Zakaria 11 - Ngudradreadrekadhane Ka Sisiu 魯凱語聖經

Taturamuranenga ki ngiakarakacane ka talialalai

¹ Lebanungu, mueleba kwi lrawlrawdrusu, lani lama utu ku apwi ki cedare ka angatusu!

² Tubia karaleale ka alrenge ka angatu! Mwakadrulunga kwi cedare ka laangatu; kwi matidalamane ki tadradrau ka laangatu kiapulebenga! Kiangeange tubi, ka tharialupu ka angatu ki swa Basane! Kwini mawangatungatu kiakabebetethenga!

³ Kilalalra kwi tubi ki amani ku warathudu, asi lwiyane maulrawnga ku lriguini! Kilalalra kwi giringi ki raiyungu, asi lwiyane kiakabebetethenga kwi thili ki kadravane Yuredange kwi angatungatu!

Tadrusa ka taraagwagu ki kiu

⁴ Ku Tamatama ka Twaumaseli amia kai, “Lu kamania ka taraagwagu ka umawmase kudra ki lri kiculu ka lakiu.

⁵ Kwi tawki ki lakiu papacai liniane la kai kipathavungu. Kwi lalasu kialangai kwi beate ki kiu, si la iya kai, ‘Sapaiswanengata, tadrengedrengere ki Tamatama!’ Adravane ka taraagwagu ki kiu, kai makuru liniane.”

⁶ Ku Tamatama amia kai, “Lri kainaku kakalithinga kikai yakai kai ka laumawmase; lri ngikakamaniaku malra liniane si baai ki amani ku warathudu. Kikai lawarathudu lri kabebetethe kai ki kadaengane kai; lri kainaku palribulu liniane pakatwase ki puku ki lalasu.”

⁷ Kudra tarakilangalangai ki lakiu ka laumawmase arakainga nakwane; amaninga naku kudra taraagu kwini ki lri kiculu ka lakiu. Wamalraku ku drusa ku sagwagwane ka ukudru, ku vaeva sia “Migemi”; ku vaeva sia “Maelre avaevanga”. Ngiamia kikai, pathagilaku agu ki lakiu.

⁸ Maupungaku kudra ki drumane ka tatulru ka malisilisi nakwane ka lataraagwagu; ikai kai ki tinaradradramarane mwalrathaku liniane.

⁹ Amiaku kai ki lakiu, “Lri kainaku ka amaninga ku taraagwagu numiane. Lani pacai kudra lri paacai, lani kamudu kudra lri kaamudu. Ku tedranenga lai lri mapapacapacai.”

¹⁰ Ala malraku celra kudra ki “Migemi” ka ukudru, si suburu ku tamakaketeketane ki Tamatama si sanaka kuni.

¹¹ Sakavaivai, kwini samakaketeketane masuburu. Kwini la tarakilangalangai ku lakiu waleengethe nakwane; kwi lalasu wathingale ku tapangukaiyane nakwane ki Tamatama si pelaelaela ku matiakiragai ka vaga.

¹² La iyaku kai liniane, “Alaiyasi ubangalre numi, badhaili ku sapawlrawlravane ku paisu, lu kai numi ubangalre, la sura.” Kwi lalasu ala kirimu baai nakwane ku matulrulu ka gingi ka paisu tusapawlrawlravane ku takaunganeli.

¹³ Ku Tamatama amia kai nakwane, “Malra kikai paisu si pudringai pwa ki tagingiane ki daane ki Twaumase.” La malraku kikai matulrulu ka gingi, ka amani kudra lu kidremedreme kwi lalasu ka naika amalraneli ka kaika bekelane ku takathane, si pudringai pwa ki tagingiane ki daane ki Tamatama.

¹⁴ Ala malraku celra kwini mwasakadrusa ka sia “Maelre avaevanga” ka ukudru, si suburu kabebetethe ku amaelreane avaeva ki swa Yuda si swa Iseraylri.

¹⁵ Ku Tamatama amia kai nakwane, “Lu pelana ataraagwagu; ki kikai yai amalisia ka taraagwagu.

¹⁶ Ku arakaili pamulrawlrau ka tangea ka taraagwagu, lri kamani ku marasiakaikai ki lakiuli; ai kwi lasu kai paralubu kudra ki la kiapangituluku, kai wasilape ki laamuli, kai wasulrau ki madula, la kai pakane lapu ki panianianiakeana; ngiabaalrelringa, kwi lasu wakane kudra ki lamaricucurunga ka kiu, la thirace ki la lrubungu lini.

¹⁷ Kudra manganga ka taraagwagu ka wacilri ki lakiu lri matisalregesege, ku amakaruruburane lri nguelre amudu ku pukuini. Ku alrimaini lri aru suludru; ku vanale ki macaini lai lri kitulreepenge kamukici.”