Yuhani 21 - Ngudradreadrekadhane Ka Sisiu 魯凱語聖經

Adrelane ku Yesu papia ki tapitu ka situ

¹ Sangilribatenga kilakikai, ku Yesu peaeelanga ikai thili ki Baiyu Tibiria adrelane ki lasitu. Ngimiyaiya kikai ku tangimiane ku taadrelananeini:

² Sakamani kwidra, ku Simune Pitiru, si kiasunagane pasi Tukapiane ka Tumase, si Kana ikai Galrilri ka sia Nathanaile, tadrusa ka lalake ki Zibidi, si drumane ka tadrusa ka situ, taelre ikai makanaelre.

³ Ku Simune Pitiru la iya kai liniane, “Lri katwasaku tukange.” La iya kai makanaelre, “Lri tupalra nai muswane”. Ala katwase kai lalasu, si ubelenge ki varukuru; ai wataleare ka kadrwa ku malra lini ku manemane.

⁴ Sa tawlrawlrau ku vai, ku Yesu acegecege ikai babiabila ki acilai, ai ku lasitu kai wathingale iniane ala ka Yesu.

⁵ Ku Yesu la iya kai liniane, “Lamalalala, yakai ku alra numi ku kange?” Kwi lalasu la tubalre iya kai, “Kadrwa.”

⁶ La iya kai ku Yesu, “Aradha papia ki tali vanale ki varukuru, yakai kwini kwi kange.” Kwi lalasu la pwa arai, ai kai maka wabilibili pubelenge, asi lwiyane makalra turamuru ku kiapuaradhane ku kange.

⁷ Kudra kadalame ki Yesu ka situ la iya kai ki Pitiru, “Tamatama!” Ku Simune Pitiru sakilalra Tamatama iya, la makakaai malra si elrai ku sapakabelengane ka laimai (kudra yacengecenge ka ulaimaimai), si ituku mutaburu ki acilai.

⁸ Ku drumane ku lasitu la kadrakadrau kwini ki tikiane ka varukuru pubabiabila, si alra pubelenge kwini yaaradhane ka kange patuelre. Sakamani kwidra wadeethe kameamealane, lri ikaai ku takwa idai ka mituru ku adailane.

⁹ Kwi lalasu sa tabelengenga mukameamealane, la drele ku nirutungane ka lrangele kudaladalai, ikai belenge yakai ku kange si pange.

¹⁰ Ku Yesu la iya kai liniane, “Alra ngupiya kudra tukange numi kwasane.”

¹¹ Ku Simune Pitiru la ubelenge ki varukuru, si malra pubabiabila kwini arai; kwini yaaradhane yadreepele ka tadradrau ka kange, elrelrenga 153. Makalra turamuru ku kange, ai kai mapurici ku arai.

¹² Ku Yesu la iya kai liniane, “Bwala tukwalrea.” Kadrwa ku natangeanga ku situ ku maka kiavaga iniane iya kai, “Aneanesu”, asi lwiyane wathingale makanaelre iniane ala ka Tamatama.

¹³ Ku Yesu la katwase lribate, si malra ku pange apavalavala liniane, la tuthadaalrane apavalavala ku kange.

¹⁴ Kikai yai ku tasielane ki Yesu, saka kingitulrulu papia ki lasitu adrelane.

Yesu si Pitiru

¹⁵ Kwi lalasu sa maka kanenga, ku Yesu kiavaga ki Simune Pitiru, “Lalake ki Yuhani ka Simune, madalamesu nakwane ka silrialribate kilakikai?” La iya tubalre kai lasu, “Unu, Tamatama, wathingalesu ala ka madalamaku muswane.” Ku Yesu la iya kai, “Lapwa ki latatiitiki ka kiuli.”

¹⁶ Sa saka kingipusale ku Yesu la kivaga, “Lalake ki Yuhani ka Simune, madalamesu nakwane?” La iya tubalre kai lasu, “Unu, Tamatama, wathingalesu ala ka madalamaku muswane.” Ku Yesu la iya kai iniane, “Lapwa ki kiuli.”

¹⁷ Sa saka kingitulrulu la peelanga ku Yesu kivaga, “Lalake ki Yuhani ka Simune, madalamesu nakwane?” Ku Pitiru amani sa edeede kingitulrulu kivaga iniane ku Yesu, “Madalamesu nakwane?” Iya, la kwalri kidremedreme, si iya kai ki Yesu, “Tamatama, kadrwa ku kaika thingalesu, wathingalesu ala ka madalamaku muswane.” Ku Yesu la iya kai, “Lapwa ki kiuli.

¹⁸ Lri pudriadringadhaku pelaela muswane, sa icengecengeanasu, ngiapapasilaketesu, si ngilralraingi ku apapinwane; ai lu pasuludrungasu, lri segesu ku alrimasu, ku palrapalra lai kerenge muswane, si ililuku muswane mwa ku kaika palraingisu mwa.”

¹⁹ (Ku taiyane kai ki Yesu papiapia ku lrika angimiane ki Pitiru pacai, si lrigu ki Twaumase.) La pacungulu, iyanga kai ku Yesu iniane, “Tupapalraili!”

Yesu si drumane ka lasituini

²⁰ Ku Pitiru la ngibangulu, si drele kwidra ki situ ka kadalame ki Yesu yakai lrilrikudru kabibibilrili (kwini situ nawamwa deethe ki Yesu sa tukwauawbu kudra sakamaungu, si kivaga iniane, “Tamatama, ku lri kilangai muswane aneane”).

²¹ Ku Pitiru sadrele iniane, la kivaga ki Yesu, “Tamatama, kikai umawmase lubibilrili lri ngitumane?”

²² Ku Yesu la tubalre iniane, “Alaiyasi ani panianiake iyaku iniane pakela ku akelaneli, kadrwa ku capilanesu. Kainganadha tupapalra nakwane sikakathane!”

²³ Lakamani, kikai vaga la kimatikaikainga ikai ki twapapapalra ki Yesu ka laumawmase, kwini situ kai lri pacai iyaiya. Ai ku patengatengane, ku Yesu kai lri pacai kwini lasu kai amia, “Alaiyasi ani panianiake iyaku iniane pakela ku akelaneli, kadrwa ku capilanesu” amia la kathane.

²⁴ Kikai umawmase amani kudra situ ku pasiakai kilakikai pelaelaela, wamalra kilakikai si pacase. Wathingaleta ku pelaelaelaini tengatengane patuelre.

Saturingaringavane ka vaga

²⁵ Ku Yesu makaalrana turamuru ku piaini, alaiyasi nguvavaeva pudriadringai pacase, lu kidremedremaku ku kalrane, ku kalrane ki hungu kadrwa ku lrika taikaiyane kai kawmasane.