Yuna 4 - Ngudradreadrekadhane Ka Sisiu 魯凱語聖經

Lisiane ki Yuna si sapacepane ki Twaumase

¹ Pangukai kikai, ku Yuna kai kiaragai, maliisi turamuru.

² Ala inulri kai lasu iya kai, “Tamatama! Sa kainaku katwaseana ki cekeleli, kainaku kawariva lri tara piyasu kikai iya? Ngwalai ki kikai, pakaelreaku ku puku pasana ubere mwa Taresise! Wathingalaku ka yakai ku migemisu si thalradhanesu ka Twaumase. Kaisu maduai kalisi, swaeteane ku thalradhanesu, lri dulru akabalrithi ku kidremedreme si kai pathavungu ki umawmase.

³ Lakamani, Tamatama, anau pacai kamani! Mathaithariri lu pacadhaku kamani!”

⁴ Ku Tamatama la tubalre iya kai, “Manemane kai iyaiyasu kai kalisilisi?”

⁵ Ku Yuna ala katwase mulatadre ki cekele, si nene ikai tali talrawane ki cekele. Twadadaane ku vaeva ka balrawbau, si nene kulrilri ikai kwini ki dadaane, lri dredrele ki cekele Ninivi ku lrika angimiane.

⁶ Sakabilrilinga, ku Tamatama ka Twaumase paikai ku vaeva ka hima, la pacebe ka maelrelrenge ki Yuna, si palrilri ki awlruini, kwi lasu la kusaseseevere. Ku Yuna madaalame turamuru kai ki angatu.

⁷ Ai, sakakaiyane ki mialrealre, ku Twaumase la pakainganai ku vaeva ku lubalubai si kace kwini ki angatu, kwini angatu la karudame si pacai.

⁸ Sa ngibwalenga ku vai, ku Twaumase la pakainganai ku maculu ku saseverane twalai tali talrawane. Ngwalai ku takuvaiyane cikicikisi ki Yuna, kwi lasu ku takuvaiyaneini malriingace kisanu kawlrawlrawnga, ala kitubi ku apacadhaneini. Kwi lasu amia kai, “Mathaithariri lu pacadhaku kamani!”

⁹ Ai ku Twaumase amia kai iniane, “Manemane kai ngwalalaisu kai ki hima si mia kikai kalisi?” Ku Yuna la tubalre iya kai, “Manemane si kainaku maka kalisi? Nau pacai amiaku ki lisianeli!”

¹⁰ Ku Tamatama la iya kai iniane, “Kikai angatu yamauawngane kadrau, sakakaiyane la kalraici pacai; unu kaisu kamani ka walredreke iniane, la kaisu kamani ka pakadrau iniane, ai la taulrananasu iniane.

¹¹ Lu mia kwini, lai kainaku ka makaikaalithi kai ki maadrau ka cekele Ninivi? Ikai kai ki cekele walribate ki ta 12 ka kudrai kai umawmase ka kaiyana wathingale ku vanale si viri ki alrima lini luka saininu, si la ikaiyana kathathatha ku nilapulapwane ka waudriwdripi!”