Yuhani 9 - Ngudradreadrekadhane Ka Sisiu 魯凱語聖經

Pawadringai ki singikalrulai ka mukimukici

¹ Ku Yesu wadrele sa ikai kadalranane ku singikalrulai ka mukimukici.

² Ku lasituini la kivaga iniane, “Sinsi, kikai umawmase singikalrulai kamukici, ngwalai ki pasalrivane ki aneane? Pasalrivaneini, pasalrivane ki marudrawdrangeini?”

³ La tubalre ku Yesu, “Ku takamukicaneini kaika pasalrivaneini kaika pasalrivane ki marudrawdrangeini, lri ikai ki kinawmasaneini putaluvaivai ku puku ki Twaumase.

⁴ Sakavaiyaneana, lri tara piyata ku awngane kudra ki siakawlu nakwane; sana kainganai ku dradrimitane, lri kakadrwanga ku umawmase ku lri dulru kaungu.

⁵ Sa ikaiyaku kai kawmasane, amaniaku ku ledra ki yakawmasane.”

⁶ Sa iyanga kwini kawriva, ku Yesu la sungalrai pucakena, si arakai ku ngalraini thalre ki dae, la drisisi pwa ki maca ki mamukici,

⁷ si iya kai iniane, “Lu mwa Siluame ka baibaiyu si tawmaca.” (“Kiasikawlu” amia ku pacugane kwini Siluame). Kwini lasu la katwase tawmaca, sa kainganainga, la dulrunga drele.

⁸ Kudra lapasiagiagisini si kudra taradredrele iniane lu abababange ku aga la iya kai, “Kikai umawmase kaika amani kwidra taneneane ikai kai si abababange ku aga?”

⁹ Yakai ku amia kai, “Amani kai lasu”; la ikai ku amia kai, “Kaika amani, ai ngiamia iniane.” Kwini lasu la kawriva, “Amaniaku kwini iyaiya numi.”

¹⁰ Kwini lalasu la kivaga, “Watumanesu si drele?”

¹¹ Kwi lasu la tubalre, “Amani kwidra sia Yesu, wathalre ku dae la pwa drisisi ki macali, si iya kai nakwane, ‘Lu mwa ki baibaiyu Siluame tawmaca.’ La katwasaku, sa tawmacaku la cegengaku.”

¹² Kwini lalasu la kivaga, “Kwini umawmase yakainu?” Kwi lasu la tubalre, “Kainaku wathingale.”

Ku swa Palrisai kiavavaga ku takipawdringadhane ki mamukici

¹³ Kwini lalasu la ililuku kwini ki namamukici mwa kikawriva ki swa Palrisai.

¹⁴ Ku Yesu sa thalre ku dae si pacege drele ki macaini kudra vai kwini yai Taisadrasadrane ka vai.

¹⁵ Ku swa Palrisai la peelanga kivavaga kwini ki lasu, luka pangiatumane ku macaini si cegenga. Kwini lasu la pelaela liniane, “Arakai ku nithalreane ka dae sakidri ki macali, sa tawmacaku la maka drelengaku.”

¹⁶ Yakai kudra la swa Palrisai ku amia kai, “Kudra paiya kikai ku umawmase kai lrika twalai ki Twaumase, asi lwiyane kwini lasu kai paluludu ku kakudhane ki Taisadrasadrane ka vai.” Kudra drumane ku laumawmase la iya kai, “Kudra yakai ku pasalrivane ku umawmase ala dulru pia ku miyaiya kai ka pinangu Twaumasane ka puku?” Kwini lalasu la ngwalai kikai si madrikidrikisi ku vaga lini.

¹⁷ Kwini la swa Palrisai la tupela kivavaga kwini ki umawmase, “Kudra pawadringai ki macasu, lu kidremedremesu kwini lasu ngitwatumane ka umawmase?” Kwini lasu la tubalre, “Kwini lasu yuginsia.”

¹⁸ Kwini lamabelenge ki swa Yuda kai masalru ki lasu ka namamukici, laka wacegenga kikai; sa daaulunga ki marudrawdrangeini,

¹⁹ kwini lalasu la kivaga, “Kikai lalake numi? Singika vavalake kamukici kainu ka amia? Kikai ani maka dreelenga?”

²⁰ Ku marudrawdrangeini la tubalre, “Kai lasu lalake nai, sakitulalake mamukiciinga, ka thingalenga nai.

²¹ Ala kikai ku tangimianeini si makadrelenga, ka aneane ku pawadringai ki macaini, kai nai wathingale. Kavai pwacacuganenga, lu mwa kivaga iniane, lani kamani ka twabalre numiane!”

²² Kudra taiyane kwini ki marudrawdrangeini kawriva mwakuludru ki lamabelenge ki swa Yuda; kikwidra kwi lalasu madrekadrekasenga, alaiyasi ikai ku Kirisitu ku Yesu amia kawriva ku umawmase, lri pakatwasenga ki rarubwane ki swa Yuda.

²³ Lakamani ku tubalre ki marudrawdrangeini iya kai, “Ka pwacacuganenga, lu mwa kivaga iniane!”

²⁴ Kwini lalasu la peelanga dawlu kwini ki singika vavalake kamukici, si iya kai iniane, “Tara tukapatengatengana icucubungu ki Twaumase kawriva! Wathingale nai ki Yesu ka yakai ku pasalrivane ka umawmase.”

²⁵ Kwi lasu la tubalre, “Ku yakai, ku kadrwa ku pasalrivane kwini lasu, kainaku wathingale; ai wathingalaku ku taingeane: Namamukicaku, kikai la dulrunga naku drele.”

²⁶ Kwini lalasu la kivaga, “Manemane ku piaini pasikai muswane? Watumane si pacege ki macasu?”

²⁷ Kwini lasu la tubalre, “Peaelaelanga naku numiane, la kai numi ubangalre kilalra. Anu kisanu kilalrana kaiasasane? Mialri numi kidremedreme ku asitu iniane?”

²⁸ Kwini lalasu la tusinalreme kaelaela iniane, “Amanisu ka asitu iniane; situ nai ki Musi.

²⁹ Wathingale nai ku Twaumase kawarivanga ki Musi; ai kwini lasu kai nai wathingale ka twalainu kainganai!”

³⁰ La tubalre kwini lasu, “Ani matisamali. Kwini lasu panwamaca ki macali, la kai numi thingale iniane luka twalainu kainganai!

³¹ Wathingaleta ku Twaumase kai kialalra ku inulri ki yakai ku pasalrivane ku umawmase; kialalra sikakathane kudra ki mwasakene sukubu iniane, si kwidra pangiamia ku kidremedremeini ka umawmase.

³² Twalai satawbekace, kaita kialalrana ku yakai ku pawadringai ku singikalrulai kamukici ku umawmase.

³³ Kwini lasu lu kaika twalai ki Twaumase kainganai, kadrwa ku naika adulrwaneini pia ku manemane.”

³⁴ Kwini lalasu la kaelaela iniane, “Kusu ka maadrau ikai ki pasalrivane, asu bulrubuulrunga naiane!” Kwini lalasu la patwalai ki rarubwane ki swa Yuda pakatwase iniane.

Mamukici pangukai ki takisuswane

³⁵ Ku Yesu kialalra ka pakatwase iniane ki rarubwane ki swa Yuda kwini lalasu. Sakabilrilane ku Yesu la kidringai iniane, si iya kai iniane, “Masalrusu ki Lalake ki Umawmase?”

³⁶ La iya tubalre kwini lasu, “Sinsi, pelaelaili kwini Lalake ki Umawmase lukaaneane la nau kasalru iniane!”

³⁷ Ku Yesu la iya kai tubalre iniane, “Wadrelengasu iniane, kikai kikawrivarivasu ala amani.”

³⁸ Kwini lasu la iya kai, “Tamatama, masalrwaku!” Sa iya la papia ki Yesu guruthungane sukubu.

³⁹ Amia kai ku Yesu, “Ku patharevane ku kelali kai kawmasane yai asaibangane, lai dulru drele ku mamukici; ku wadulru drele, lai ngibaalrelringa kamukici.”

⁴⁰ Kikai vaga sakilalra kudra yakai kwini ku la swa Palrisai, la kirimu kivaga iniane, “La mialrisu paelre naiane tumamukici?”

⁴¹ La tubalre ku Yesu, “Alaiyasi ka mamukici numi, lri kakadrwa ku pasalrivane numi; kwini ‘Wadulru nai drele’ amia numi, luka ngimiyaiya kwini, yakaiyana ku pasalrivane numi.”