Yubu 5 - Ngudradreadrekadhane Ka Sisiu 魯凱語聖經

¹ Yubu, karaleala, la dredrele lulri ka aneane ku twabalre; lri dulrusu papia ki aneanenga ka sasiakawlu belenge kitubi ku akiparalubane?

² Kai lisiane papacai ki kadrwa ku thingalane ka umawmase; Kai pathalrane papacai ki palavavalakane ka umawmase.

³ Nawadrelenga naku ki kadrwa ku thingalane ka umawmase miakau swateelrai, ai ku amatikurwane pangiatutuluku mulebe mwa ki daane lini;

⁴ ku lalalake lini kadrwa ku lri sutelrai lrika aiyane madu, ikai ki tasaibaibangane kadrwa ku umawmase ku lri atalingikaiyane liniane kawriva.

⁵ Ku taleke ki makulrungu ka laumawmase kiakane patuelre ki masilrau ka laumawmase, adravane kudra wacebecebe ikai ki cecenekane ka angatu mialri kane demedeme, ku tacekecekelaneini kia eleme ki masilrau ka laumawmase.

⁶ Ku ngilisianane kai lri twalai ki dae cebe; ku akwalriane lai kai lri twalai adringi ki dae ngibwale.

⁷ Kai umawmase sana kitulalake ngiadadawlu ku amatikurwane, mia ki kelrabe ka apwi mubelenge.

⁸ Ngukai nakwane, lri kipasilapaku ki Twaumase, si pelaela kai mendaili.

⁹ Kadrwa ku apatwaladhaneta pulringalringau ku piaini ku maadrau ka takaungane; ku matisamaliane ku tapianeini kadrwa ku talikaiyane.

¹⁰ Paudale pikai ki kadaengane; la pwacilai ki umawma.

¹¹ Unu, ku Twaumase wamalra pubelenge ki kaika sapatumatumane ka umawmase, la patarumara ku akiragadhane ki kwalrialri ku kidremedreme ka umawmase.

¹² Kwi lasu mabebetethe ku nau pia kwini iyaiya ki matavuvulrucu, la kai maka ngimia ku pia lini patuelre.

¹³ Ki lamalrigili pamwalrubangane ikai ki tavuvulrucane lini, ku madrekadrekadrekase lini la kawlrau patuelre.

¹⁴ Kwi lalasu lukavaiyane kiapadradresenge ki dradrimitane, la sakerakerape luka mwalringedele, mia ki yakaai ki maungu.

¹⁵ Ku Twaumase palribulu ki matiakukuru ka umawmase kidaili ki apacadhane; palribulu ki maurawrame ka umawmase kidaili ki akidredrepetane.

¹⁶ Wabaai ku sasiadradrama ki matiakukuru ka umawmase, la pakametemete nguvaganenga ki manganga ka umawmase.

¹⁷ Ku kiabulru ki Twaumase ku umawmase yakai ku akaesadhane; ku kaelaela ki wadulru sanaka manemane ka Twaumase kaika asidreadreadrekasane.

¹⁸ Ku Twaumase wacabu kudra pakadulaini muswane; lu dula muswane ku alrimaini, lri mialri sulrau muswane.

¹⁹ Tamukalavaane ku apalribulane muswane; lri apapelaela palribulu muswane pakidaili ki sapapacai.

²⁰ Luka kalasilravane, lri lapu muswane; lu makarururuburu, lai lri palribulu muswane pakidaili ki lrabu.

²¹ Lri kai pakikabebetethe muswane, lai kai pakipadradresenge muswane ku akiamudane.

²² Ikai ki kalasilravane, kalrithavuthavulu ku cekele, lri mulrakalrakaisu; lai lri kaisu mukuludru ku akipakadulane ki waudriwdripi.

²³ Ku takauawnganesu kadrwa ku la arululane; ku waudriwdripi ubulane lai lri kai dula muswane.

²⁴ Lukamani kwidra, lri suteelraisu ikai adringi ki balrawbau; lu dadavacesu drele ki lakiusu, ku lakiu malaakebe patuelre.

²⁵ Ku lagaganesu takaalra turamuru, mia ki ububulane ka la masalese ka ubulu.

²⁶ Lri kalraagi kwi niakesu ala lri mwadringisu ki tadralredralrekane, mia ki mugi ka mabeanga si ukalavalava ku akitalekane.

²⁷ Yubu, kikai yai amani ku drele nai ka patengane ka sabulrwane; pakai ku amuesadhanesu, nai tarumarasu.