Yubu 6 - Ngudradreadrekadhane Ka Sisiu 魯凱語聖經

¹ Ku Yubu la tubalre:

² Ana ikaai ku umawmase ku watingitingi kai matikurukuruli, la ikai ku umawmase ku pwabelenge ki tintingi kai kawpupunguli;

³ kilakikai matelrelrege ki yababiabila ki laveke ka enai; madha ngwalalai ku taakulisianeli kawriva si ngituluku.

⁴ Ku wadulru sanaka manemane ka Twaumase walraili si pakai nakwane; ku padavake ki lraili salraelrenga ki kinawmasaneli. Ku Twaumase arakai ku makaelaela ka matiaukukuludru ka matikurwane lrumai nakwane.

⁵ Ku yaubulane ka ruba sana ikai ku masalese ka ububulane kiaragai; Kai lwange lu ikai ku akaneane ka ubulu la kai alalingalinaunga.

⁶ Ai, ku akaneane luka kadrwa ku tasangumanemanane, ka kadrwa ku timu aneane kulri kane? Kai tanpai ki batuku la ikai ku tasangumanemanane?

⁷ Ku miyaiya kai ku akaneane kadrwa ku padulruli kane, talrabeabaku kane.

⁸ Ku Twaumase ani kai singikai ku kitubili si patarumara baai nakwane? Ani kai kilalraini ku inulrili?

⁹ Anatumane la papacai nakwane! Anatumane la drepete baburau nakwane!

¹⁰ Kaiasasane adravane kadrau turamuru kai sakwalrialrili, sana thingalaku iniane kalri amudu nakwane, lri kiraagadhaku itituku. Wathingalaku ki Twaumase ka saniange turamuru; Kadrwana ku talremeaneli baebalre ku drekaseini.

¹¹ Manemaneanaku lrika pukuli panianianiakeana? Kudra kadrwanga ku sidramane madu, lri tumaneana madu panianianiakeana?

¹² Bekacaku ka amani kudra niaralrenegane kibekace? Bekace kai kinawmasaneli ka niara adremane darepe?

¹³ Kadrua ku natikianenga ku pukuli ngipapalribulu; laka kadrwa ku adulrwaneli mwa kiparalubu.

¹⁴ Adravane ka matwasenga naku ka ini ki wadulru sanaka manemane ka Twaumase, ikai kai ki miyaiya kaika akwalriane, mwarikaiyaku ku tengatengane ka talragi.

¹⁵ Ai latalragilragi, mia numi ki acilai drakerale ka kaika asudralrwalrwane, sana kawlainga cengelrau kai udaudale madrekare.

¹⁶ Kai drakerale ngwalai ku tapasabwane si kathalrimu, Kai celrepe ki pasabu;

¹⁷ lu kaculunga, maulrau ku pasabu, la kadrekare ku acilai vaalru.

¹⁸ Ku sakaredele ka taraputiatiame ngwalai ku tasilapane ki tacebeane ki acilai si masakawlrawlrau; kwi lalasu yakai ubulane amama, si pacai.

¹⁹ Ku sakaredele ka taraputiatiame ki swa Seba wasilape; ku badhabadha ka swa Tima masiasirare drele.

²⁰ Ku nai pia kwini iyaiya lini maulrau; kwi lalasu kiadringai ku meameale ka vaalru sikakathane.

²¹ Papia nakwane, mia numi kikaai ki vaalru; sa drelenga numi kai tangimianeli arwa mukuludru numi si mubere

²² Papianga naku kwigane numiane malra ku sapangibilriane, si ngwalai numi nakwane baai ku pavangalre ku lamanemane?

²³ Si la kitubi ku akipalribulane kidaili ki alrima ki magarange ka badha, ku sabalrithane ku akidailaneli ki ngikarakacanane ki mangikararakacane?

²⁴ Makakelretenga, bulrwaili, lri isaselebanaku kilalalra; la nau thingale ku tapamamaneli.

²⁵ Ku madringelrese ku vaga masalru ku umawmase; ai kwi tasuswane numi kai mamwamwa ki kakudhane.

²⁶ Lu kidremedreme numi kwi taiyaneli kadrwa ku pacugane patuelre; lu mia kwini, asi tubalre kikai la asulriane ka vaga?

²⁷ La kirimu numi pakiau, ku amalrane ki lapakulrulrulu tuduri, si kidremedreme ku akilangadhane ki katalragiane pakai ku akaesadhane.

²⁸ Kunumi drelaili, kainaku lri icucubungu numiane kadraedrangelre.

²⁹ Kunumi ala pudriadringadha kidremedreme, madha piapia kikai kai aparamaramau; pelaana kidremedreme, asi lwiyane mapapedrengaku kadringelrese kadrwa ku tavuvulrucane.

³⁰ Ai, lu kidremedreme numi miaku ki watavuvuvulrucu, miaku kau kai wathingale drele ku pacengecenge si pasalriu.