Zakaria 3 - Ngudradreadrekadhane Ka Sisiu 魯凱語聖經

Patharukai ki abebeelengenga ki barakalai ka maburusi

¹ Ikai ki drumane ka taingeane ka maburusi, ku Tamatama padrele nakwane ki Yesua ka abebeelengenga ki barakalai acegecege ikai cucubungu ki sasiakawlu ki Tamatama, ku Satange la acegecege ikai tali vanale ki Yesua, si lri kukusu iniane.

² Ku sasiakawlu ki Tamatama la iya kai ki Satange, “Satange, ani kaelaela ku Tamatama muswane! Ku madalame Yerusalrime ka Tamatama ani kaelaela muswane. Kikai umawmase kai ngiamia ki nipatwaladhane ki apwi malra bilibili ka vaeva ka angatu.”

³ Ku Yesua la acegecege ikai kwini, si silaimai ku makudrulru ka laimai.

⁴ Ku sasiakawlu belenge la iya kai ki latwapapapalra pasikaikai, “Ala mulaimadha kikai makudrulru kai silaimaini.” Ala iya kai ki Yesua, “Mwalrangaku kwi pasalrivanesu, lri kipasilaimaisu kwi bavane ka laimai.”

⁵ Kwi lasu la drekase ki latwapapapalra pasikaikai pamalra ku vaeva ku mabula ka pagamucu si pasipagamucu ki Yesua. Kwi lalasu la singikai pangimia, ala pasilaimai iniane ku bavane ka laimai; sakamani kwidra, ku sasiakawlu ki Tamatama la ithili acegecege.

⁶ Ku sasiakawlu ki Tamatama la pakipapawlringau ki Yesua,

⁷ ku Tamatama ka abebeelengenga ki sanaka kwapingi amia kai, “Alaiyasi pangimiasu ku lahulriceli, si pangimia ku sikawluli muswane ku laawngane, lri dulrusu pacungulu marasikai kai ki daane si kalatadraneli. Lri kicacaligiraku ku inulrisu, mia lu kicacaligiraku ku yacucubungu nakwane ku inulri ki lasasiakawlu belenge.

⁸ Abebeelengenga ki barakalai ka Yesua, kilalra! Kwi lapapapalrasu, ka amani kwidra la tarasakalakalai ka barakalai, la kilalra! Lri pelaelaku ki sasiakawluli, ka amani kudra kiapasi ‘Ricingi!’

⁹ Lri pikaiyaku cucubungu ki Yesua ku vaeva ka tinukucingalrane ka lrenege, kikai tinukucingalrane ka lrenege pitu ku lringau, lri papacasaku kai ki tinukucingalrane ka lrenege. Lri ikaiyaku ki minakavavaalane ka vai si mwalra ku pasalrivane kai ki kadaengane. Kikai yai pelaela ki Tamatama ka abebeelengenga ki sanaka kwapingi.

¹⁰ Kudra vai kwini lu kela, kunumi ka tangea lri makitu dawlu numi ki pasiagiagisi numi, si ikai tailebe ki cebe ki budu si icizike kisupisupilri ku sulivatane. Kikai yai pelaela ki Tamatama ka abebeelengenga ki sanaka kwapingi.”