Zakaria 14 - Ngudradreadrekadhane Ka Sisiu 魯凱語聖經

Yerusalrime si lakuni

¹ Ku aneneane ki Tamatama si saibange kudra vai lri padaalrunga si kela, lukamaninga kwidra, ku Yerusalrime lri kiravase; ku laumawmase lri icucubungu numiane si mavalavalavala ku niravasane.

² Ku Tamatama lri sarubu sanaka kuni si kikaruburu ki swa Yerusalrime. Lai lri kimucekele, si kiravase ku ladaane, ku laababai lri kiulucu kitusinalreme, lri apararaamau ku laumawmase ku lri kiravase, ku aabalu si panianiake ku umawmase lai asuru ikai ki cekele.

³ Ku Tamatama la lri katwase kikaruburu kwini ki lakuni, mia saka siaswalane.

⁴ Ikai kwini ki vai, kwi lasu lri acegecege ikai tali talrawane Yerusalrime ikai lregelrege Ulrivese. Ku maadrau ka lregelrege ka valrwalru lri twalai talrawane pakeela talriwgane ki vai alra paudrusa si pauvagai ki lregelrege Ulrivese, ku thili ku lregelrege lri papia tali dradha taluela, ku thili lai lri papia tali lrawdru taluela.

⁵ Lri mubere numi, si ngukakaikai ki valrwalru ki Tamatama; ka valrwalru ki drusa ka maecebe ka lregelrege, si daruru kela kavai talikai thili. Lri mubere numi, mia ki cucungulane numi sa mubere ki lingilingi saka talialalai ki swa Yuda ku Uzia. Ku Tamatama ka Twaumaseli lri tara kela mulebe, si mailuku karedele sanaka sasiakawlu belenge.

⁶ Ikai kwini ki vai, kai lri ikainga ku kecelrane, ku pasabu,

⁷ lai ka kadrwa ku dradrimitane; lri ka palralrawthunga ka vaiyane, adravane ka maungu lri mia ki vaiyane ledra. Kikai kathane ku Tamatama ku wathingale lulri kamani lwigane ku angimiane.

⁸ Ikai kwini ki vai, lri ikai ku sapanianiakane ka acilai ku twalai Yerusalrime mwalwalwaludru, ku apararamau lri mwaludru papia ki Titimwane ka laveke, ku apararamau lri mwaludru mwa ki Miditerania ka laveke. Kikai acilai lri mwalwaludru palralrawthu kai kadrekadrekare, ani ka kalacengelravane ani ka kalaudalane thadaalrane.

⁹ Ku Tamatama lri atalialalai ki yakawmasane; sanaka umawmase lri pelaela pathingale ala ka vaeva ka Tamatama, ka mwakalrivili ku naganeini.

¹⁰ Twalai tali dradha Geba mwa tali lrawdru Yerusalrime ka Rimungu, palraelre talikai kwini lri kisadrarate paadratane. Ka Yerusalrime lrika abebeelengenga ki langiathalringulu; ku cekele lri twalai lrawlrawdru Biniyamingi padaruru ki Piyu ka lrawlrawdru (ikai kwini kunadruma nayakai ku supilri ku lrawlrawdru). La twalai Hananile daruru ki tapepeane tubava ki talialalai.

¹¹ Ku laumawmase lri sutelrainga ikai Yerusalrime, lri kai ikainga ku matiwkuludrane ku akipapacadhane kipakamudu.

¹² Ku Tamatama lri pakacaeme ku matiukukuludru ka caemane kudra ki lakuni ku kiakaruburu ki swa Yerusalrime. Kwi lalasu lu panianianiakeana, lri kaburaburau ku beate, ku lamaca si lalridame lai lri kaburau.

¹³ Ikai kwini ki vai, ku Tamatama lri pakalrithavulu, pakathathiburu liniane, sanaka aneane lai lri ruthuku si lrumai kudra ki yathili iniane ku umawmase.

¹⁴ Ku swa Yuda lri pasikai ki Yerusalrime kikaruburu; kwi lalasu lri ravase ku lawbubulu ki sanaka kuni, yakai kudra makaalra ku kingi, ku gingi, si laimai.

¹⁵ Ku rigi, ngiririgi, lrakeda, ruba si lawaudriwdripi ka lapulapu lini patueelre ikai kudra ki sasuladhane ki badha, lri kisaela patueelre ku matiaukuludru ka caemane.

¹⁶ Lukabilrilinga, kudra la abalu si panianiake ku la kiakaruburu ki swa Yerusalrime kudra lakuni, lri picaili mwa kwini sukubu ki sapupukwanenga ka talialalai ka Tamatama, ka abebeelengenga ki sanaka kwapingi, si lai paluludu ku Talakangane ka lrisi.

¹⁷ Alaiyasi ikai ku kuni ku kai matwase sukubu ki sapupukwanenga ka talialalai ka Tamatama, ka abebeelengenga ki sanaka kwapingi, ku udale lri kai mulebe mwa ki kadaengane lini.

¹⁸ Ku swa Izipiti alaiyasi kai katwase paluludu ki Talakangane ka lrisi, ku Tamatama lri pakacaeme liniane; kudra kai paluludu ki lrisi ku kuni si laumawmase, lri mialri kacaeme ku thadaalrane ka caemane.

¹⁹ Ku swa Izipiti si drumane ka lakuni alaiyasi kai paluludu ki Talakangane ka lrisi, lri tarumara ku miyaiya kikai ku sapathavungane.

²⁰ Ikai kwini ki vai, adravane ka kilrikilringi ki rigi lri pibelenge pacase ku “Nitusanianganane ka Tamatama” amia ka vaga. Ku palungu ikai ki daane ki Tamatama lri kitusaniangane mia ki kisi ka yacucubungu ki tapatarumaramarane.

²¹ Sanaka yakaai Yerusalrime si Yuda ku palungu, lrika nitusanianganane si tu Tamatamane, tusaarakaiyane sukubu ki Tamatama ka abebeelengenga ki sanaka kwapingi. Ku amani ka patarwamara lri tusarakaiyane aga ku sapatarumarane ku beate. Ikai kwini ki vai, ku daane ki Tamatama ka abebeelengenga ki sanaka kwapingi lri kai ikainga ku pwatiatiame ku umawmase.