Yubu 36 - Ngudradreadrekadhane Ka Sisiu 魯凱語聖經

¹ Ku Ilrihu la pacungulu kawriva:

² Kiadila kilalalra kai apalalrwadhaneli; lri pasikaiya naku ki Twaumase kawriva.

³ Ku tathingalaneli ngwaswadrau; lri pelaelaku lalrwai ku wabekace ka Tamatamali aparamaramau.

⁴ Kai iyaiyali kawriva tengatengane ka kadrwa ku draedrangelrane; lri drelesu, ikai cucubungu muswane ka yakai ku tangea ka tengatengane ka ngiathingale ka umawmase.

⁵ Kai Twaumase magarange turamuru, ai kai twadrekase ki umawmase; kadrwa ku kaika thingaleini ku manemane.

⁶ Kai palraingi ki pasalriu ka umawmase panianiake; si pasiakai ki matiakukuru ka umawmase putaluvaivai ku dringelresane.

⁷ Palakebe ki madringelrese ka umawmase; pangiamia liniane ki talialalai rathudu, si palralrawthu kimusakene.

⁸ Ai kai umawmase lu kikerenge ki kicikici, si ngukai ki kakwakudhane lini la kipadradresenge ku akwalriane,

⁹ ku Twaumase lri putaluvaivai pelaela ku pasalrivane lini, kwi lalasu lai lri thingale ka ngiatatusanianiyangenga.

¹⁰ Lai lri papasingi kidremedreme liniane tarumara ku sapakipapawlringavane, ku lrika akidailane lini ki ngialisiane ka kadalranane.

¹¹ Kwi lalasu alaiyasi pasalaladha ki Twaumase, la sukubu iniane, lri dulru kasulivalivate ikai kai kawmasane ku vai lini, la kirararagai ngilribate ku caili lini.

¹² Lu kai ngimia kwini, kwi lalasu lrika kadrwa ku thingathingale lini si pacai, si talubalre ki kadravane ka apacadhane mwa swadriadringi.

¹³ Ku kai mwasakene mukuludru ki Twaumase ku umawmase ku lisiane kai lri aseaseasane; kwi lalasu lu kipathavungu, thadaalrane ka kai lri papia ki Twaumase kitubi ku akiparalubane.

¹⁴ Ku niake lini edreekane la pacai, pakaelre ikai ki akiarubwanane ku niake.

¹⁵ Ai ku Twaumase arakai ku akwalriane bulru ki umawmase, arakai ku asulisiane tupathagili padrele ki maca ki umawmase.

¹⁶ Ku Twaumase patwalai ki akwalriane bilibili palribulu muswane pulatadre, ala kamani ku kisupisupilrisu ku sulivatane; ikai belenge ki cukwisu swaete kwi malimeme ka akaneane.

¹⁷ Ai kaiasasane kia pathavungusu ka naika akipangimianesu; kaisu lri maka mubere ku akisaibanganesu ki dringelresane.

¹⁸ Dradrela, madha kilrilrilrigili ki pavangalre; madha kililuku ki akaesadhane ki tacekecekelane mwa ki makawli ka kadalranane.

¹⁹ Ku tacekecekelanesu papia muswane yakai ku paluludane? Ku madrau ka pukusu wadulru paralubu muswane?

²⁰ Madha sidramadrama ku akelane ki maungu; madha sidramadrama ku akelane ku vai ku akamudane ki lakuni.

²¹ Dradrela, madha papiapia si ngukakai ku kadalranane ki mangangace; ku sakwalrialrisu pakiapapawlringau muswane pakidaili iniane.

²² Pulringaava ku puku ki Twaumase ala ka maadrau turamuru; amani kudra madradraunga ka tarabulrubulru.

²³ Aneane ku lri dulru kelrete ku apianeini ku awngane? Aneane ku lri dulru kaelaela ku tapamamaneini?

²⁴ Ku tapiapianeini lri palralrawthu kidrengedrengere; la mialrisu drengedrengera iniane.

²⁵ Sanaka umawmase siavava ku tapiapianeini; lri sadaailita drele sikakathane.

²⁶ Ku Twaumase saniange turamuru, kaita lri dulru thingale lutuumane; kaita lri maka asipi ku cailini ku vaini.

²⁷ Ku Twaumase patwalai lebe therepe ki acilai, si audale alamu.

²⁸ Patwalai ki ememe pawdale pulebe, la pakadapenge ki laumawmase.

²⁹ Aneane ku lri maka thingale ki Twaumase lu patalula ki kwakulavane ka ememe? Aneane ku lri maka thingale iniane lu tumane patwalai ki taikaikaiyaneini pasalraelre belenge ku lrikace si dreredrere?

³⁰ Arakai ku lrikace paledra subelebelenge, la tusakamiya pakadradrimiti adringi ki laveke.

³¹ Paiya kikai lapu ki sanaka umawmase, la patarumara baai liniane ku makaalra ku akaneane.

³² Ara alrima gemegeme ki lrikace, si drekase iniane pakaiya ki dukipi iya.

³³ Kai lrikace si dreredrere sapelaelane ka lri kelanga ku umuku, adravane ka nilapulapwane ka waudriwdripi la thingale mubere kibalai.