Yuhani 7 - Ngudradreadrekadhane Ka Sisiu 魯凱語聖經

Yesu si labetakaneini ka sawvalai

¹ Sangilribatenga, ku Yesu wadadavace salraelre talikai Galrilri, kai mwabangalre italikai Yuda masasawlri, asi lwiyane ku lamabelenge ki swa Yuda pasana papacapacai iniane.

² Lri padalrunga si kainganai kudra Talakangane ka lrisi ki swa Yuda,

³ Lakamani ku lasawvalai ku betakane ki Yesu amia kai iniane, “Lu katwasa kai, la mwa ka Yuda, lani drele kai situsu ku tapianesu ku awngane.

⁴ Kai umawmase nau kimathingathingale lu iya, kai takadradridridrimitane lu twatumane. Kudra wadulrusu pia kilakikai matiasamali, pia paathingalane ikai cucubungu ki yakawmasane!” (

⁵ Ku tangimiamiane kudra labetakaneini mialri kaiyana ka masalru iniane.)

⁶ Ku Yesu la iya kai liniane, “Kaiyana wakela ku vaili; ai kunumi tatumane lu iya numi maduai.

⁷ Kai kawmasane kai lri kalisi numiane, ai maliisi nakwane, asi lwiyane kainaku watelrai putaluvaivai ku tangilisianane ki kakwakudhane lini.

⁸ Lu katwasa ngikakamani tulrisisi, kainaku lri katwase kikai, asi lwiyane kaiyana wakela ku vaili.”

⁹ Sa maka iyanga liniane kikai, ku Yesu la asurwana ikai Galrilri.

Ku Yesu twalrisisi ki Talakangane ka lrisi

¹⁰ Sa katwasenga ku betakane ki Yesu, ku Yesu la mialri udradha kipaelre tulrisisi. Kai pathingale sa katwase, kiabubuli katwase.

¹¹ Ki tatulrisisisiane, ku lamabelenge ki swa Yuda la mwa kidruanga silape ki Yesu, tathingale iya ku taikaiyaneini.

¹² Ikai ki laumawmase la mapelaelaela pangukai iniane, yakai ku amia kai, “Kai lasu mathariri ka umawmase”; yakai ku amia kai, “Ini, kai lasu pwatatata ki laumawmase.”

¹³ Ai ku laumawmase mwakuludru putaluvaivai mapelaela pangukai iniane, asi lwiyane kwi lalasu makiwcu ki lamabelenge ki swa Yuda.

¹⁴ Kwi tatulrisisisiane sa apararamawnga ku tangilribatane, ku Yesu wamwa ki daane ki Twaumase si bulru ki umawmase.

¹⁵ Ku lamabelenge ki swa Yuda la kasamali turamuru, si iya kai, “Kikai umawmase kai, kadrwa ku tupapalraini ku sinsi si kibulru, ani dulru ikai kai lrigilaneini turamuru?”

¹⁶ La iya kai ku Yesu, “Kai bulrubulruli, kaika nakwane, twalai kwidra ki amani ka siakawlu nakwane.

¹⁷ Ku tangea ka umawmase lwiyasi lri kalrithethe pangimia ku kidremedreme ki Twaumase, lri thingale kai bulrubulruli luka takidremedremane ki Twaumase, luka ngiasasingikaiyaku kawriva.

¹⁸ Kudra ngiasasingikai kawriva, kiadremedremedreme ku lriguini; ai kwidra kiasilasilape ku lrigu ki amani ku siakawlu iniane, ala amani ku patengane ka kadrwa ku draedrangelrane.

¹⁹ Ku Musi kaika wabaai numiane ku hulrice? Ai kadrwa ku paluludu numiane ku natangeanga. Anu kirimu kisanu papacapacai nakwane?”

²⁰ Ku laumawmase la tubalre, “Kiaikaisu ki aidridringane, aneane ku kiasanu papacapacai muswane?”

²¹ La tubalre ku Yesu, “Lu ikaiyaku ki Taisadrasadrane ka vai, pia ku maadrau ka awngane, matiasamali amia numi makanaelre.

²² Ai ku Musi kigelregelra tulrisi amia numiane pelaelaela (ku patengatengane ku kiagelregelre ka lrisi kaika twalai ki Musi, twalai ki cucungulane numi pathagili), la ikai numi ki Taisadrasadrane ka vai gelregelre tulrisi ki daini.

²³ Alaiyasi kigelregelre tulrisi ikai ki Taisadrasadrane ka vai ku umawmase, ku tangadrane ka pasiakai ki hulrice ki Musi, lu mia kwini, lu ikaiyaku ki Taisadrasadrane ka vai pawdringai ki umawmase, anu kirimu kaelaela nakwane?

²⁴ Madha singikai ku tadrelane ngubebelenge ki umawmase si mathariri malisi iya, sitangadrana si lekete ki madringelrese ala mathariri malisi iya pacengeecenge.”

Amaniaini kai lasu ku Kirisitu?

²⁵ Yakai kudra la swa Yerusalrime ku amia kai, “Kikai umawmase kai, kaika amani kwidra apapacadhane ki lamabelengeta?

²⁶ Drela, ka lasu mwataluvaivai si kawrivariva, laka kadrwa ku wabaebalre iniane! Kwini lalasu laka tengatengane ka wathingale iniane ala ka Kirisitu?

²⁷ Ai lu utaluvaivainga kai Kirisitu, kadrwa ku wathingale ka twalai inu kainganai kai lasu, ai ku tatwaladhane kai ki lasu wathingaleta turamuru.”

²⁸ Sakamani kudra, ku Yesu yakai ki daane ki Twaumase bulrubulru ki umawmase, la akwadrau iya kai, “Tengatengane numi ka wathingale nakwane, ka twalainwaku kainganai? Kai kelali, kainaku ka ngiasasingikai. Kudra amani ka siakawlu nakwane patengatengane. Kai numi wathingale iniane,

²⁹ ai wathingalaku iniane; asi lwiyane twaladhaku iniane kainganai, ka amani ku siakawlu nakwane.”

³⁰ Kwini lalasu la kisanu pwalra iniane, ai kadrwa ku umawmase ku pwalrima, asi lwiyane kaiyana wadaruru ku vaini.

³¹ Ikai kwini ki laumawmase mialri takaalra ku masalru iniane; kwini lalasu amia kai, “Lu kainganai ku Kirisitu si pia ku pinangu Twaumasane ka puku lrika makakalra kai ki lasu?”

Ku tarakadrekadrenge pwalra ki Yesu

³² Ku swa Palrisai kialalra sa makawrivarivariva pangukai ki Yesu, kai lalasu si marudrange ki barakalai la sikawlu ki tarakadrekadrenge katwase pwalra ki Yesu.

³³ Ku Yesu la iya kai, “Yakaiyana kai zikange, kai aikaiyaneli taelre numiane, ala lri katwasaku siwlri mwa kudra ki taikaiyane kudra ki siakawlu nakwane.

³⁴ Lri silape numi nakwane, ai kai numi lri maka kidringai; asi lwiyane kudra lrika amwaneli, kai numi lri maka mwa.”

³⁵ Kwini lamabelenge ki swa Yuda la makivagavaga, “Kai lasu pasana mwamwa inu, ku lri kaika amaka kidringadhaneta? Bekace katwase mwa cekele Gurike ki la swa Yuda, si bulru ki swa Gurike?

³⁶ Kudra iyaini kai, ‘Lri silape numi nakwane, ai kai numi lri maka kidringai’ si ‘Kudra amwaneli, lri kai numi dulru mwa’, manemane ku pacugane kwi taiyane kwini?”

Panianianiake ku acilai ka vaalru

³⁷ Sakabibiilrilinga ka vai ku tatulrisisisiane laka matipeaperawnga, ku Yesu acegecege, si akwadrau pelaela iya kai, “Lu kakadhame ku umawmase, bwala mwaili kai ungulu.

³⁸ Amia kikai kai Sisiu, ‘Kudra masalru nakwane ku umawmase yakai ku vaalru ka panianianiake ka acilai, lri twalai ki kidremedremeini berai mwalwaludru.’ ”

³⁹ Ku taiyane kikai ki Yesu papia kwidra ki masalru iniane ku umawmase kudra lrika atarumarane ku Siri. Sakamani kwidra ku Siri kaiyana mwalebe, asi lwiyane ku Yesu kaiyana wamalra ku lrigu.

Ku laumawmase ngwalai ki Yesu karivu

⁴⁰ Ikai kwini ki laumawmase takaalra ku kialalra kikai vaga, si iya kai, “Kikai umawmase tengane ka amani kwidra yuginsia!”

⁴¹ La ikai kwidra amia kai, “Kai lasu Kirisitu.” La ikai ku drumane ku amia kai, “Ku Kirisitu ala kirimu twalai ka Galrilri!

⁴² Asi lwiyane kai Sisiu wapacase, ku Kirisitu yai mwabaibalrithi ki Davidi, lri kitulalake ikai cekele ki Davidi kavai Bithelrihime.”

⁴³ Ku laumawmase la ngwalai iniane si karivu.

⁴⁴ Yakai ku la kiasanu pwalra iniane, ai kadrwa ku umawmase ku pwalrima.

Ku lamabelenge ki swa Yuda kai masalru ki Yesu

⁴⁵ Ku latarakadrekadrenge matwase kikawriva ki marudrange ki barakalai si swa Palrisai; kwini lalasu la kivaga ki tarakadrekadrenge, “Anu kai iluku ki Yesu kela kai?”

⁴⁶ Kwini tarakadrekadrenge la tubalre, “Kadrwana ku umawmase ku miyaiya iniane lu kawriva!”

⁴⁷ Kai swa Palrisai la iya kai, “Mialri numi ka kiatupupuici?

⁴⁸ Kai lamabelengeta si swa Palrisai yakai ku masalru iniane?

⁴⁹ Kilakikai kai pwalringalringau ku hulrice ki Musi ka takukulrungu ka laumawmase yai, lri kipusu!”

⁵⁰ Ikai liniane yakai ku Nikudimu; kai lasu nawamwanga kikawriva ki Yesu. La pakipapawlringau liniane,

⁵¹ “Ku hulriceta palraingi lu kaidu kilalrana ku tangipapelaelaneini lu kaidu dreleana ku tangimiamiane si tupasalrivane ki umawmase?”

⁵² Kwini lalasu la iya kai, “Mialrisu ka swa Galrilri? Lu drela ki Sisiu, la thingale kadrwana ku twalai Galrilri ku yuginsia.”