Yubu 39 - Ngudradreadrekadhane Ka Sisiu 魯凱語聖經

¹ Wathingalesu ki kisisi lu kitulalake lwigane? Wadrelengasu ki tina ka salawngane lu pangitumane tulalake?

² Tarathainu lu kikatawbaliri? Lri tulalake lukaigane wathingalesu?

³ Wathingalesu lulri kaigane ku akucucane, si lrabuthu tulalake?

⁴ Kwi lalalake lini yakai ubulane aru kadradrau, la katwasenga lrakuthukuthulu, si kai siwlringa kela.

⁵ Aneane ku pakatwase ki yaubulane ka ruba? Aneane ku mwakerenge ku sakerengane ka calrisi liniane?

⁶ Wabaadhaku ubulane tutaikaikaiyane lini, la ikaikai ki titimwane ka kadaengane.

⁷ Wadaili ki rariavane ki lacekele, si kai kipakatwatwase ki umawmase.

⁸ Kai ubulane lregelrege yai talapulapwane liniane; yakai kwini kidringai ku masalese ka laakaneane.

⁹ Ku yaubulane ka lwange lri ubangalre pasikai muswane kaungu? Lri ubangalre ikai thili ki takanekaneane ka varukuru sulasulai?

¹⁰ Lri dulrusu arakai ku calrisi bilibili iniane si pavilringi? Ikai ki umawma pabilibili ku kakara?

¹¹ Lri dulrusu satalu ki pukuini, si baai iniane ku matelrege ka awngane?

¹² Lri maka sudralrusu iniane si baai pailuku ku nikitalekane pubalriu, la pasikai muswane sarubu ku yakai tavelavelatane ka lataleke?

¹³ Ngiapakepake ku sapakepake ki tuniau, ai kai lri dulru ngimia ki lrawlrapungu ka kwange ngipapalai.

¹⁴ Ku tuniau yakai daedae tubatuku, ku batuku la kipakaculu ki kadaengane.

¹⁵ Kai wathingale lu lri kidredre si kacwake, lu lri kidredre ki waudriwdripi si kacwake.

¹⁶ Lu marasikai ki lakiakiau miakau kaika tulalakeini, la kai kakalithi kudra kwalrini lulri avutha lutumane.

¹⁷ Asi lwiyane pakakulrungaku iniane, kainaku patarwamara baai iniane ku apulringalringavane.

¹⁸ Ai sana katwase lrabwale, lri mulralrakai ki maridare ka rigi si latarangurigirigi ka kwapingi.

¹⁹ Yubu, amanisu ka pangiaesadhane ki rigi? Kudra ngiavigivigi ku ubale ki lreini amanisu ka wabaai?

²⁰ Amanisu ka paitituku liniane mia ki apapawku, lu kawkau la matimukukuludru?

²¹ Kiarararagai ikai lregelrege valrwalru si ngisaisaisalriti ikai cakena; matisawsalru lu lrakuthukuthulu mwa ki tamakakaruburane.

²² Kai wathingale ngituluku si mukuludru; ku dramu kai lri maka pasiwlri liniane.

²³ Ku tarangurigi lu ngirarukudru ku sakikaruburane wakilrikilringi siasiange; lu vaivai walikalikathe ku laidiri si yalrinagi.

²⁴ Ku tarakikaruburu ka larigi ngiavetevete, lrakuthukuthulu papia cucubungu; sana ngirapa, kai maka yadrengerenga.

²⁵ Sana kilalra ku ngiarapa, twangawngau karariau; wadulru ikai adaaili sabalri ku saseverane ki makakaruburuburu, la dulru kilalra ku takaralealane avavaga ki mabelenge ki kwapingi.

²⁶ Ku takanga ngiapalai papia tali lrawdru; kikai yai amanisu ka wabulru iniane?

²⁷ Ku segese yakai ki tukadrane tulisisuku; kikai yai pangwakai ku tadrekasanesu si piya?

²⁸ Yasadra ikai lregelrege ki tukadrane, siakepale ki tukadrane ka alrisapesape.

²⁹ La sakai kwini si paswalebe drele ki adaili si ngwadadethe, wasilasilape ku adaisane pwalra si papacai ku akaneane.

³⁰ Sanaka taikaiyane ku kinawmasane ki wapacai yaelrelre ikai kwini ku latakanga, ku lalrulai ki takanga la mialri kela therepe ku erai.