Zakaria 4 - Ngudradreadrekadhane Ka Sisiu 魯凱語聖經

Patharukai ki Tatinakiane ka maburusi

¹ Kudra nakawariva nakwane ku paswalala ka sasiakawlu belenge wakeelanga nakwane kai, miaku ki kiapatwalai ki taerekane apece si kiaceace.

² Kwi lasu kiavaga nakwane, “Manemane ku drelesu?” La tubalreaku, “Vaeva ka tapikaikaiyane ki tinaki ka kakingiane, ikai belenge la ikai ku kisi ku nipwane ku tinaki. Kwini tapikaikaiyane ku tinaki laka pitu ku kwadaladalai, ku vaeva ku tatinakiane laka pitu ku tangukaiyane kudalai.

³ Maecebe ki tapikaikaiyane ki tinaki laka drusa ku ulrive ka angatu, tara vaeva ithili.”

⁴ La kivagaku ki sasiakawlu belenge, “Sinsi, kilakikai lamanemane, manemane ku pacugane?”

⁵ Kwini lasu la kawriva, “Kaisu wathingale?” La tubalreaku, “Kainaku wathingale.”

Tapukawnane ki Twaumase ki Zerubabele

⁶ Ku sasiakawlu belenge ani pelaela ki Zerubabele kai vaga ki Tamatama amia nakwane. Ku Tamatama ka abebeelengenga ki sanaka kwapingi amia kai, “Kaika asatalwane ku puku ki rarukudrane, la kaika asatalwane ku puku ki lrigilane, lri kathane ku asatalwane ki Rili ala lri dulru pangimia.

⁷ Ku la satelengane adravane ka mia ki lregelrege ku abelengane, lri dulru kawlrau icucubungu muswane. Kusu tupela tudaane kwi daane ki Twaumase; lu pubelengesu kwi bibilrilinga kwi lrenege yai, ‘Matiasamali turamuru! Ku migemi ani papia kikai ki daane ki Twaumase!’ ” Lri iya putariri ku laumawmase.

⁸ Ku Tamatama la baainga nakwane ku drumane ka vaga,

⁹ amia kai, “Kai Zerubabele wacegecegenga kai karwalai ki daane ki Twaumase, kwi lasu lri tara tulreepenge. Lu ngimianga ku takaungane, kai kawkawluli ala lri thingale nakwane ka Tamatamaku ka abebeelengenga ki sanaka kwapingi ka amani ku siakawlu muswane mwa liniane kwini.

¹⁰ Kwi lalasu masulri, asi lwiyane ngiabalai turamuru kwi takaungane, ai lu drele ki Zerubabele ka pacungucungulu tudaane kwi daane ki Tamatama, kwi lalasu lri kiraragai.” La iya kai nakwane ku sasiakawlu belenge, “Kai pitu ka tinaki maru pitunga ka maca ki Tamatama, ka wadredredrele kai kawmasane palraelre.”

¹¹ La pelaku kivaga iniane, “Ka maecebe ki tinaki ka drusa ka ulrive ka angatu laka manemane ku pacugane?

¹² Ka drusa ka ricingi ki ulrive, ka yakai maecebe ikai ki tagugugwane ku lawlau ki ulrive ka kingi ka tutulungu, laka manemane ku pacugane?”

¹³ La kivaga nakwane, “Kaisu wathingale?” La iyaku kai, “Kainaku wathingale.”

¹⁴ Kwi lasu la iya kai, “Kikai tadrusa ka kiapulawlau, amani ku nipilriane kalri pasikai ki Tamatama kai kawmasane kaungu.”