Yubu 4 - Ngudradreadrekadhane Ka Sisiu 魯凱語聖經

Aswalalanga ku tamatubaebalreane (4.1–14.22)

¹ Takawrivane ki Ilripaze ka swa Temange,

² Yubu, lu avavagaku, lri kawpungusu? Kainaku wabeserenga kawlai ka taicelreebane.

³ Nawabulrungasu ki takalra ka laumawmase, la sapukwane ku twaramuru ku alrima.

⁴ Ku vagasu pasapukwane ki kiasanu tubakebakebakenga ka umawmase, la sapukwane ku twaramuru ku paculru.

⁵ Kaikameanenga ku amatikurwane mwa lebenga makakai muswane, la ngibalrelringasu kamani ka kadrwa ku garangane siamece.

⁶ Ku takisuswanesu kai maka wabaai muswane ku salrwane? Kudra kadrwa ku atakaiyane kaelaela ku tapanianiakanesu kai wabaai muswane ku sidramane?

⁷ Kidremedreema, aneane ku kadrwa ku pasalrivane si la pacai? Aneane ku madringelrese ka umawmase la kipadradresenge ku amatikurwane?

⁸ Wadrelaku ku twa umawma si lredreke ku ngialisiane la sabulu ku yakai ku padavake ku sapaivai ku umawmase, kwi lalasu kia taaleke makanaelre ku ngialisiane.

⁹ Ku tamanianiakane ki Twaumase wamudu liniane; ku lisianeini papacai liniane.

¹⁰ Ku manganga ka umawmase mia ki raiyungu girigiringi, mia ki garagarange ka raiyungu alealeale; ai ku Twaumase wapangepange ngetele ku valisi ki lavavalake ka raiyungu, si ruthuku liniane.

¹¹ Ku pasuludrunga ka raiyungu kai maka pwalra ku akaneane la pacai; ku lavavalake ka raiyungu la katwasenga sarau makanaelre.

¹² Yakai saka nikingivalane la kilalraku ku wakela ku vaga, akwatiiki ka lingau, makuciingalre thingale;

¹³ sa apecaku sakaererereke, mia ki lu adrepedrepane madu upungu nakwane.

¹⁴ Mwakuludraku manugiligili; manwagiliigili kai kinawmasaneli palraelre.

¹⁵ Ku saseverane makakai ki lringawli, la ciriki kai ubale si isiuli.

¹⁶ Wadrelaku cucubungu yakai ku mia ki manemane ka alalingu, ai kainaku maka wathingale luka manemane. Kikai kwidra la kilalraku ku twalai ki babitingane ku lingau ku amia kai:

¹⁷ Ikai cucubungu ki Twaumase, aneane kulri sudalepe kitu madringelrese ka umawmase? Ikai cucubungu ki wabekace ka Twaumase, aneane ku mabula?

¹⁸ Ku Twaumase kai maka swadralru ki lasasiakawlu belenge; peaelaela ku tapamamane ki lasasiakawlu.

¹⁹ Lri maka sudralru ki niara daeane bekace ka lapanianianiake, kudra karwalai yakai ki dae, ka mararaamau ki lubalubai ka kiadrepete kaburau ka umawmase?

²⁰ Kai umawmase luka mialrealre panianianiake, luka miauawbu la pacai; kwi lasu lri palralrawthunga kamudu, lai lri kakadrwa ku umawmase ku wathethengete iniane!

²¹ Ku calrisi ki balrawbawini mangetele; kwi lasu sa pacai, sakamiya kakulrungu ka kadrwa ku thingale.