Yubu 38 - Ngudradreadrekadhane Ka Sisiu 魯凱語聖經

Ku Tamatama twabalre ki Yubu

¹ Ku Tamatama la twalai ki alrilrawgu papia ki Yubu kawriva.

² Aneanesu, ka kawarivariva ku kadrwa ku thingale ka vaga, si kalrilrilriki ki lrigilaneli?

³ Lri ngidrakalesu, mia ki magagarange ka umawmase; lri tubalresu kwi kivagali muswane.

⁴ Sa bekacaku kawmasane yai yainusu? Alaiyasi kakalra ku thingalesu, pwa kawriva.

⁵ Wathingalesu luka aneane ku wakelrete ku takathaneini? Aneane ku yabelenge iniane erece ku lekete ka calrisi?

⁶ Ku ulrudru ki kadaengane wacegecege pikai belenge ki manemane? Aneane ku pasiakai kawmasane sarare pasutelrai ku karwalai ka lrenege?

⁷ Kwini ki vai, ku latariau ki malialiare masiasilange senai; ka belenge ku lalalake ki Twaumase mialri kiraragai makanaelre.

⁸ Kai laveke sa twalai ki barange ki kadaengane tiputhare, aneane ku waelebe ki lrawlrawdru, si paidrengere iniane?

⁹ Amaniaku ka arakai ku kwakulavane ka ememe kabungu ki laveke, si cabu iniane pikai ki makeceege ka kulrulrungu.

¹⁰ Wakelretaku ku pagisane ki laveke, la pikaiyaku ku sadrukudrukurane ki lrawlrawdru.

¹¹ Peaelaelaku iniane: Lri pakeakelasu kikai, madha lribalribate; kusu ka ngiakalrilrigu ka bikabiki lri tara ikaaisu kikai idrengere.

¹² Yubu, ikai ki tapanianianiakanesu ki caili ki dramare, wadrekasengasu pangibwale ki ledra ki vai luka mialrealre?

¹³ Wakawrivangasu ki ledra luka mialrealre paledra ki kadaengane, la malra ki ngialisiane ka umawmase patwalai ki takilepengane si pulatadre pakatwase?

¹⁴ Kai ledra ki vai pakabalrithi ki lalregelrege si lavalrwalru, mia ki nicikipane ka laimai, la mia ki nipuhangeane ikai ki dulrailraki.

¹⁵ Luka vaiyane ku ledra pangiacaeme, ku tanganganga ka umawmase la kai maka pia ku ngialisiane.

¹⁶ Wamwangasu ku taalrukulane adringi ki laveke? Wadadavacengasu ikai ki valrulrange?

¹⁷ Aneane ku peaelaela muswane ku lrawlrawdru ki apacadhane? Wadrelengasu kudra satelengane ki lrawlrawdru swadriadringi?

¹⁸ Wathingalesu kai kawmasane luka thaininu ku adravane? Lu thingalesu, pelaelaili.

¹⁹ Wathingalesu ka twalai inu kai ledra? Ku tatwaladhane ki dradrimitane yakai inu?

²⁰ Lri dulrusu pelaela ku pagisane lini? Lri dulrusu alra liniane satedre pwa ki tatwaladhane lini?

²¹ Masalrwaku lri dulrusu, asi lwiyane madrawnga kwi cailisu; sakibekace kai kawmasane yakaingasu kwini!

²² Mwadaanengasu ki drawsulu ki pasabu, wadrelengasu ku drawsulu ki kananu?

²³ Pwadringadhaku kilakikai, ka arakaiyane lu matikurukurwane si lu makarururuburu ka vai.

²⁴ Wamwangasu ku tangibwalane ki vai, si mwangasu ku tatwaladhane valrigi ka talrawane?

²⁵ Aneane ku pasiakai ki madrau ka udale swalru ku kadalranane ki acilai? Aneane ku pasiakai ki lrikace dreredrere tukadalranane?

²⁶ Aneane ku pawdale pakakai ki takakadrwane ki umawmase, ki ubulane ka kadrwa ku umawmase?

²⁷ Aneane ku pwacilai ki meameale ka kadaengane, kwi kadaengane ala cebe ku laubulu?

²⁸ Yakai ku tama ki udale? Aneane ku twalalake ki lamu?

²⁹ Aneane ku tina ki kulri? Kai pasabu belenge aneane ku twalalake?

³⁰ Aneane ku pakakawlukulu ki acilai mia ki lrenege? Kai belenge ki laveke la akedere apasabu?

³¹ Lri dulrusu aparairaisi si pataelre ki Peleadese ka tariau? Lri dulrusu muerece ku calrisi ki Silrawlrabu ka tariau?

³² Lri dulrusu singikai ki kalamanemanane sangililuku ki makalrakalra ka tariau? Lri dulrusu ililuku ki madrau si tikiane ka sapakataliare ka latariau?

³³ Wathingalesu ku nikelretane ku tangivelevelevelane ki layasubelebelenge? Lri dulrusu kelrete ku tangimiamiane kai kawmasane?

³⁴ Lri dulrusu papia ki kwakulavane ka ememe drekase? Lri dulrusu pawdale releleke?

³⁵ Alaiyasi papiasu ki lrikace drekase, lri mwa cucubungu muswane si “Kawvai nai yakainai kai” iya?

³⁶ Aneane ku peaelaela ki makavawvawngu lri bawbau ku acilai kavai Nile kadravane iya? Aneane ku peaelaela ki sawvalai ka kuka lri udale lwigane iya?

³⁷ Aneane ku malrigili si asipi ki ememe? Aneane ku wadulru gugu ki ememe si pawdale?

³⁸ Aneane ku patwakeakedralre ki dae? Aneane ku pakadadakici apaelrelre ki dae?

^39-40 Ku raiyungu wakucucu ikai ki labarungulu, si lepelepenge ikai ki lalibi; lri dulrusu pasikai ki tina ka raiyungu alupu ku akaneane? Lri dulrusu pakabucuku ki la lrulai ka raiyungu?

⁴¹ Ku latalralreba lu kasilrau si ngipapapalai, ku la lrulai ka talralreba lu papia nakwane kitubi ku akaneane, aneane ku wapakane pakabucuku liniane?