Yubu 8 - Ngudradreadrekadhane Ka Sisiu 魯凱語聖經

¹ Ku Biledade ka swa Sua pacungulu kawriva:

² Lri pakelasu lwigane kawriva kikai miyaiya kaika vaga? Kilakikai kadrwa ku paluludane ka vaga!

³ Bekace ku Twaumase apabaebalre ku pacengecenge si kai pacengecenge? Bekace baebalre ki dringelresane ku wadulru sanaka manemane ka Twaumase?

⁴ Ku lalalakesu lrika tara pasalriwnga iniane, lakamani ku singikaini ku naika akipathavungane lini pathavungu liniane.

⁵ Naika ngiabangulusu papia ki Twaumase, si kapatengatengane kitubi ki wadulru sanaka manemane ka Twaumase.

⁶ Ana alrivilrivisu kadringelrese, ku Twaumase lri tara paralubu muswane, si pasiwlriwlriane ku takauawnganesu si tacekecekelane.

⁷ Kulri ka apatarumarane baai muswane ki Twaumase lri lribate paraamuru kudra ki sakawlraungasu patuelre.

⁸ Ala ngulrialringava ku lrigilane ku nadrwadruma, la pudriadringai drele ku tangilribatane ki la aswalalala.

⁹ Kai niaketa edreekane, ka kadrwa ku thingale; lu kawlrawta, mia ki alalingu ka walribate ki kadaengane.

¹⁰ Ku aswalalala ka talrilrigili ani bulru muswane; kicacaligira ku taiyane lini ku vaga.

¹¹ Ku tara cebecebe ikai aciacilai wadulru cebe ikai ki takakadrwane ku acilai? Ku tirivu lri dulru kidaili ki beneke?

¹² Sana kadrekare ku acilai, aswalalanga kalraici; laka lrelredeana, kaika adulrudulrwaneana malra si arakai.

¹³ Ku kai wasukusukubu ki Twaumase ku umawmase mia ki wacebecebe ikai ki aciacilai ka ubulu; kwi lalasu sana karimuru ki Twaumase, ku sasiadradrama maulrawnga.

¹⁴ Kwi lalasu swadralru kudra ki lri kangetele ka calrisi; ku satalu lini yai lralravathe ki vawvaluku.

¹⁵ Kwi lalasu lu satalu ki kuladhane ka calrisi, kwini calrisi lri dulru paralubu liniane? Kwi lalasu lu kiraisi ki lralravathe ki vawvaluku, lri maka dulru sutelrai acegecege kapapedrenge?

¹⁶ Ku manganga ka umawmase ikai tailebe ki ledra ki vai mia ki laubulu, ku ricingi ku vasau ngiaesadhane, la dawdau mulatadre ki babengelradhane.

¹⁷ Ku balaceini wakerape ki alrisapesape, si suteelrai balace ikai ki takangacacane.

¹⁸ Ai, lu malrane akucu, kadrwa ku umawmase ku wathingale ala ka nayakai kwini balace.

¹⁹ Unu, kwini yai amani ku kathane ku kiragai ki manganga ka umawmase; kikai yakainga ku palrapalra ku mwabalrithi ku taneneane lini.

²⁰ Ai ku Twaumase kai lri cilri kudra kadrwa ku atakaiyane madu kaelaela ku umawmase, lai kai lri paralubu lutumane ki manganga ka umawmase.

²¹ Kwi lasu lri pelana paulrakai muswane; kwi lasu lri pelana pakiraragai muswane.

²² Lai lri pakiarubwane kudra ki malisi muswane; ku daane ki manganga ka umawmase lri kamudu.