Yuhani 5 - Ngudradreadrekadhane Ka Sisiu 魯凱語聖經

Yakai baibaiyu Bithezatha pawdringai ki macaeme

¹ Sangilribatenga kwidra, yacengecenge ka tatulrisisisiane ki swa Yuda, ku Yesu la udradha mu Yerusalrime.

² Ikai Yerusalrime, deethe ki Kiu ka lrawlrawdru la ikai ku baibaiyu, arakai ku vaga ki swa Hiburu sia Bithezatha, kwi babiabila ki baibaiyu laka talulrimale ku ruka.

³ Ikai ruka swaete apece ku lamacaeme, yakai ku mamukici ku mapiapilai ku drapale, ku malrunai.

⁵ Ikai kwini yakai ku tangea ku macaeme tara 38 ka caili.

⁶ Ku Yesu la drele saapece kwini lasu, si la thingale ka macaeme kawlainga ka caili, la kivaga iniane, “Apia kipawdringaisu?”

⁷ Kwini macaeme la tubalre, “Sinsi, lu ngivelevele kai acilai, kadrwa ku paralubu nakwane, pulebe mwa ki baibaiyu, lu nau mwanga iyaku, yakainga ku aswala nakwane mulebe.”

⁸ Ku Yesu la iya kai iniane, “Ngidrakala, la malra kwini sapasu si katwase!”

⁹ Kwini umawmase la makakai udringai, la malra kwini sapaini si katwase. Sakavai kwini yacengecenge ka Taisadrasadrane ka vai,

¹⁰ ngwalai kwini, ku lamabelenge ki swa Yuda la iya kai kwini ki kiapawdringai, “Kaikameane yai Taisadrasadrane ka vai, kaika kakudhane kai malrasu kai tapeapecanesu.”

¹¹ Kwi lasu la iya kai, “Kwidra pawadringai nakwane peaelaela nakwane, ‘Malra kai sapasu si katwase’ iya!”

¹² Kwi lalasu la kivaga, “Aneane kwini kawariva muswane malra kai sapasu si katwasa iya?”

¹³ Ai kwini kiapawdringai kai wathingale ka aneane, asi lwiyane ikai kwini takaalra turamuru ku laumawmase, ku Yesu la katwaseenga.

¹⁴ Sangilribatenga, ku Yesu yakai ki daane ki Twaumase kidringai iniane, la iya kai iniane, “Mwadringaingasu, madha pasalrisalriwnga pela, amani lu kipadradreesengengasu ku madradrau ku amatikurwane.”

¹⁵ Kwini umawmase sa katwasenga, la pelaela ki lamabelenge ki swa Yuda, Yesu ka pawadringai nakwane iya.

¹⁶ Twalainga kai, ku swa Yuda twalainga tulilisi ki Yesu, asi lwiyane yakai ki Taisadrasadrane ka vai pawdringai ki macaeme.

¹⁷ Ku Yesu la iya kai liniane, “Ku Ama mawaungu, la mialriaku kawaungu.”

¹⁸ Kikai vaga kai, ku lamabelenge ki swa Yuda la aru kalritheethe ku kidremedreme lini ku apapacadhane iniane, asi lwiyane pangialisiane ku tinukakudhanane pangukai ki Taisadrasadrane ka vai, si la ngitatu Tamaini ki Twaumase, ngiapakiraramau ki Twaumase.

Puku ki Lalake

¹⁹ La pacuungulu, ku Yesu amia kai liniane, “Lri pudriadriingadhaku pelaela numiane, ku Lalake lu ngisasingikai kadrwa ku atumananeini ku manemane; wadrele ku tapiane ki Tamaini, ala pia ku manemane. Ku tapiane ki Tama, paiya ku Lalake.

²⁰ Ku Tama kialibake ki Lalake, la pelaela ku piapiaini ki Lalake. Lri malra ku silrialribate kikai ku awngane si pelaela ki Lalake; ani kasamali iya numiane.

²¹ Ku tapiane ki Tama pasielane papanianiake ki wapacainga ka umawmase, si patarumara ku niake liniane; lri mialri, ku Lalake ngisasingikai ki kidremedremeini baai ku niake ki umawmase.

²² Ku Tama kai lri ngikakamani ku wasaibange ki umawmase; ku asaibangane ku puku wabaai ki Lalake,

²³ Ngwalai ku ausakenane ki laumawmase ki Lalake, mia lu usakene ki Tama. Kudra kai mwasakene ki Lalake, amani ku kai mwasakene ki siakawlu iniane ka Tama.

²⁴ “Pwadriadriingadhaku pelaela numiane, ku kialalra kai vagali, la kasalru kudra ki amani ku siakawlu nakwane, lri ikai ku palralrawthu ka niake. Kai lri kitupasalrivane, amaninga kudra matwasenga ki apacadhane si mwa ki apanianiakane.

²⁵ Lri pwadriadriingadhaku pelaela numiane, lri kelanga kudra vai, amaninga kikai, ku wapacainga ku umawmase lri kilalra ku lingau ki Lalake ki Twaumase; kudra kialalra, lri siwlri panianiake makanaelre.

²⁶ Mararaamau ki Ama ka amani ku tatwaladhane ki niake, la mialri pangimia ki lalakeini atatwaladhane ki niake.

²⁷ La baai ki Lalake ku puku ku asaibangane, amani saka Lalake ki Umawmase.

²⁸ Kunumi madha ngwalalai kikai si kasamali; asi lwiyane lri kelanga kudra vai, ku yadringi tadralredralrekane ku umawmase lri kilalra makanaelre ku lingauini,

²⁹ si lai twalai tadralredralrekane kainganai; ku paiya ku mathariri ku kakudhane, lri sielane si malra ku niake; ku paiyaiya ku ngialisiane ku kakudhane, lri siela si kitupasalrivane.”

Pasiakai ki Yesu akasi

³⁰ “Lu ngisasingikaiyaku kadrwa ku adulrwaneli pia ku manemane; singiakaiyaku ku kidremedreme ki Twaumase kainganai saibange, ku sasaibanganeli laka aparamaramau; asi lwiyane kainaku wasilape ku urikaili, kathane ku apangimianeli ku kidremedreme kwidra ki siakawlu nakwane.

³¹ “Alaiyasi ngipapasikaiyaku akasi, kudra taiyaneli kaika adulrwane kipawtenga.

³² Ai, yakai kudra tangea ku lri pasikai nakwane akasi, wathingalaku kudra tapasikaiyane nakwane akasi yai patengane.

³³ Nasiakawlu numi ki umawmase katwase kikawriva ki Yuhani, la kilalranga numi ku sarakaiyaneini akasi ku patengane ka sabulrwane.

³⁴ Ku patengatengane, kainaku mwarikai ku akasi ki umawmase; lu iyaku kai kawriva, pakaiyaku ku akipalribulane numi.

³⁵ Ku Yuhani maru nipadaladhane ka tinaki, la palraingi numi padaalru kisupilri ku ledraini.

³⁶ Ai lri dulrwaku putaluvaivai padrele ku takasapupukwananeli ki Yuhani, amani kai awnganeli, ka patarumara ki Ama ka atulrepenganeli ka awngane. Kikai awngane lri dulru pelaela ala ka Ama ku siakawlu nakwane.

³⁷ Kudra siakawlu pakela nakwane ka Ama mialri pasikai nakwane akasi. Kainu kialalrana ku lingauini, la kai numi dreleana ku lringauini,

³⁸ la kai numi pikidremedreme ku vagaini, asi lwiyane kainu masalru kudra ki sikawluini.

³⁹ Lu silrilrigu numi kai Sisiu, lri dulru patwalai adringi kidringai ku palralrawthu ka niake amia numi; ai ku patengatengane kai vaga ki Sisiu amani ku waakasi nakwane!

⁴⁰ Ai, kai numi mwabangalre mwa nakwane kisilape ku niake.

⁴¹ “Kainaku mwarikai ku adrengedrengerane nakwane ki umawmase.

⁴² Ai patakwalringaunga naku drele numiane, kadrwa ku kilibakane ki Twaumase kwi kidremedreme numi.

⁴³ Pangwakaiyaku ku nagane ki Ama kainganai, la kai numi tarumara nakwane; ai lu ikai ku pangwakai ku naganeini kainganai, tarwamaaralringa numi iniane.

⁴⁴ Madalame numi madrengedrengedrengere, la kai numi kisilape patwalai ki vaeva ka Twaumase ku akidrengedrengerane, lukamiyaiya kai, lri tumane numi dulru kasalru?

⁴⁵ Lri pelaela ku pasalrivane numi madha iyaiya nakwane icucubungu ki Ama; ku lri pelaela ku pasalrivane numi, amani kudra sidramadrama numi ka Musi.

⁴⁶ Alaiyasi ka patengane numi kasalru ki Musi, lri kasalru numi nakwane, asi lwiyane piakai ki tapacasaneini pacase ku kakudhaneli.

⁴⁷ Kudra kai numi masalru ku pacaseini, lai tumane numi dulru kasalru kai vagali?”