Zakaria 2 - Ngudradreadrekadhane Ka Sisiu 魯凱語聖經

Patharu Lekete ka calrisi ka maburusi

¹ Ikai ki drumane ka taingeane ka maburusi, wadrelaku ku tangeea ku umawmase, la ecenge ku vaeva ku calrisi.

² La iyaku kai kivaga, “Lri mwinusu?” Kwi lasu la iya kai, “Lri katwasaku lekete Yerusalrime, la drele luka thaininu ku lragiane si ku ngulapane.”

³ La drelaku sa katwatwase papucucubungu kudra nakawariva nakwane ku sasiakawlu belenge, la kidredresenge iniane ku tangea ku sasiakawlu belenge.

⁴ Kudra aswalalanga ku sasiakawlu belenge la iya kai ki mwasakadrusa ka sasiakawlu belenge, “Lu katwasa lrabwale si pelaela kavai ki waecenge ku calrisi ka langukathabarane, si iya kai, ‘Lri takaalra ku laumawmase si nilapulapwane ka waudriwdripi ku lri ikai kai Yerusalrime; kikai cekele kai lubibilrili lrika amaninga kudra kadrwa ku raedre ka kepale ka cekele.

⁵ Si ku Tamatama la palrainginga, lrika amanini ka araedre ka kepale ka apwi, si ngithalringulu kai ki cekele, palakebe iniane, ka amaninga kudra lrigu ki cekele.’ ”

Wadawlu pubalriu ki laacaicali

^6-7 Ku Tamatama amia kai ki kawkawluini, “Napauvagavagainga naku numiane papia sanaka inininunga. Ai kunumi ka acaicaicali ka laumawmase, kidaila mubera ki Babilunia! Si siwlria mubalriu, mwa Yerusalrime.

⁸ Ku aneane ku walrumai numiane, maru walrumainga kudra ki kadadaalamengali.” Lakamani kudra lrigu ka Tamatama ka abebeelengenga ki sanaka kwapingi ala sikawlu nakwane patuluru pelaela kikai lebenga kai vaga, papia kudra ki nawaravasenga ki kawkawluini ka lakuni,

⁹ “Kwaku ka Tamatama lri ngikakamaniaku lrumai numiane; kudra napasiakaikai kaungu muswane ka laumawmase lri malra nguelre bulathe numiane.” Kikai lu ngimianga, lri thingale nakwane makanaelre ala ka siakawlu nakwane ku Tamatama ka abebeelengenga ki sanaka kwapingi.

¹⁰ Amia kai ku Tamatama, “Laumawmase ki Yerusalrime, kiraragadha senasenai! Asi lwiyane lri kelaku si ikai numiane.”

¹¹ Lukamaninga kwidra, lri takaalra ku kuni kulri papia ki Tamatama, si akawkawlunga iniane. Kwi lasu lri ikainga numiane, ala lri thingale numi ka siakawlu nakwane ku Tamatama ka abebeelengenga ki sanaka kwapingi mwa numiane kwini.

¹² Ku Yuda lri peelana ikai kai ki saniange ka kadaengane ki Tamatama si anipawkalrivilane ka tacekecekelaneini; kai Yerusalrime ala lri kamaninga ku kadadaalamengaini ka cekele.

¹³ Sanaka kiacaebe belenge ka laumawmase isaselebana ikai cucubungu ki Tamatama, asi lwiyane ku Tamatama twalai ki mabula si ka saniange ka taikaikaiyaneini kainganai.