Yuhani 12 - Ngudradreadrekadhane Ka Sisiu 魯凱語聖經

Kiapadelreme ikai Bithani

¹ Salri makanemelenga si tulrisisi ku Takilragavane ka lrisi, ku Yesu wamwa Bithani, amani kwidra taikaiyane ki Lazaru (ku Yesu nayakai kikai pasielane ki Lazaru).

² Yakai ku yakai kwini ku pasiakai ki Yesu padulru ku kwaubu; ku Maretha la paraluralubu pasudalru, ku Lazaru si drumane ka badhabadha la taelre ki Yesu kalringulringulu.

³ Sakamani kwini, ku Malria la malra ku yadidilrungane ka tinukucingalrane ka lawlau, si gugu pwa ki drapale ki Yesu, la arakai ku isiuini sakidri; ku sangulremane salraelre ki daane.

⁴ Ku tangea ka situ ki Yesu, amani kwidra lri kilangai iniane ka swa Isekaliwte ka Yuda, amia kai,

⁵ “Ani kai malra kikai sapasangulrelremane si kilangai tu 300 ka gingi la baai pavavala ki lamatiakukuru?”

⁶ Ku taiyaneini kikai, kaika tengane ka makalithi ki matiakukuru, amani saka tarakupawpa; ka amani ku tarapikaikai ku paisu lini ka sakaredele, la kupawpa si arakai.

⁷ Ai ku Yesu amia kai, “Singikaiya iniane! Rururubuini ka pasiakai kudra lrika takidralrekaneli ka vai.

⁸ Ku matiakukuru taikaiyane si taelre numiane palralrawthu, ai kainaku lrika taikaiyane numiane.”

Tamadrekadrekasane ku apapacadhane ki Lazaru

⁹ Kudra la swa Yuda ku laumawmase sakilalra ka yakai Bithani ku Yesu iya, matwase mwa kwini. Kaika ngwalai ki Yesu ku mwa lini sikakathane, mialri apidrele kudra pasiela ki Yesu ka Lazaru.

¹⁰ Ngwalai kai, ku tamadrekadrekasane ki lamarudrange ki barakalai adravane ku Lazaru pasana kipaelre kipapacai,

¹¹ asi lwiyane, takaalra ku swa Yuda ku ngwalai iniane si katwase liniane, la kasalru ki Yesu.

Masasialrigu mucekele Yerusalrime

¹² Sakakaiyane, kudra wamwa Yerusalrime tulrisisi ku laumawmase tapangale turamuru, kialalra lri kainganai mucekele ku Yesu iya.

¹³ Kai lalasu wamalra ku vasau ki abare si katwase kidredresenge iniane, la kiraragai makakawkau iya kai, “Takiraragai ki Twaumase! Ku Twaumase ani subulrubulru kwini ki nipangukaiyane ku nagane ki Tamatama si kainganai! Ku Twaumase ani subulrubulru ki talialalai ki swa Iseraylri!”

¹⁴ Ku Yesu kiadringai ku vaeva ka ruba, la ubelenge si katwase, mararaamau ku tapacasane ki Sisiu:

¹⁵ Lalalake ki cekele Ziyungu, madha ukuludru. Drela, kwi talialalai numi kaiangananganai ngukai ki lrulai ka ruba!

¹⁶ Sakapathagilane, ku situini kai wathingale ku pacugane pangukai kikai, sadarurunga ku tamalrane ku lrigu ki Yesu, ala ngulringau ku taiyane ki Sisiu ka papia iniane kawriva, si kai lalasu la pangimia ku taiyane.

¹⁷ Sa dawlu ku Yesu ki Lazaru, si patwalai ki wapacai pasiela iniane, la mulatadre twalai ki tadralredralrekane, kudra yakai taelre ki Yesu ku laumawmase peaelaela ku tadrelane lini.

¹⁸ Takaala ku laumawmase ku ngwalai ku takilalrane lini ku tapianeini ku pinangu Twaumasane ka puku, matwase kidredresenge makanaelre iniane.

¹⁹ Ku swa Palrisai la maiyaiya kai, “Kadrwa ku palululudane kai takwalrianeta; drela, kai yakawmasane twapapaalranga iniane!”

Ku swa Gurike kiatubi ku akikawrivane ki Yesu

²⁰ Ikai ki tatulrisisisiane, ku wamwa Yerusalrime sukubu yakai kudra la swa Gurike.

²¹ Kai lalasu kaiyanganai kikawriva ki Pilripi ka swa Galrilri ka Bithesaida, kiatubi iniane iya kai, “Sinsi, apia kikawriva nai ki Yesu.”

²² Ku Pilripi la katwase pelaela ki Anederiu, la tarudrusa mwa pelaela ki Yesu.

²³ Ku Yesu la iya kai, “Ku amalrane ku lrigu ki Lalake ki Umawmase ku vai wakelanga.

²⁴ Nau pudriadriingai pelaela numiane, ku beraberathane ku mugi lu kai mwadringi ki dae, si pacai, lrika takasakamiane ka takavaevane ka berathe; luiyasi pacai, lri kainganai ku berathe tukaalra.

²⁵ Kudra ngiatataulra ku niakeini, lri sakacilri ku niake; ala ku palraingi ngiacacilri ku niakeini ikai kai kawmasane, lrika amaanilringa ku magagemegeme kikai niake pakela palralrawthu.

²⁶ Ku aneane ku lri pasikai nakwane, lrika amani ku twapapalra nakwane; ku taikaiyaneli, lri ikai kwini ku sasiakawluli. Kudra pasiakai nakwane ku umawmase, ku Ama lri tara tukucingalre arakai iniane.”

Ku Yesu matiakai ku lrika apacadhaneini

²⁷ “Kaiasasane kwalri kai kidremedremeli, manemane ku aiyaneli lai kathariri? Lri kitubiaku ki Ama ku apalribulane nakwane pakidaili kai ki zikange kai? Ai, amaani kikai ku kelali, ku lrika akipadradresenganeli kikai ki akwalriane.

²⁸ Ama, asu lrigu ku naganesu!” Sa icengecenge kwidra, yakai ku lingau ku twalai belenge mulebe, si iya kai, “Walrigunga naku ki naganeli, lai lri peela naku lrigu!”

²⁹ Kudra acegecege ikai kwini kudra laumawmase kialalra kikai lingau, la iya kai, “Wadreredrere!” Kudra drumane ku laumawmase la iya kai, “Sasiakawlu subelebelenge ka kiakawrivariva iniane!”

³⁰ Ai ku Yesu amia kai liniane, “Kikai lingau kaika pasiakai nakwane, amani numiane kwini lingau.

³¹ Kikai yakawmasane lri kisaibange; kikai warathudu kawmasane lri kibaebalre.

³² Lu kipatwaladhaku lebe kicidingi, lri alraku bilibili ki sanaka umawmase mwa nakwane.”

³³ (Ki kikai vagaini papia ku lrika angimianeini pacai.)

³⁴ Kudra laumawmase la tubalre iya kai, “Ku hulrice nai peaelaela naiane, ku Kirisitu lrika palralrawthu ikai; lri tara kicidingi ku Lalake ki Umawmase asu iya? Kai Lalake ki Umawmase aneane?”

³⁵ Ku Yesu amia kai, “Ku ledra ku aikaiyane numiane kai lri tarathainunga, sa ikaiyana kai ledra, naika pacuungulu numi dadavace, amani lu padali numiane ku dradrimitane, asi lwiyane ku yakai kadradridrimitane dadavace ku umawmase kai wathingale ku apapianeini.

³⁶ Sa ikaiyana ku ledra kasalrwa tupapalra ki ledra, lanu alalalake ki ledra.” Samaka iyanga kilakikai vaga, ku Yesu matwase liniane, si kai kidredrele.

Kaika kasalru ki swa Yuda

³⁷ Kai lasu adravane icucubungu liniane pia ku makaalra ku pinangu Twaumasane ka puku, kai lalasu kaiyana masalru iniane.

³⁸ Kikai yai lri ngimia ku nataiyane ki yuginsia ka Isaiya: Tamatama, lrika aneane ku masalru kai pelaelaela nai kai vaga? Ku puku ki Tamatama lri papia ki aneane athingalane?

³⁹ Ku ngukai si kai kasalru ki lalasu, amianga ku Isaiya kai:

⁴⁰ Ku Twaumase pakabuti ki maca lini, la pakasalregesege ku kidremedreme lini, amani lu drele kwi maca lini, lu makapulringau kwi kidremedreme lini. Lakamani ku iya kai ki Twaumase: Kai lalasu kai lri ngibangulu papia nakwane, la nai pawdringadhaku liniane.

⁴¹ Ku taiyane kikai lavaga ki Isaiya, amani sadrelenga ku lrigu ki Yesu, laka papia iniane ku takawrivane.

⁴² Adravane ka ngimiyaiya kikai, ku lamabelenge ki swa Yuda maiya takaalra ku masalru ki Yesu, ai mwakuludru ki swa Palrisai, la kai maka surasake ngipapelaela, amani lu kipakatwase ki rarubwane ki swa Yuda.

⁴³ Kai lalasu twa makadrwadrwa ku akidrengedrengerane ki umawmase, laka tutitikiane ku akidrengedrengerane ki Twaumase.

Ku vaga ki Yesu lri saibange ki umawmase

⁴⁴ Ku Yesu akwaadrau kawriva iya kai, “Ku masalru nakwane, kaika masalru nakwane sikakathane, mialri kasalru kudra ki amani ku siakawlu nakwane.

⁴⁵ Ku wadrele nakwane, mialri drelenga kudra ki siakawlu nakwane kainganai.

⁴⁶ Aledraku, la mwa kai kawmasane, pakai ku kaika aikaiyane kadradridrimitane kudra ki masalru nakwane.

⁴⁷ Kudra kialalra ku vagali la kai paluludu, kainaku lri saibange iniane. Ku tangadrane ku kelali kaika asaibangane ki yakawmasane, amani ku apalribulane ki yakawmasane.

⁴⁸ Kudra pasiaulri nakwane kai tarwamara ku vagali, yakai ku lri saibange iniane; ikai ki bibiilrilinga ka vai, ku taiyaneli ku vaga lri saibange iniane!

⁴⁹ Asi lwiyane kadrwa ku ngisasingikaili si kawriva ku manemane, amani kudra siakawlu nakwane ka Ama ka wadrekase nakwane ku aiyaneli kawriva.

⁵⁰ Wathingalaku kudra drekaseini mailuku ku palralrawthu ka niake. Lakamani, ku taiyaneli patengane ka iya kwini iya nakwane ki Ama.”