Yuhani 10 - Ngudradreadrekadhane Ka Sisiu 魯凱語聖經

Patharukai ki takivane ka pathalrilriku

¹ Ku Yesu la iya kai, “Lri pudriadriingadhaku pelaela numiane, kudra kai ngwakai ki lrawlrawdru mudaane ki takivane, la ngukai talidrumane si kapa mudaane, amani ku tarakupawpa, kaamani ku saadre.

² Kudra ngwakai ki lrawlrawdru mudaane, ala amani ku taraagwagu ki kiu.

³ Ku taradrangalrungalru ki lrawlrawdru mwaelebe iniane, ku kiuini wathingale ku lingauini. Kwini lasu singiakai ku nagane dawlu ki kiuini, si ililuku liniane ulatadre.

⁴ Sana iluku pulatadre ki kiuini, matwase kaswalala liniane; kudra kiuini la tupapalra iniane, asi lwiyane kudra lakiu wathingale ku lingauini.

⁵ Kwini lakiu kai twapapapalra ki kaika thingale lini ku umawmase, mwabeerelringa, asi lwiyane kai wathingale ku lingau ki kaika thingale lini ku umawmase.”

⁶ Ku Yesu amia kikai pathalrilriku liniane, ai kai lalasu ku taiyaneini kai wathingale ku pacugane.

Mathariri ka taraagwagu ku Yesu

⁷ Lakamani, ku Yesu amiyanga kai liniane, “Lri pudriadriingadhaku pelaela numiane, amaniaku ku lrawlrawdru ki lakiu.

⁸ Kudra aswala nakwane kainganai tarakupawpa makanaelre, ka amani ku saadre; ku lakiu kai kialalra liniane.

⁹ Lrawlrawdraku; kudra ngwakai nakwane mudaane, lri tara kipasavidhi, si lai dulru masasawlri mulatadre si mudaane, lai lri kidringai ku laakaneane ku ubulu.

¹⁰ Lu mudaane ku saadre, pakai ku akupane, lri papacai, lri kabebetethe; ku kelali ku tangadrane pakaiyaku ku amalrane lini ku niake, si ka ngiaesadhane paramuru ka niake.

¹¹ “Amaniaku ku mathariri ka taraagwagu; ku mathariri ka taraagwagu palraingi cilri ku niake pasikai ki kiu.

¹² Kudra nipawlrawlravane kaika taraagwagu, ku kiu la kaika iniane. Kwini lasu sana drele ki tawpungu ubulane lu kaingananganai, wacilri ki kiu si ubere; ku tawpungu ubulane la pwalra ki kiu, si pathirakupu ki lakiu.

¹³ Kudra ubere ki nipawlrawlravane, amani saka nidawlane pakauawngu sikakathane, kaika makalithi ki lakiu.

^14-15 Amaniaku ku mathariri ka taraagwagu. Mia kudra tathingalane ki Ama nakwane, la thingalaku ki Ama. Thadaalrane, wathingalaku ki kiuli; la mialri thingale nakwane. Palraingaku pasikai liniane ngiacacilri ku niake.

¹⁶ Yakaiyana ku drumane ku kiuli ku kai yakai kai ki takivane, lai tara malraku ililuku liniane, kwini lakiuli kialalra kai lingauli; kwini taidrusane lri maelre si ka taingeangeanenga, lri kathadalranenga ikai ki tangeangea ka taraagwagu.

¹⁷ “Ku Ama madalame nakwane, asi lwiyane palraingaku ngiacacilri ku niake, pakai ku amalraanenga ku niake.

¹⁸ Kadrwa ku umawmase ku lri ribici kai niakeli, amaniaku ka palraingi ngiacacilri; yakai ku pukuli ngicacilri, la ikai ku pukuli malra sawlri. Kikai yai drekase ki Ama pia kwini iya nakwane.”

¹⁹ Ku swa Yuda la ngwalai kikai ki lavaga si makalilisi karivu.

²⁰ Ikai liniane takaalra ku amia kai, “Kai lasu kiaikai ki aidridringane! Amamama! Asingithanga kilalra iniane?”

²¹ Ku drumane la iya kai, “Ku kiaikai ki aidridringane kai lri dulru kawriva ku miyaiya kai ku vaga! Ku aidridringane wadulru pacege kudra ki mamukici?”

Kai kiatarumara ki swa Yuda

²² Sa ikai Yerusalrime, wadarurunga kudra tatulrisisisiane ku tapatarumarane ku daane ki Twaumase ka vai; yacengecenge ka kalakecelrane.

²³ Ku Yesu sa dadadavace ikai ki daane ki Twaumase kudra ki ruka ki Sulumungu,

²⁴ ku swa Yuda la ngithalringulu iniane, si iya kai iniane, “Lri pakalrikilrikisu naiane pakela lwigane? Pudriadringadha pelaela naiane, amanisu ku Kirisitu?”

²⁵ Ku Yesu la tubalre, “Ku peaelaelanga naku numiane, ai kai numi masalru. Ku pangukaili ku nagane ki Ama si pia ku awngane ala amani ku sapelaelaneli.

²⁶ Ai, kai numi ka kiuli, lakamani ku kaika kasalru numi.

²⁷ Ku kiuli kialalra ku lingauli, la thingalaku liniane, twapapapalra nakwane.

²⁸ Wabaadhaku liniane ku palralrawthu ka niake, lai lri kai pacai; adravane ka aneaneane kadrwa ku lri maka dulru patwalai ki alrimali malra liniane.

²⁹ Kudra amani ku wamalra liniane si baai nakwane ka Ama sanianiangenga ki maneemanenga, kadrwa ku umawmase ku lri dulru patwalai ki alrima ki Ama malra liniane ribici.

³⁰ Ku Ama si kunaku vaeva nai.”

³¹ Kikai, ku swa Yuda la maalranga ku lrenege si lri cabiri iniane.

³² Ku Yesu la iya kai liniane, “Ku taicucubunganeli numiane pia ku pia kwini iya nakwane ki Ama kudra la makaalra ku mathariri ka awngane, amani ki ngwakai ki manemane ku amalrane numi ku lrenege si cabiri nakwane?”

³³ Ku swa Yuda la tubalre, “Kai nai ka ngwalai ku tapianesu ku mathariri ku awngane si malra ku lrenege cabiri muswane, amani sa tudreadrekasesu ki Twaumase! Umaumasesu sikakathane, asu thuru ngitatu Twaumase!”

³⁴ Ku Yesu la iya kai, “Kai wapacase ku hulrice numi, ku Twaumase amia kai, ‘Amani numi ku Twaumase’?

³⁵ Wathingaleta ku vaga ki Sisiu kai lri akabalrithi palralrawthu; papia kwidra ki tarwamara ku vaga ki Twaumase, ku Twaumase twa Twaumase liniane.

³⁶ Papia nakwane, amaniaku ku pinilriane ki Ama si kisikawlu mwa kai kawmasane. Lalakaku ki Twaumase lu iyaku, twadreadrekase ki Twaumase anu iya nakwane?

³⁷ Alaiyasi kainaku ka paiyaiya ku awngane ki Ama, kunumi madha kasalrusalru nakwane;

³⁸ alaiyasi ka paiyaku, adravane kai numi kasalru nakwane, nai kasalru numi ki awnganeli, lanu pudriadringai thingale ki Ama ka yakai ki niakeli, la mialriaku ikai adringi ki niake ki Ama.”

³⁹ Sa iya kwini kai lalasu la kisanu pwaalranga iniane, ai kai Yesu matwase kidaili liniane.

⁴⁰ Ku Yesu la siwlringa mwa balrealreanane kadravane Yuredange, wamwa kudra nataikaiyane ki Yuhani pabanau, si ikaikai kwini.

⁴¹ Takaalra ku laumawmase ku kaiyanganai silape iniane, si iya kai, “Ku Yuhani kai paiya ku pinangu Twaumasane ka puku, ai papia kai ki umawmase ku niyaiyane patengane patuelre.”

⁴² Ikai kwini, takaalra ku laumawmase ku masalru ki Yesu.