Yuna 1 - Ngudradreadrekadhane Ka Sisiu 魯凱語聖經

Ku Yuna wabaebalre ki Tamatama

¹ Yakai saka minakavalane, ku Tamatama papia ki lalake ki Amitai ka Yuna iya kai,

² “Lu papia Ninivi kavai ki maadrau ka cekele, si putaluvaivai kaelaela ki swakai kwini ka laumawmase, asi lwiyane kiararaketenga naku liniane ka ngialisianenga turamuru!”

³ Ai ku Yuna ngiabalre ku tapapianeini katwase, kiadremedreme ku awberaneini ki Tamatama. Kai lasu sa kelanga ka Yupa ka taisadrasadrane ki lavarukuru, la kidringai ku vaeva ku varukuru kulri papia kavai Taresise. Kai lasu sa baainga ku paisu ku sangukaiyaneini ki varukuru, la mubelenge ki varukuru, lri karedele ki la taraikaikai ki varukuru mwa kavai Taresise. Kai lasu lu kidremedreme, lu mubere mwa kwini lri dulrunga kidaili ki Tamatama.

⁴ Ai, ku Tamatama pavalrigi ki laveke, ku valrigi si maadrau ka bikabiki la makakaai ki varukuru, kwini varukuru la kisanu kasubusuburunga.

⁵ Kilakikai taraikaikai ki varukuru la ngituluku mukuludru turamuru, sanaka aneeane la kitubituubi ki twaumase lini ku akipalribulane. Pakai ku aru kaliapadhane ku telregane ku amece ki varukuru, kwini lalasu wamalra kwini yakai ki varukuru kwi lamanemane si cilri pwa ki laveke. Kikai kwidra, ku Yuna la mulebe mwa ki talamanemanane, si apece ikai kwini ererereke.

⁶ Ku kiacapili ki varukuru la kidringai ki Yuna ikai kwini ki talamanemanane, la iya kai iniane, “Asu ikaaiyana kai apece? Ngidrakala si kitubi ki Twaumasesu! Alau lri kakuru mitane, si palribulu ki niaketa.”

⁷ Kwini la taramarasikaikai ki varukuru la mapelaela iya kai, “Bwala takuzibiki, lata dredrele luka pasalrivane ki aneane kai kipadradresengeta kai apacadhane.” Kwini lalasu la kuzibiki, la ka Yuna ku kia makakai.

⁸ Kwi lalasu la kivaga iniane iya kai, “Pelaela naiane, kai kipadradresengeta kai sapapacai amanisu ka waacepe? Manemane ku kauawngusu? Twalainusu kainganai? Swa inusu?”

⁹ Ku Yuna la tubalre iya kai, “Swa Hiburuaku. Mwasakenaku si mukuludru ki Tamatama, ka yasubelebelenge ka Twaumase, amani ku Twaumase ka wabekace ki laveke si kadaengane.”

¹⁰ Ku Yuna la pelaelana liniane mwabeberaku kikai ki Tamatama. Kwini la taramarasikaikai ki varukuru sa kilalra kikai taiyane, la ngituluku turamuru, si iya kai iniane, “Asu amamaama pia kai ubere?”

¹¹ Asi lwiyane ku valrigi si bikabiki arwa pakilringalringau, kwini lalasu la kivaga iniane iya kai, “Lri tungitwatumane nai muswane ala lri dulru isadra kai valrigi si bikabiki?”

¹² Ku Yuna la tubalre iya kai, “Ala mabulribulria nakwane, si cilri pwa ki laveke kai valrigi si bikabiki lri idreengere. Asi lwiyane wathingalaku ka pasalrivaneli alakamani ku kipadradresenge numi kai ki valrigi.”

¹³ Ai kai lataramarasikaikai ki varukuru palraaingi kadrakadrau, ku lrika adarurane mukameamealane ki varukuru. Ai arwa pakilringalringau valrigi, kwi lalasu kai maka arwa adili.

¹⁴ Kai lalasu ala kirimu kitubi ki Tamatama iya kai, “Tamatama! Madha ngwalalai ku tapapacadhane nai kai ki lasu si arakai ku apacadhane pathavungu naiane. Tamatama, ki kikai patuelre amanisu ku paiya, lri kamanisu ku marasiakai.”

¹⁵ Sa maka kawrivanga, kwi lalasu ala malra ki Yuna mabulribulri, si cilri pwa ki laveke. Ku valrigi si bikabiki la makakaai idrengere.

¹⁶ Kwi lataramarasikaikai ki varukuru la ngwalai kikai si usakene ukuludru ki Tamatama turamuru, la papia ki Tamatama patarumara ku sapatarumaramarane, si kiketekete ku akisikawlane iniane.

¹⁷ Sakamani kwidra ku Tamatama la arakai ku vaeva ka maadrau ka kange, la malra ki Yuna lrungulrungu si lrelre. Ku Yuna la ibarangane ki kange makatulrulu ku vaiyane si maungu.