Yubu 40 - Ngudradreadrekadhane Ka Sisiu 魯凱語聖經

¹ Ku Tamatama pacungulu iya kai ki Yubu:

² Yubu, papiasu ki wadulru sanaka manemane ka Twaumase kiecebe kawriva; la kawrivasu madradrikisi ki Twaumase, tubalrea kaiasasane.

³ Ku Yubu la tubalre ki Tamatama:

⁴ Amiaku kwi kadrwa ku thingalane ka vaga, manemaneana ku aiyaneli? Kainaku wathurunga pela kawriva.

⁵ Amianga naku; kainaku lri pelanga kawriva.

⁶ Samia kwini, ku Tamatama la twalai ki alrilrawgu papia ki Yubu kawriva:

⁷ Acegecega, ngialrava kwidra ki tangea ka magarange ka umawmase; lri tubalresu kai akivaganeli muswane.

⁸ Kiasanu padredrelesu ku kaika taparamaramavaneli; maelaelasu nakwane kai pacengecenge iya si ngitatu pacengecengesu?

⁹ Miyaiyasu nakwane sapukwane? Lri dulrusu mia nakwane adradrereedrere ku lingau?

¹⁰ Alaiyasi lri dulrusu, arakaiya ku kimusakenane si kimukuludrane ngiragelane, arakaiya ku kimusakenane ka lrigu tulaimai.

¹¹ Drela ki langiapaparamuru ngikalrilrigu ka laumawmase; papia liniane kalisi, si tutikiane liniane.

¹² Drela ki langiakadiadiadirace ka laumawmase, malra bilibili pulebe liniane; pamalebea ki manganganga ka umawmase.

¹³ Pwa dralreke liniane makanaelre; kerenga liniane pikai swadriadringi.

¹⁴ Lu ngimia kwini, lri drengedrengeraku muswane, si thingale muswane ala ka ngiapapasikaisu akaci ki takikaruburane.

¹⁵ Drela kwidra madradrau ka hema; wabekacaku iniane, la bekacaku muswane. Mia ki lwange kanekane ku ubulu,

¹⁶ ai ka puku ki kinawmasaneini madrau turamuru! Swaeteane ka uvace si beateini!

¹⁷ Ku tawthuini mia ki cedare ka angatu acegecege; ngiaesadhane turamuru ka uvace beate ki vagisini!

¹⁸ Ku culraleini mia ki lriwlu ka tikange; ku drapaleini mia ki adreme ka ukudru.

¹⁹ Ikai ki bekaceli sanaka waudriwdripi matisamaimaalinga; kathane ku wabekace iniane kalri dulru pamaki iniane.

²⁰ Ikai ki taikaiyane ki waudriwdripi lregelrege angatungatu, pasiakai iniane cebe ku akaneaneini ku laubulu.

²¹ Wapece ikai ki cecenekane ka angatungatu, si kilepenge ikai ki mawtiririvu ka beneke.

²² Ku yababiabila ki vaalru ku layanagi ngiathalringulu iniane; ku cecenekane ka angatungatu paidringi iniane.

²³ Lu lrialriau ku vaalru kai mathathibuthiburu; lu kadrau ku kadravane Yuredange kadravane si darurunga ki ngudwi, mialri kai mukuludru.

²⁴ Aneane kulri dulru tamenge ki macaini si pwalra iniane? Aneane kulri dulru arakai ku sakakaili kaili ki ngungwaneini?