Yuhani 3 - Ngudradreadrekadhane Ka Sisiu 魯凱語聖經

Yesu si Nikudimu

¹ Yakai ku tangea ku swa Palrisai, ku naganeini sia Nikudimu, amani ku mabelenge ki swa Yuda.

² Kai lasu kaiyanganai kikawriva ki Yesu sakamaungu, si iya kai, “Sinsi, wathingale nai ka twalaisu ki Twaumase kainganai ka tarabulrubulru. Ku piasu ku pinangu Twaumasane ka puku, ana kai ikai ku Twaumase tapalra, kadrwa ku umawmase ku lri dulru pia.”

³ Ku Yesu la tubalre iya kai, “Lri pudriadringadhaku pelaela muswane, kai umawmase lu kai tupela kitulalake, kai lri dulru drele ku autaluvaivadhane ku kuni ki Twaumase.”

⁴ Ku Nikudimu la kivaga, “Kudra pasuludrunga ku umawmase watumane dulrunga pela kitulalake? Lri dulru nguselana ubarangane ki tina si pela kitulalake?”

⁵ Ku Yesu la tubalre, “Lri pudriadringadhaku pelaela muswane, kai umawmase lu kaika twalai ki acilai si Siri kitulalake, kai lri maka aumawmase ikai ki kuni ki Twaumase.

⁶ Kai kinawmasane ki umawmase twalai ki tama si tina kitulalake, ku abakeini laka twalai ki Siri kitulalake.

⁷ Madha ngwalalai ku taiyaneli, ‘Lri tara pelasu kitulalake’ iya si kasamali.

⁸ Kai valrigi ngiasasingikai kasasevere, kialalrasu ku lingauini, ai kaisu wathingale luka twalai inu, lu lri papia inu. Sanaka twalai ki Siri kitulalake, laka miyaiya kwini.” La iya tubalre.

⁹ Ku Nikudimu la kivaga, “Ala duulru ikai ku miyaiya kikai?”

¹⁰ Ku Yesu la tubalre, “Tara bulrubulrusu ki swa Iseraylri, adravane ki kikai kaisu wathiingale?

¹¹ Nau pudriadringai pelaela muswane, peaelaelaela nai ku tathingalane nai, kudra drelenga nai, ai kai numi maka mwabangalre tarumara kai pelaelaela nai.

¹² Lu pelaelaku numiane kai ngwakai ki kawmasane, kai numi maka masalru, lu pelaelaku numiane ku ngwakai subelebelenge, lai maka kasalru numi?

¹³ Kathaane ku twalai belenge si ulebe ka Lalake ki Umawmase, kadrwana ku umawmase ku wamwa ka subelebelenge.”

¹⁴ Mararaamau ki Musi sa iubulane si cidingi ku lriwlu ka sulrau, kai Lalake ki Umawmase lai lri miya tara ki cidingi,

¹⁵ pakai ki amalrane ku palralrawthu ka niake makanaelre ku masalru iniane ka umawmase.

¹⁶ Ku Twaumase mathalrai turamuru ki yakawmasane ka laumawmase, pakeela kudra patarwamara pulebe ki beraberathane ka Lalakeini, pakai kudra ki sanaka masalru iniane ku umawmase ku kaika akamudane, lri tarumaaralringa ku palralrawthu ka niake.

¹⁷ Asi lwiyane ku tapakainganadhane ki Twaumase ki Lalakeini mukawmasane, kaika lri tupasalrivane ki yakawmasane, lri pangukai iniane si palribulu ki yakawmasane.

¹⁸ Ku masalru ki Lalake ku umawmase kai lri kitupasalrivane, ku kai masalru ku umawmase kiatupasalrivanenga, asi lwiyane kai masalru ki beraberathane ka Lalake ki Twaumase.

¹⁹ Kai ledra wakela kawmasane, kai yakawmasane la ngwalai ki ngilisianane ku kakudhane, la kadalame ki dradrimitane si kai kadalame ki ledra, yakai kikai ku ngwalai lini si kitupasalrivane.

²⁰ Ku paiyaiya ku ngialisiane, malrase ki ledra makanaelre, si la kai kidethe ki ledra, asi lwiyane mwakuludru ku lri kiputaluvaivai ku ngilisianane ku kakudhaneini.

²¹ Ai, kudra singiakai ki patengane ka sabulrwane twatumane, ngwadadeethe ki ledra, pakai ku apathingalane ku piapiaini patuelre paiya ka singikai ku kidremedreme ki Twaumase.

Yesu si Yuhani

²² Sangilribatenga kikai, ku Yesu si lasituini wamwa talikai kwini ki swa Yuda. La ikai kwini taelre liniane ku nimakapialane, si pabanau.

²³ Ku Yuhani la mialri ikai Ainungu kwini wadeethe Salrime pabanabanau, amani sa kadrau ku acilai kwini, ku laumawmase wamwa makanaelre si kipabanau.

²⁴ (Sakamani kwidra ku Yuhani kaiyana kiaemenge.)

²⁵ Ku lasitu ki Yuhani si tangea ka swa Yuda amanimani kudra pangwakai ki kiapakabula ka lrisi si madradrikidrikisi ku vaga lini.

²⁶ Kwini lalasu la katwase kikawriva ki Yuhani, si iya kai iniane, “Sinsi, drela, ku paswalala kudra palrasu ikai balrealreanane ka kadravane Yuredange, ka amani kudra akasikasisu pasikai iniane, mialri pabanabanaunga kaiasasane, la mwamwanga silasilape iniane makanaelre!”

²⁷ Ku Yuhani la iya kai, “Lu kaika Twaumase ka patarwamara, kadrwa ku adulrwane ki umawmase tarumara malra ku manemanenga.

²⁸ Amianga naaku, kainaku ka Kirisitu, nisikawlanaku aswalala iniane sikakathane. Kikai vaga lri dulru numi pasikai nakwane akasi kikai.

²⁹ Ku lri sitaelrelre kwini ki marudrarudrange ka ababai amani kwini marudrarudrange ka sawvalai; ku talragi ki marudrarudrange ka sawvalai acegecege ikai thili si kilalalalra, sa kilalra ka lingau ki marudrarudrange ka sawvalai la kiraraagai. Laka thadaalrane, wamalranga naku ku kiatulrepenge ka akiragadhane.

³⁰ Kwini lasu lri tara aru kadrau ngiradhekane, kunaku lalri tara aru alebe katikiane.”

Kwini tangea ka twalai belenge kainganai

³¹ Kudra twalai belenge si kainganai amani kudra silrialribatenga sanaka maneemane; kudra twalai ki lebe kainganai ka swakai kai lebe, ku takawrivaneini laka ngwakai kai ki swa lebe. Kudra twalai belenge kainganai, amani kudra silrialribatenga sanaka maneemane.

³² Kai lasu pasiakai pelaela kudra dreleini kilalraini, ai kadrwa ku tarwamara ku pelaelaini.

³³ Kudra tarwamara ku akasini, peaelaelanga ku Twaumase amani ku patengatengane.

³⁴ Kudra sikawlu ki Twaumase kwini lasu peaelaelaela ku vaga ki Twaumase, asi lwiyane ku Twaumase wabaai iniane ku Siri ka kadrwa ku tapalikaiyane.

³⁵ Ku Tama mathalrai ki Lalakeini, wabaainga sanaka manemane pikai ki alrimaini.

³⁶ Ku masalru ki Lalake, yakai ku palralrawthu ka niake, ku kai masalru ki Lalake, kai lri ikai ku tengatengane ka niake, si ku sapathavungane ki Twaumase lri ikainga iniane apalralrawthu.