Yubu 41 - Ngudradreadrekadhane Ka Sisiu 魯凱語聖經

¹ Lri dulrusu arakai ku cimera ki kange si pulrakwilane ki maelaelane ka waudriwdripi ikai laveke, si arakaisu ku calrisi kerenge ki lridameini?

² Lri dulrusu arakai ku calrisi ciu ki ngungwaneini, si arakaisu ku sakakaili kaili ki cimini?

³ Lri kitubi muswane mukerengaili iya, si papia muswane kitutubi?

⁴ Lri dulru makaketekete muswane, si palraingi palralrawthu kauawngu pasikai muswane?

⁵ Lri dulrusu alra iniane tuadhadhame si sivavavange? Lri dulrusu kerenge iniane, si baai ki vavalakeana ka lalakesu ka ababai pakivavange?

⁶ Ku lataratukakange lri dulru tulawbubulu iniane si mapapelaela ku nidange? Ku tarasiwbawbai lri dulru babutulu iniane si kilangai?

⁷ Lri dulrusu arakai ku satukakangane ku idiri si culrulu palregese ki lrangicini, arakai ku saculruculrulane ki kange si culrulu ki awlruini?

⁸ Sana arakaisu ku alrima ecenge iniane kingivaale kaisu lri apipelanga talabingi iniane; kaisu lri karimurimuru ku takwalrianesu si tapakakucingalrane sa kiecebesu iniane!

⁹ Ku wadrelenga ki maelaelane ka waudriwdripi ikai laveke ku umawmase ngiatuluku turamuru; kadrwa ku kai mwakuludru si kai tubakebake.

¹⁰ Sana kiriciu, matiamukukuludru turamuru; kadrwa ku umawmase ku walreme acegecege ikai cucubungu iniane.

¹¹ Aneane ku wadulru kiecebe iniane si kasulivaliivateana? Kai kawmasane kadrwa ku umawmase ku maka paiya kwini!

¹² Ala nau pelaela muswane ku kinawmasane ki ngwakai ki maelaelane ka waudriwdripi ikai laveke, palalrwai ku takangimiyaiyaneini kadrau si sapukwane turamuru.

¹³ Aneane ku lri dulru mwalra ku sapakabelenganeini ku laimai, si culrulu palregese ki adreme ka laimaini?

¹⁴ Aneane ku lri dulru paipai ki cimini, velevele kwini matiamukuludru ka valisini?

¹⁵ Kwi drelrekeini arakai patilibi ku karalabe, pakakecenge alra apaelrelre, mia ki lrenege ku kawlukulane.

¹⁶ Ku vaeva ka karalabe kiaraisi ki vaeva, adravane ka saseverane kai maka mwadringi.

¹⁷ Madakidakipi, kadrwa ku namanemanenga ku lri dulru alra apauvagai liniane.

¹⁸ Lu basenge mwataluvaivai ku ledra; ku macaini mia ki talrawane lu lrawlrau ku vai ku ledrane.

¹⁹ Twalai ki ngudwini ngiabwale ku kelrabe, la ngibwale ngipalai ku apwi.

²⁰ La ngukai ki ngungwaneini ngibwale ku ebelre, mia ki laubulu kitwapui si tubebelre ikai tailebe ki palungu.

²¹ Lu ipi kwadalai ku apwi; twalai ki ngudwini ngibwale kelrabe.

²² Ku lreini makawlukulu sapukwane; sanaka kiapadradresenge iniane makiucu makanaelre.

²³ Ku lrangicini kadrwa ku taturamurane, mia ki kabane ku kawlukulane.

²⁴ Ku kidremedremeini mia ki lrenege ku kawlukulane, mia ki tapasilribulribuane ka lrenege ku kecengane.

²⁵ Sana ngidrakale, adravane ka garagarange mialri mukuludru, kai thingalenga ku apiane.

²⁶ Ku dramu kai lri dulru dula iniane; ku idiri, ku lraili mialri kai dulru dula iniane.

²⁷ Parwa rudawdame ka ubulu ki adreme, la parwa macumu ka angatu ki lriwlu.

²⁸ Ku bu si lraili kai wadulru pakatwase iniane; lu drele ki nanuku ka lrenege mia ki mababurau ka sangukitalekane.

²⁹ Lu drele, ku salrumalrumai ka angatu kadrwa ku tamakakaelane ki cebe ki taleke; mwalralrakai lu thilithilibi ku yalrinagi.

³⁰ Ku barangeini mia ki picipici ka kavara ku rangisane; la ngimiyaiya ki kakara, alra balre ki kadaengane.

³¹ Wadridriu ki laveke, mia ki ngiaburaburai ka acilai, la mia ki yapalungane ka abera ngiburaburai.

³² Ku tangukakaiyaneini lawlangwi waledra tukadalranane ku lrapucu; ku laveke alrawlrapungu tulrapucu.

³³ Kai ki kadaengane kadrwa ku drumane ku waudriwdripi ku lri kiramau iniane; kadrwa ku mukuludrane ka waudriwdripi.

³⁴ Adravane ka ngikalrilriigunga ka waudriwdripi kai twamanemane; amani ku talialalai ki sanaka waudriwdripi.