Yubu 9 - Ngudradreadrekadhane Ka Sisiu 魯凱語聖經

¹ Ku Yubu tarwamara tubalre:

² Unu, kikai vaga kai wathingalaku patuelre; ai kai umawmase ikai cucubungu ki Twaumase lri tumane si dulru pamalebe kawriva?

³ Aneane kulri dulru kiecebe iniane kawriva? Ku Twaumase lri dulru kivaga ku thathatha, lai ka kadrwa ku umawmase kulri dulru tubalre.

⁴ Ku Twaumase malrigili turamuru maadrau ku puku; aneane kulri maka kiecebe iniane si panianiake?

⁵ Ku Twaumase kai paswala pelaela si patalula ki maadrau ka lregelrege, yakai ki elathane alra balre ki lregelrege.

⁶ Pangiavelevele ki kadaengane, si patalula ki nataikaiyane; wavelevele ku ulrudru ki kadaengane

⁷ Kai pamwa belenge ki vai, la kai paledra ki latariau.

⁸ Tangeangea paipai kai subelebelenge, ku drapaleini la dredre pikai ki drelreke ki matiasamali ka waudriwdripi ikai laveke.

⁹ Ku Twaumase yakai subelebelenge kelrai ku latariau: Pitu ka tariau, Silrawlrabu ka tariau, Peleadese ka tariau, si yakai tali lrawdru ka latariau.

¹⁰ Kaita maka wathingale ala ka maadrau ku tapianeini ku awngane; ku matisamaliane ku tapianeini kadrwa ku tapalikaiyane.

¹¹ Ku Twaumase ngwathathili lribate nakwane, kainaku maka wadrele iniane; ngwacacucubungu nakwane lribate, la kainaku pulringalringau.

¹² Ku Twaumase ngiasasingikaai malra ku nau malra iyaini, kadrwa ku umawmase ku wadulru telenge iniane; aneane ku wathuru kivaga iniane, “Watumatumanesu?” Iya.

¹³ Ku elathane ki Twaumase kai yasadrasadra; kudra umawmase ku paralubu ki maelaelane ka waudriwdripi ikai laveke ka Rahabe lri kipamaki ikai tailebe ki drapaleini.

¹⁴ Lri tumanaku dulru tubalre ki Twaumase? Lri maka thurwaku madradrikisi ku vaga iniane?

¹⁵ Adravane ka kiadralrilaku, kainaku lri thuru ngikakawriva; lri papiaku ki Twaumase ka lri saibange nakwane kitubi ku kurwaneini sikakathane.

¹⁶ Adravane dawlaku iniane, la palraingi, kainaku masalru kalri kilalra nakwane.

¹⁷ Ku Twaumase arakai ku valrigi kabebetethe nakwane, ka kadrwa ku taukaiyane si dula nakwane.

¹⁸ Kai palraingi nakwane ku naatuthetheanengali kingivavaale, paswaetelringa ku akwalrianeli tubitubi.

¹⁹ Lri capangaku arakai ku puku? Sapukwane turamuru! Mutasaibaibangane? Aneane kulri thuru dawlu iniane pakisaibange?

²⁰ Adravane ka kiavuthaku kitupasalriu, kai vagali lri tupasalriu nakwane; adravane ka mabulaku, lri paathingalane pelaela ku tapasalrivaneli.

²¹ Kadrwa ku pasalrivaneli, ai manemaneana ku paluludane? Kadrwanga ku nau panianiake iyali.

²² Ku yakai ku pasalrivane ku kadrwa ku pasalrivane mararaamau, kulri tara amudu ku Twaumase mitane.

²³ Ku amatikurwane lu mailuku ku apangitutulukane pacai, ku Twaumase mwalralrakai ku takipadradresengane ki avutha.

²⁴ Ku Twaumase wabaai ki ngialisiane ka umawmase kai kawmasane; pakamukici ki tarasaibaibange makanaelre. Kikai lu kai ka Twaumase ka paiya, laka aneane midra?

²⁵ Kai vaili walailailai katwase, kadrwa ku naminaka vaalanenga ku mathariri ka vai.

²⁶ Kai niakeli mia ki tikiyane ka varukuru ka walribate, la mia ki takanga ka wadaisi ki akaneane.

²⁷ Ngiavavuthavuthaku ulrakai, pakai ku akarimurane kai sakwalrialrili,

²⁸ ku amatikurwane patuelre wakela upungu nakwane; wathingalaku ku Twaumase kiavutha kai amia nakwane.

²⁹ Kudra kia tupasalrivanenga naku, manemaneana ku kiavuthaku aiyaneli?

³⁰ Adravane arakaiyaku ku pasabu ngisasinau, la arakaiyaku ku titimwane tawlrima,

³¹ ku Twaumase lri verevere nakwane pwa ki lriduku; adravane ka laimaili mavalracevace nakwane.

³² Ku Twaumase ana ka mia nakwane ka umawmase, nai dulrwaku madradrikisi ku vaga; nai dulru nai taru dradrusa mutasaibaibangane, si turingaringau kai makakalisilisi nai.

³³ Ai, ikai naiane kadrwa kulri ikai kabicelrakane apakakathariri; kadrwa ku umawmase kulri ikai kabicelrakane naiane ki Twaumase si turingaringau ku mathariri si malisi.

³⁴ Twaumase, kiatubiaku muswane madha pathavungunga nakwane; kiatubiaku muswane madha kukuludrunga nakwane.

³⁵ Luka ngimiyaiya kikai, lri kagarangaku avavaga, si kai mukuludrunga, asi lwiyane wathingalaku ka kiavuthaku kitupasalrivane.