Yubu 42 - Ngudradreadrekadhane Ka Sisiu 魯凱語聖經

¹ Ku Yubu la tubalre ki Tamatama. Kwi lasu amia kai:

² Wathingalaku wadulrusu sanaka manemane; lri dulrusu pangimia patuelre ku nikikakane.

³ Kiavagasu, ai kwaku ka kadrwa ku thingalane lri tumanaku dulru kalrilriki ki lrigilanesu; Kikai kawarivarivaku ku kai naka thingaleli, matiasamali turamuru kilakikai, ka kaika adulrwane pulringalringau.

⁴ Pakiacacaligirisu nakwane kilalra iya kwi vagasu, si tubalre ku putaluvaivaisu ku mendai.

⁵ Ku siaswalane kialalraku ki palrapalra lu mapelaelaela matikai muswane; ai kaiasasane patakamacamacanga naku drele muswane.

⁶ Lakamani, ku taiyanengali ku vaga kiarubwanaku ngulringavane, si nene ikai ki thuvugu ka dae si abu ki angatu ngitatasiwlriwlriwlri.

Satwalrepenge

⁷ Ku Tamatama sa iyanga ki Yubu kilakikai vaga, la iya kai ki Ilripaze: “Kainaku ngwalwadhane muswane si tadrusa ka talragisu, asi lwiyane kwini mapelaelaela numi patharukai nakwane kai numi ka paramia ki sasiakawluli ka Yubu pacengecenge ku taavavagane.

⁸ Kaiasasane, lri malra numi ku pitu ku sawvalai ka lwange, pitu ku balase ka kiu, si mwa ki Yubu, la ngipapasikai patarumara ku Lama ka lrisi. Ku Yubu lri pasikai numiane kitubi; lri tarumaraku ku kitubini, si kai singikai ki kulrungane numi pathavungu numiane. Kwini tamaiyaiyaiyane numi nakwane, kaika paramia ki taiyane ki Yubu kapatengatengane.”

⁹ Ku Ilripaze, Biledade, Zupare la singikai ku tapelaelane ki Tamatama pangimia. Ku Tamatama la tarumara ku kitubi ki Yubu.

¹⁰ Ku Yubu sa pasikainga ki tatulru ka talragilragini inulri, ku Tamatama la pasiwlriwlrianenga ku natangimiamianeini, la aru padrima ka ngiraeradhekane ki nasiaswalane.

¹¹ Ku labetakaneini, si nalatalragilragini wakelanga makanaelre lrikape iniane, si taelre ikai ki daaneini kalringulringulu. Kwi lalasu la tukurwane kisapalra iniane, ngwalai ku takipadradresenganeini ku twalai ki Tamatama ku matikurwane patuelre, wakela sasa iniane. La baai iniane makanaelre ku lapaisu si vaeva ka kalathe ka kingi.

¹² Saka tarudrawdrangenga ku Yubu, ku Tamatama patarwamara baai iniane ku akaesadhane, ku tarumaraini makakalra ki siaswalane. Ku Yubu yakai ku 14,000 ku kiu, 6,000 ku lrakeda, 2,000 ku lwange, 1,000 ku ruba.

¹³ Ta pitu ku lalalakeini ku sawvalai, tatulru ku lalalakeini ku ababai.

¹⁴ Ku takatakanga ku ababai pasia Yemima, ku mwasakadrusa sia Kezia, ku mwasakatulru sia Kerenge Hapuke.

¹⁵ Kai kawmasane kadrwa ku drumane ku ababai ku ngiamia ki lalalake ki Yubu ku tathaitharirane. Kwi tama lini pakiasupisupilringa liniane matakataka kwi tacekecekelane ki tama lini.

¹⁶ Twalai kai, ku Yubu panianiakeana tara 140 ka caili, la dreleana ki lagaganeini pakela ki pungapungai.

¹⁷ Laka miyaiya kikai, ku Yubu maulai panianiake si ngulwadhane ala pacai.