Zakaria 1 - Ngudradreadrekadhane Ka Sisiu 魯凱語聖經

Ku Tamatama wadawlu ki kawkawluini papia iniane

¹ Sa taradrusanga ka caili si valru ka dramare ku taatinuhikanane ki Dariuse ki swa Perisia, kai lebenga kai taiyane ka vaga Tamatama ka wabaai pelaela ki agane ki Idu ka lalake ki Berekia ka yuginsia ka Zakaria.

^2-3 Ku Tamatama ka abebeelengenga ki sanaka kwapingi pacungula pelaela ki laumawmase amia ki Zakaria, si iya kai, “Tamatamaku, namaelaelanganaku ki lacucungulane numi; ai kaiasasane lri papiaku numiane iya kai, ‘Ngibangula papia nakwane, la nau ngibangulu papia numiane.

⁴ Kunumi madha twalralrau ki lacucungulane numi; ku nalayuginsia kunadruma peaelaela kai matiakiragai kai vagali liniane, madha siwlriwlringa ikai ki ngialisiane si pasalrisalriu ku tapanianianiakane iya, ai kwi lalasu kai kialalra, la kai paluludu pasalaladha nakwane.

⁵ Ku lacucungulane numi si layuginsia kadrwanga.

⁶ Pangwakaiyaku ki lasasiakawluli, ka amani kudra layuginsia, la drekase, pakipapawlringau ki lacucungulane numi; ai kwi lalasu kai twamanemane, sakabilrilinga la ngipapakwalri. Ala sakabilrilanenga kwini lalasu ngiatatupelanga; si thingale nakwane ala ka Tamatamaku ka abebeelengenga ki sanaka kwapingi ka singiakai ku takikakaneli, la singikai ku naika angimiane lini, si pathavungu liniane.’ ”

Patharu Rigi ka maburusi

⁷ Ku taatinuhikanane ki Dariuse sa taradrusa ka caili si 11 ka dramare, amani saka Sipate ka dramare ka 24 ka vai, ku Tamatama arakai ku maburusi pelaela ku matiakiragai ku vaga baai ki yuginsia ka Zakaria.

⁸ Yakai sakamaungu, la drelaku ki sasiakawlu ki Tamatama sa ngurigirigi ki duduli ka rigi, si idrengere ikai valrwalru ka nanavanavate; kudra lrilrikudruini yakai ku duduli, papacasane, si lrawlrapungu ka rigi.

⁹ Yakai ku tangea ku sasiakawlu belenge ka kawrivariva nakwane, la kivagaku iniane iya kai, “Sinsi, manemane ku patharevane kikavai larigi?” Kwi lasu la iya kai, “Lri pelaelaku muswane lukamanemane ku patharevane.”

¹⁰ Kwini yasadra ikai ki mawnavanavate ka sasiakawlu belenge amia kai, “Kilakikai yai nisikawlane ki Tamatama padrele mwa kai kawmasane.”

¹¹ Lai lri papia ki sasiakawlu ki Tamatama pelaela iya kai, “Wadrele nai salraelre kawmasane, la drele nai kai kawmasane mababitingi ka kadrwa ku manemane.”

¹² Ku sasiakawlu ki Tamatama la iya kai, “Tamatama ka abebeelengenga ki sanaka kwapingi, ku tapapianesu ki Yerusalrime si lacekele Yuda kaelaela taramapitulunga ka caili, lri tarathainwanasu ala lri kakalithisu liniane?”

¹³ Ku Tamatama la arakai ku sasasane ku vaga tubalre kwini ki kawrivariva nakwane ka sasiakawlu belenge.

¹⁴ Ku sasiakawlu belenge pelaela ku taiyane ki Tamatama ka abebeelengenga ki sanaka kwapingi amia nakwane. Kwi lasu amia kai, “Makalithaku si taulra turamuru Yerusalrime ka amani ku saniange ka cekeleli,

¹⁵ ai lri kalisiaku kudra ki maswalrealreke kudra la kuni. Asi lwiyane saicengecengaku ngidradrepete ku elathaneli ki kawkawluli, kwi lalasu arwa driimalringa pakwalri ki kawkawluli.

¹⁶ Ngwalai kai, siaulriaku mwa Yerusalrime, lri kakalithaku kai ki cekele. Kai saniange ka daaneli lrika atara tupelaane tudaane, kai saniange ka cekele atara pelaane tupudriadringai.”

¹⁷ Ku sasiakawlu belenge la tupeelanga pelaela iya nakwane, “Amia kai ku Tamatama ka abebeelengenga ki sanaka kwapingi, ku cekeleini lri tara peela ngiradhekane; kwi lasu lai lri peelana paralubu Yerusalrime, wapilri kai ki cekele ngitatu cekeleini.”

Patharu Lawngu ka maburusi

¹⁸ Ikai ki maelane ka vaeva ka maburusi wadrelaku ku supate ka lawngu.

¹⁹ La kivagaku kudra ki nakawariva nakwane ka sasiakawlu belenge, “Kikai lalawngu manemane ku patharevane?” Kwi lasu la iya kai, “Kai lalasu atalingikaiyane kudra ki puku ki pakatwase pawvavagai ki laumawmase ki swa Yuda, swa Iseraylri, si swa Yerusalrime.”

²⁰ Sakabilrilinga ku Tamatama la pela padrele nakwane ku tasupate ku sialrima ka tarakawaungu ka daikusange.

²¹ La kivagaku iya kai, “Kilakikai umawmase wakela tumane?” Kwi lasu la tubalre iya kai, “Kai lalasu wakela kukuludru si kadrulu kudra puku ki sanaka kuni; asi lwiyane kai sanaka kuni mabebetethenga ki kadaengane ki swa Yuda, si pakatwase pawvavagai ki laumawmase ki swa Yuda.”