Yuile 2 - Ngudradreadrekadhane Ka Sisiu 魯凱語聖經

Ku amatikurwane ka apapawku sapakipapawlringavane ki Tamatama ku asaibangane

¹ Ikaiya Ziyungu ngirapa! Kalringikinga ikai ki saniange ka lregelrege ki Twaumase! Laumawmase ki swa Yuda, manugeregera! Ku vai ki Tamatama lri padaalrunga si kela.

² Kwini ki vai yai dradrimitane, dradridrimiti matiukukuludru, makeceege ka ememe, madradrimiti ka kulrulrungu ka vai. Kudra twarededele ka apapawku la papia cucubungu katwase, mia ki dradrimitane kabungu ki lalregelrege. Kunadruma kadrwa ku ngimiyaiya kai, lukabibilrili lai lri mialri kai lri ikainga.

³ Ku laapapawku mia ki apwi, kane patueelre ki lawacebecebe. Sa kaiyana kela kai kadaengane mia ka Idingi, sa ngilribatenga la mia ki cinilrianenga ka ubulane; kwi laapapawku kadrwa ku lragau.

⁴ Kwi laapapawku lu drelane mia ki larigi, lu lailai mia ki tarakikaruburuburu ka larigi.

⁵ Ku lingau lu itituku ikai belenge ki lalregelrege, mia ki sakikaruburuburane ka palridingi lu katwatwase ku siange, la mia ki kwalamalama ka ubulu tucicaici siasiange. Ku taturededelane madeemele, mia ki lri kikaruburu ka madrau ka kwapingi.

⁶ Kwi laapapawku sana kela, mwakuludru sanaka umawmase kai thingale ku apiane, si kasalese ku lringau.

⁷ Kwi laapapawku mia ki lagaragarange ka kwapingi katwase kikaruburu, la mia ki tarakikaruburuburu ka kwapingi kapa ki balingibingi ka kepale. Kwi laapapawku magaarange aru cucubungu, kai elaelaela ku apapiane,

⁸ la kai madrikidrikidrikisi. Kwi laapapawku twarededele lribate ki satelengane, kadrwa ku wadulru telenge.

⁹ Kwi laapapawku mwa cekele kikaruburu, si kapa ki balingibingi ki cekele, la kapa mutalrugulrugane, mia ki tarakupawpa cwake ki lribange si mudaane.

¹⁰ Kwi laapapawku sana kela, ku kadaengane ngiavelevele, kai belenge la manugiligili, kai vai si dramare madradrimiti patuelre, kai latariau la mialri kai ledranga.

¹¹ Ku Tamatama wadrekase ki lakwapingini. Ku lakwapingini tagagarange, ku kiadawlu si katilibi akwapingi takalra turamuru. Ku asaibangane ki Tamatama ka vai matiaukuludru turamuru! Aneane kulri maka siamece?

Ngitatupela amiamia

¹² Ku Tamatama amia kai: Kaiasasane, lri kai katumane lu laisi numi, tubi, karaleale, kapatengatengane ngitatupela, si papia nakwane.

¹³ Lu purici numi ku laimai sikakathane kadrwa ku paluludane; kapatengatengana tubi ngitatupela ku pasalrivane. Papia ki Tamatama ka Twaumase numi! Ku Twaumase yakai ku migemi, suete ku kalithane; ku Twaumase kaika mabungungusu, madrau ku sakialibake; lri mubangalre makakaai pacepe si kai pulebe ku amatikurwane.

¹⁴ Kwi Tamatama ka Twaumase numi alau lri akabalrithi ku takidremedremane, si pasuete patarumara baai numiane ku akaesadhane; lukamaninga kwidra lai lri dulrunga numi papia iniane patarumara ku taleke, ku mathariri ka bava.

¹⁵ Ikaiya lregelrege Ziyungu ngirapa! Pelaela ku alaisane, la payelrelre irubu!

¹⁶ Sarubwa ki mapapangale, si padulru ku akipaelreane ki saniange ka tayelrelreane. Araka ki latarudrawdrange si ililuku ki lavavalake, la ibibi ki lalrulai, ku tawkarudrarudrange ku ladrusa lri mialri mulatadre kainganai.

¹⁷ Mauawngu pasikai ki Tamatama ka labarakalai, ikaiya kabicelrakane ki tapatarumaramarane si lrawlrawdru ruka ki daane ki Twaumase tubi inulri: Tamatama, kakuruua ki kawkawlusu. Madha patudrekadrekase ki lakuni naiane; madha pamulralralrakai liniane naiane, iya kai: Yainu ku Twaumase numi?

Ku Twaumase peaela patarumara ku akaesadhane

¹⁸ Ku Tamatama peaela kakalithi ki kadaenganeini, si kakalithi ki kawkawluini.

¹⁹ Ku Tamatama twabalre liniane: Lri patarumaraku numiane ku taleke, mathariri ka bava, lawlau ka ulrive; lri malra numi ngulwadhane; ku drumane ka kuni kai lri tudrekase numiane.

²⁰ Lri pakidailaku numiane kudra twalai tali dradha turededele ka apapawku; lri pakatwasaku liniane pamwa ki tamatisepelane, ku aswalala ku twarededele lri kipamwa ki Titimwane ka laveke; ku bibilrili ka twaredele lri kipamwa Miditerania ka laveke. Ku wapacai ku kinawmasane lini lri kela belenge sangubalre. Ngwalai ku tadrimane baai numiane ku amatikurwane, lri amudaku liniane.

²¹ Lakadaengane, madha mukuludru, kiraragadha! Asi lwiyane ku Tamatama pasiakai numiane pia ku maadrau ku awngane.

²² Walrawlrawlrakwane ka waudriwdripi, madha mukuludru! Ku laububulane masalese, ku laivai la ngikararasai ku madru, ku lacebe ki icizike, lacebe ki budu peaela ngiesadhane pumadru.

²³ Laumawmase ki Ziyungu, kiraragadha! Pasikai ku takaungane ki Tamatama ka Twaumase numi kiraragai. Ku Twaumase patarwamara numiane ku mamwamwamwa ku udale; ku Twaumase pangiamia kunadruma tuudale ki kalarigarigane si kalalidrarane.

²⁴ Ku tavelavelatane lri suete ku taleke; ku tapepeane lai lrapesai ku bava si lawlau ki ulrive.

²⁵ Kwini ki nitarapiane ka caili, pakatwasaku ku twarededele ku apapawku; ku kane kwini ki laapapawku ku taleke ikai ki umawma, lri cugaku numiane.

²⁶ Lri ikai ku makaalra ku akaneane numi, lri kabucuku numi kalaadeke ku akaneane; lri drengedrengere numi ki Tamatama ka Twaumase numi. Pasiakaiyaku numiane pangimia ku matiasamaimali; kai kawkawluli lri kapalralrawthunga kai kitudrekase.

²⁷ Iseraylri, lukamaninga kwidra lai lri thingale numi aka yakaiyaku numiane; Tamatamaku ka Twaumase numi; kathanaku kadrwa ku drumane. Kai kawkawluli lri kapalralrawthunga kai kitudreadrekase.

Vai ki Tamatama

²⁸ Lukabibilrili, kai Rili lri baadhaku ki tangeea makanaelre, ku lalalake numi lri pelaela ku vagali; ku tarudrawdrange numi lri sipi ku maelaelane; ku yacengecenge numi lri drele ku maburusi.

²⁹ Adravane kai Rili lri baadhaku ki duri si sasiakawlu ka ababai.

³⁰ Lri ikaiyaku belenge lebe padrelane ku pinangu Twaumasane ka puku, yakai ku erai, yakai ku apwi, yakai ku makeceege ku ebelre.

³¹ Kai vai lri kadradrimiti ka kadrwa ku ledra; kai dramare mia ki erai ku duliane. Lu kaiyana kela ku saniange ka matiaukuludru ka vai ki Tamatama, kilakikai patuelre lri ngimianga.

³² Sanaka kiatubi ku nagane ki Tamatama ku umawmase lri tara kipalribulu makanaelre. Mia ku taiyane ki Tamatama: Ikai ki saniange ka lregelrege ikai Yerusalrime lri ikai kudra mwabere ku umawmase; ku pilrili ku umawmase lri tara panianiake.