Yuhani 6 - Ngudradreadrekadhane Ka Sisiu 魯凱語聖經

Pakabucuku ki ta 5,000 ka umawmase

¹ Kaiana tarathainu ku tangilribatane, ku Yesu ngwavarukuru ubila ki baiyu Galrilri (la si Tibiria ka baiyu).

² La tathathatha ku laumawmase ku twapapalra iniane, asi lwiyane kwini lalasu wadrele ki Yesu sa pawdringai ki macaeme.

³ Ku Yesu wamwa lregelrege, la taelre ki lasituini nene ikai kwini.

⁴ Kudra yai lri padalrunga si daruru ki Takilragavane ka lrisi ki swa Yuda.

⁵ Ku Yesu la paswabelenge, si drele ki laumawmase sakelakela mucucubungu iniane, la iya kai ki Pilripi, “Lri muinuta langai ku akaneane, si pakane pakabucuku kai ki laumawmase?”

⁶ Ku taiyaneini kikai kawriva kialrialringau ki Pilripi; ngiathathingalenga ku lrika apangimiane.

⁷ Ku Pilripi la tubalre, “Adravane arakaiyane ku 200 ka gingi langai ku pange, kai lri makakelrete adravane pingitatiiki kane kai laumawmase.”

⁸ Ku tangea ka situ, amani ku agi ki Simune Pitiru ka Anederiu, mwacucubungu si kawriva,

⁹ “Kawvai vavalake wailuku kai lrima ka pange ka mugi si drusa ka kange, ai lri tumane pawkesa apavalavala ki tatha kai ka umawmase?”

¹⁰ Ku Yesu la pelaela liniane, “Panenea ki laumawmase.” (Kwini taikaiyane yai ububulane.) La nene makanaelre, ku sawvalai sikakathane, elreelre lri ikai ku ta 5,000.

¹¹ Ku Yesu la malra ku pange, si kiaseasene, ala apavalavala ki wanene ki laumawmase, ku kange lamialri pia kai apavalavala; la ngisasingikaai ku tadulrwane lini kane makanaelre.

¹² Sa kanenga kabucukunga makanaelre, ku Yesu la pelaela ki lasitu, “Malra sarubu kwini tedrane ka lapapithipithingane, madha pasawlrawlra.”

¹³ Kwi lalasu la malra sarubu kwini tedrane ki lrima ka pange, amani kwidra la tedrane ki laumawmase, wamalra sarubu, la pasuete ki aku 12 ki karadrare.

¹⁴ Ku laumawmase wadrele ku pia ki Yesu ku pinangu Twaumasane ka puku, si iya kai, “Kikai umawmase lri tara kamaani kudra lri mukawmasane ka yuginsia!”

¹⁵ Ku Yesu wathingale liniane ka lri ruthuku iniane, si lri vuutha paatalialalai, la katwase tarungeangeea kiwlrau mulregelrege.

Ngwababelenge ki acilai dadavace

¹⁶ Saka miauawbu, ku situ ki Yesu la kainganai mwa babiabila ki baiyu,

¹⁷ la ubelenge ki varukuru, si papia balrealreanane kavai Kaperenawme. La kadradrimitinga, ku Yesu la kaina kainganai mwa liniane.

¹⁸ Ala kiriimu pangicaeme valrigi, si mababikabiki.

¹⁹ Ku lasitu la kisamula kadrau ki acilai, ikai kau lrima kau eneme ka kunlri ku takatwasane adili, la drele ki Yesu ngubabelebelenge ki acilai kaingananganai papia ki varukuru lini, la kirimu kakiwcu turamuru.

²⁰ Ku Yesu la iya kai liniane, “Amaniaku, madha ukuludru!”

²¹ Kwi lalasu la arake iniane pubelenge ki varukuru; la makakaai daruru ki amwane lini kwini Kaperenawme.

Ku laumawmase wasilape ki Yesu

²² Sakakaiyane, kudra asuru ikai babiabila ki baiyu ku laumawmase wadrele ikai kwini ku vaeva ku tikiyane ka varukuru; kai lalasu wathingale ki Yesu ala ka kai maredele ki lasitu mubelenge ki varukuru, ngiakakatuase ku lasitu.

²³ Yakai ku luka piya ku twalai Tibiria ku tatiitiki ku lavarukuru ku yasadra ikai babiabila, amani kwidra yadethe ki takiaseasenane ki Tamatama si apavalavala baai ki laumawmase pakane ku pange.

²⁴ Kikai laumawmase sa thingale ala ka kai yakai kwini ku Yesu si lasitu, la ubelenge ki varukuru si papia Kaperenawme silape iniane.

Ku Yesu taleke ki niake

²⁵ Kwi lalasu la ikai balrealreanane ki baiyu kidringai ki Yesu, si kivaga iniane, “Sinsi, wakelasu kwigane kai?”

²⁶ Ku Yesu la tubalre, “Nau kapatengatengane kawriva, kai silape numi nakwane, kaika ngwalai ku tadrelane numi ki pinangu Twaumasane ka puku, ngwalai sa kane numi ku pange si kabucuku.

²⁷ Madha ngwalalai kudra lri tara kaburau ka akaneane kwalri, ngwaladha kwidra lri kainganai ki apalralrawthane panianiake ka taleke kisamula. Kikai taleke amani ku lrika abaadhane ki Lalake ki Umawmase numiane, asi lwiyane ku Tama ka Twaumase patwathingalenga pikai ki kinawmasane ki Lalake ki Umawmase.”

²⁸ Kwi lalasu la kivaga, “Lri pia nai ku manemane ala ka amani ku paiyanga ku awngane ki Twaumase?”

²⁹ Ku Yesu la tubalre, “Kasalrwa kudra ki sikawluini, amani kikai kudra ani pia ku awnganeli iya ki Twaumase numiane.”

³⁰ Kwini lalasu la iya kai, “Laka manemane ku thingalesu pia ku pinangu Twaumasane ka puku, lai lri drele nai si kasalru muswane? Maneemanelringa ku awnganesu?

³¹ Ku cucungulane nai yakai calragulragu kane ku mana, mararaamau ku taiyane ki Sisiu, ‘Ku Twaumase patwalai belenge baai ku taleke si pakane liniane.’ ”

³² Ku Yesu amia kai, “Lri tukucingalraku pelaela numiane, ku Musi kai wabaai numiane ku twalai belenge ku taleke; ku twalai belenge ka patengane ka taleke amani ku Ama ka wabaai numiane.

³³ Asi lwiyane ku patarumara ki Twaumase ku taleke amani kwidra patwalai belenge pulebe, si baai ki yakawmasane ku niake.”

³⁴ Kwini lalasu la iya kai, “Tamatama, ala bababaadha naiane kikai taleke!”

³⁵ Ku Yesu la iya kai liniane, “Amaniaku ku taleke ki niake. Ku wakela nakwane kai, kai lri kasilrawnga palralrawthu; ku masalru nakwane, kai lri kakadhamenga palralrawthu.

³⁶ Ai amianga naku numiane, wadrelenga numi nakwane, la kai numi kasalrwana.

³⁷ Sanaka baai ki Ama ku umawmase nakwane lri kainganai mwa nakwane kikai makanaelre. Ku wakela nakwane kai, lri kainaku pasiwlri iniane lutuumane;

³⁸ Asi lwiyane ku twalaili belenge kainganai, kainaku ka ngiasasingikai pia ku awngane, pangiamiaku ku kidremedreme kwidra ki siakawlu nakwane.

³⁹ Ku kidremedreme kwidra ki siakawlu nakwane yai, kudra baaini nakwane ku umawmase, anika kadrwa ku natangeanga ku mwacilri, si luka taalikaiyanenga ki vai lai pasielane liniane amia.

⁴⁰ Asi lwiyane ku takidremedremane ki Tama yai lri patarumara ku palralrawthu ku niake kwidra ki wadrele ki Lalake si kasalru ku umawmase; ikai ki apalikaiyane ki vai, lri pasielaku papanianiake liniane.”

⁴¹ Ku swa Yuda amani sa iya kai ku Yesu, “Amaniaku kwidra twalai belenge si mulebe ka taleke”, la kirimu matetenge madrekadrekase,

⁴² “Kikai umawmase kaika amaani kwidra lalake ki Yusepe ka sia Yesu? Wathingaleta ki marudrawdrangeini. Kaiasasane la maka thuru twaladhaku belenge si mulebe iya!”

⁴³ Ku Yesu la iya kai: “Madha matetenge madrekadrekase.

⁴⁴ Ana kaika amani kudra siakawlu nakwane ka Ama ka kiamurikai ki umawmase, kadrwa ku umawmase ku lri dulru kainganai nakwane kai; ku wakela nakwane kai, ikai ki taalikaiyane ki vai lri pasielanaku iniane.

⁴⁵ Ku tapacasane ki yuginsia amia kai, ‘Kai umawmase lri kibulru ki Twaumase makanaelre.’ Sanaka kialalra paluludu ki Ama si tarumara ku sabulrwaneini, lri kainganai nakwane kai makanaelre.

⁴⁶ Kikai kaika amia kai, yakai ku aneane ku wadrelenga ki Tama, kathane kudra amani ku twalai ki Twaumase kainganai ka wadrelenga ki Tama.

⁴⁷ Nau pudriadringai pelaela numiane, ku masalru ku umawmase lri ikai ku palralrawthu ku niake.

⁴⁸ Amaniaku ku taleke ki niake.

⁴⁹ Ku cucungulane numi wakane ku mana ikai calragulragu, lamialri pacai;

⁵⁰ ai kudra twalai belenge si mulebe ka taleke lu kane ku umawmase kai lri pacainga.

⁵¹ Amaniaku ku twalai belenge mulebe si baai ku taleke ki niake; ku wakane kikai taleke ku umawmase lri palralrawthunga kai pacai. Ku lrika abaadhaneli ki umawmase ku taleke amani kai beateli, ka patarwamara pakai ku amalrane ku niake ki umawmase.”

⁵² Ki kikai vaga ikai ki swa Yuda pakialringau madrikidrikisi. Kwi lalasu amia kai, “Ki kikai umawmase lri tumane dulru pakane mitane ku beateini?”

⁵³ Ku Yesu amia kai liniane, “Lri pudriadriingadhaku pelaela numiane, alaiyasi kai numi kane ku beate ki Lalake ki Umawmase, ungulu ku eraini, lri kakadrwa ku patengane ka niake numiane.

⁵⁴ Ku wakane ku beateli, waungulu ku eraili, lri ikai ku palralrawthu ka niake; ikai ki taalikaiyane ki vai lri pasielanaku iniane.

⁵⁵ Kai beateli patengane ka akaneane, kai eraili patengane ka awngulane.

⁵⁶ Kudra wakane ki beateli, waungulu ku eraili, taikaiyane ki niakeli adringi, la mialriaku ikai adringi ki niakeini.

⁵⁷ Palralrawthu ka Tama siakawlu nakwane, la mialriaku ngwaladhaku iniane panianiake. Lamialri, ku wakane ku beateli ku umawmase lri ngwalai nakwane si panianiake.

⁵⁸ Amani kikai ku twalai belenge mulebe ka taleke; kudra wakane kikai taleke, lri palralrawthunga panianiake. Kikai taleke kai mararamau kudra kanenga ki cucungulane numi, kwi lalasu wakane, lamialri pacai.”

⁵⁹ Kilakikai vaga, iya ki Yesu sa ikai Kaperenawme ki rarubwane ki swa Yuda ki swa Yuda bulrubulru ki umawmase.

Apalralrawthu panianiake ka vaga

⁶⁰ Takaala ku lasitu ku kialalra ki kikai lavaga, la iya kai, “Makucingalrenga kikai sabulrwane, aneane ku lri maka kilalra pucalringane?”

⁶¹ Ku Yesu wathingale ki lasituini sa matetetenge madrekadrekase ki kikai, la iya kai liniane, “Kikai vaga kai walrudralrudrai ki salrwane numi?

⁶² Alaiyasi drele numi ki Lalake ki Umawmase lu ubelenge siwlri mwa ki nataikaiyaneini, laika ngitwatumanenga numi?

⁶³ Ku wabaai ku niake ki umawmase yai Siri, kai beate kadrwa ku paluludane; kai pelaelali numiane ki kikai vaga amani ku wabaai ku niake ka Siri.

⁶⁴ Ai, ikai numiane yakai kwi kai masalru.” (Ku Yesu wathingalenga ku aneane ku kaika masalru, ku lri kilangai iniane.)

⁶⁵ La iyana kai, “Ngwalai kikai, amianga naku numiane, ana kai twalai ki Ama ku migemi, kadrwa ku umawmase ku lri dulru mwa nakwane kai.”

⁶⁶ Twalai kai, kudra twapapalra iniane ku umawmase takaalra ku matwase siwlri, si kai tupapalranga iniane.

⁶⁷ Ku Yesu la kivaga ki ta 12 ka lasituini, “Kunumi? Lai mialri numi katwase?”

⁶⁸ Ku Simune Pitiru la tubalre, “Tamatama, yakai muswane ku apalralrawthane panianiake ka vaga, aneaneana ku lri ka atupapalrane nai?

⁶⁹ Masalru nai, si la thingale nai muswane ka twalaisu ki Twaumase kainganai ka sanianiyangenga.”

⁷⁰ Ku Yesu la iya kai, “Kainaku ka wapilringa numiane ka ta 12 ka umawmase? Ai ikai numiane yakai kwi tangea kwi aidridringane!”

⁷¹ Ku taiyane kwini ki Yesu amanimani ki Yuda ka lalake ki Simune ka swa Isekaliwte. Kai Yuda yakai ki ta 12 ka lasitu, amani kwidra kialangai iniane sakabilrilane.