Yuna 3 - Ngudradreadrekadhane Ka Sisiu 魯凱語聖經

Ku Yuna papia cekele Ninivi

¹ Ku Tamatama peaeelanga papia ki Yuna kawriva.

² Amia kai, “Lu katwasa papia Ninivi kwini ki maadrau ka cekele, si papia kwini ki laumawmase pelaela ku cunuli muswane ku vaga.”

³ Ku Yuna la paluludu ku drekase ki Tamatama, katwase papia Ninivi. Kwini cekele maadrau ka cekele, lu makatulrulane ku vai maka wadadaavace madu.

⁴ Ku Yuna la mucekele, si dadavace makavaale, la pelaelaela iya kai, “Lri makamasupatelenga ku vai, kai cekele Ninivi lai lri kiburuku kiamudu!”

⁵ Kai cekele Ninivi ku laumawmase masalrunga ku vaga ki Twaumase. La kalrithethenga kwi lalasu ku alaisane makanaelre sanaka aneane, ikai kwini ki cekele makanaelre ku umawmase, adravane ka tarudrawdrange ka lavavalake, la sipalimemelre ku kaimadhane makanaelre ka sapelaelane ka ngiatatasiwlriwlringa.

⁶ Ku talialalai ki swa Ninivi sa kilalra kwini, la katwase ki taetalaneini, si mwalra ku laimaini ka talialalai, la sipalimemelre ku kaimadhane, si nene ikai ki abu.

⁷ La papia ki swa Ninivi kawriva pasalraelre, amia kai, “Kikai yai drekase ki talialalai si latabebelenge ka mauawngu iniane: Ku umawmase, ku nilapulapwane ka waudriwdripi, si lwange kiu, madha kanekane makanaelre ku lamanemane, madha kanekane, la madha ungungulu.

⁸ Ku umawmase si nilapulapwane ka waudriwdripi sipalimemeelra makanaelre ku kaimadhane. Sanaka aneeanenga tara kakalitha papia ki Twaumase inulri, si isadra ku ngialisiane ku kakudhane, madha piapia ku pangwa lrumai si ribici.

⁹ Alau lri ngwalai kai ku Twaumase si tupela ku kidremedremeini, si kai kaelaelanga, lai kaita lri ngwalainga si kamudu!”

¹⁰ Ku Twaumase sa drele ku tapiane lini patuelre, wadrele liniane ka wacilringa ku ngialisiane ka kakudhane. Ala ngikusawlri ku kidremedremeini, si kai pulebe baai liniane kudra paswalangaini pelaela kudra amatikurwane.