pelaku masiasirare, kikai la drelaku ku vaeva ka nibalrubalrulane ka hungu ku ngiapalapalai ibelenge.

² Ku sasiakawlu belenge la kivaga nakwane, “Wadrelesu ku manemane?” La iyaku kai, “Wadrelaku ku nibalrulane ka hungu ngiapalapalai ibelenge, ku lragiane bangate ka mituru, ku ngulapane laka supate ka mituru si apararamau.”

³ Kwi lasu ala kirimu iya kai nakwane, “Kwini nibalrulane ka hungu ku belenge nipacasane ku sapuswane ka abadhane satedre ki yakawmasane, ku thili la pacase iya kai: Sanaka saadre lri kimwalra patwalai kawmasane; ku tali thili la pacase iya kai: Sanaka wadraedrangelre kiketekete ka umawmase lri mialri kiamudu.

⁴ Ku Tamatama ka abebeelengenga ki sanaka kwapingi amia kai, lri putaluvaivai kikai sapuswane, kai sapuswane lai lri mudaane ki sanaka daane ki saadre si daane ki papia ki naganeli draedrangelre kiketekete ka umawmase. Kikai sapuswane lri asuru ikai ki daane lini, lai lri kamudu makanaelre.”

Patharukai ki yakaradrarane ka ababai ka maburusi

⁵ Kwi kawrivariva nakwane ka sasiakawlu belenge la adrelanenga, si iya kai, “Drela, yakai ka maelanenga ka vaeva ka wakelakela ka lamanemane!”

⁶ La kivagaku iya kai, “Manemanaini kikai?” Kwi lasu la iya kai, “Vaeva ka karadrare; sapatuthingalane ka pasalrivane ki yakawmasane.”

⁷ Kikai sacaecaebane ki karadrare nipiane arakai ku ridi. Sa dredredrelaku, kwi sacaecaebane la ngucaebane, si ikai ku ababai ku wanene ikai adringi!

⁸ La iya kai ku sasiakawlu belenge, “Kikai ababai sapatuthingalane ki ngialisiane.” Ala pwa lrudrulu kwini ki ababai pwadringi ki karadrare, si caebe.

⁹ La pacungulaku papia belenge masiasirare, si drele ku tadrusa ku labaibai ku papiapia nakwane ngipalapalai; kwini lalisu sapukwane turamuru ku sapakepake, mia ki sapakepake ki kwange. Kwi lalisu la kacipi kwini karadrare si katwase ngipalai.

¹⁰ La kivagaku ki sasiakawlu belenge, “Ka lalisu lri iluku pwinu ka karadrare?”

¹¹ Kwi lasu la iya kai, “Lri katwase mwa Babilunia. Kwi lalisu lri ikai kwini si tudaane kai ki karadrare. Lu maka tudaanenga, lai lri pwadringi kwini karadrare si pasukusukubu ki laumawmase.”