Yuna 2 - Ngudradreadrekadhane Ka Sisiu 魯凱語聖經

Inulri ki Yuna

¹ Ku Yuna yakai ki barange ki kange si papia ki Tamatama ka Twaumaseini inulri:

² Tamatama! Ikai kai ki takipadradresenganeli ki akwalriane kiatubiaku muswane, la tubalrengasu nakwane. Twaladhaku swadriadringi kitubi ku aparalubanesu, la kilalrangasu kai kitubili.

³ Wavereveresu nakwane pwa ki laveke adringi, sa kelanga naku ki mwadriadringinga ki laveke; kai maadrau ka acilai ngiathalringulu nakwane, ku maadrau ka bikabiki maka lrilriugu nakwane.

⁴ Lu kidremedremaku, kia pakatwasenga naku twalai ki cucubungusu, kainaku lri dreelenga ki daanesu.

⁵ Kai maadrau ka acilai walrenepenga nakwane, si pakasemete nakwane; kai laveke wakabungunga nakwane; la lrepelrepenga ki awlruli kai ubulu ki laveke.

⁶ Mwalebenga naku mwa ki tangadrane ki lalregelrege, si kela ki nidrukuranenga palralrawthu ka lrawlrawdru. Ai Tamatama ka Twaumaseli! Patwalaisu swadriadringi adringi patakunianiake palribulu nakwane.

⁷ Sa thingalenga naku kai niakeli kalri padaalrunga si mwaludru, Tamatama, papiaku muswane kitubi; yakaisu ki daanesu kilalra kai inulrili.

⁸ Kudra wasukusukubu ki kadrwa ku paluludane ka samiamiange, wacilringa ku akapatengatenganane papia muswane.

⁹ Ai lri senadhaku drengedrengere muswane; lri papiaku muswane patarumara ku sapatarumarane ku waudriwdripi, si baai sawlri patuelre ku ngikakiketeketeli. Ku sapalribulane kathane ku Tamatama ku tatwaladhane!

¹⁰ Sakabilrilanenga, ku Tamatama wadrekase kwini ki madradrau ka kange pikai ki aenaenai upa ki Yuna, kwini madradrau ka kange la singikaai pangimia.