Yubu 7 - Ngudradreadrekadhane Ka Sisiu 魯凱語聖經

¹ Ikai kai kawmasane kai umawmase, mararamau ki kiavutha akwapingi, la kwalrialrialri kaungu lukakaiyaiyaiya,

² mia ki duri ka mwarikai ki lrilriane, mia ki mwalrawlrau ka mwakalavalava ku akipaiswane.

³ Kiakelretengaaku ku akwalriane panianiake; la tubitubi lukamawawaungu.

⁴ Lu apecaku, ku dradrimitane malraagi, la ngibawbawbangulu madu kai maka kasipelrenge, mukalavalava ki akaliarane sikakathane.

⁵ Swaete ki kinawmasaneli kai ekai, kapu palraelre; kai lrangicili maburaburau ngibitelratelra.

⁶ Kai vaili mariaridare ki lalikwane, yakai ki sulriane patuelre ngilribalribate.

⁷ Twaumase, kiatubiaku muswane ngulringava, kai niakeli nikingivavalane ipi sikakathane; kadrwanga ku akiragadhaneli ku vai.

⁸ Kaiasasane wadrelesu nakwane, ai lri kaisu pelanga drele; alaiyasi lri silapesu nakwane, lri kainaku ikainga.

⁹ Mia ki ememe masivavagai kawlrau, kai umawmase lu pacainga kai siaulriwlringa.

¹⁰ Kwi lasu kai lri maka mutavananenga, la kikarimuru kwidra ki nawathingale iniane ka umawmase.

¹¹ Ini, kainaku lrika taicelreebane! Lri putaluvaivadhaku kai tubitubi ki abakeli; lri pelaelaku kai sakwalrialri ki kidremedremeli.

¹² Asu kiriimu lepenge telenge nakwane? Bekacesu malra nakwane tumaelaelane ka waudriwdripi ikai laveke?

¹³ Lu apecaku, kisanu isadra, pakai ku akasasane kai sakwalrialrili;

¹⁴ ai, arakaisu ku malisi ku sipi kukuludru nakwane, la kiupungaku ki kaika patengane ka kidremedreme.

¹⁵ Ngwalai kikai, maesaesadhaku ka seemete si pacai, la kai kwalrialrialri panianiake.

¹⁶ Kadrwanga ku rengerenganeli panianiake, kalrasenga ki niake. Madha thethengetenga nakwane, kadrwanga ku paluludane kai niakeli.

¹⁷ Manemane ku apasiasipane ki umawmase, la tukucingaciingalreananasu iniane? Ku tatwatumananeini manemane ku atakaiyane madu si tukucingalre?

¹⁸ Luka mialrealre ki vaivai tadredredrelanesu iniane, ki ipunkange la kilrialringawsu iniane.

¹⁹ Kaisu lri maka padrwadrumana si kai papia nakwane drele, la nau dulru kingivaale lrelre kai ngalraili?

²⁰ Maka wadrele ki umawmase ka Tamatama, bekace ka wadula muswane kai pasalrivaneli? Asu tudukipi nakwane si lrailraili? Madrau ka amecesu ngwalai nakwane?

²¹ Kaisu lri maka pacepe ki pasalrivaneli? Kaisu lri dulru pacepe ki tapasalrivaneli? Kainaku lri tarathainunga si mwadringi ki tadralredralrekane; lu silapesu nakwane, lrika kadrwanga naaku.