Yubu 35 - Ngudradreadrekadhane Ka Sisiu 魯凱語聖經

¹ Ku Ilrihu la iyanga kai:

² Yubu, makeecengesu ka kadrwa ku pasalrivanesu ikai cucubungu ki Twaumase; lu miasu kai, kaika mamamwa ki kakudhane!

³ Kiavagasu ki Twaumase: Kai pasalrivaneli manemane ku capilane muswane? Iya. Alaiyasi kainaku pasalriu manemane ku takatharirane?

⁴ Kaiasasane lri tubalreaku muswane, lai lri tubalreaku ki talragilragisu.

⁵ Paswabelenga drele, la dredrele luka thaininu ku abelengane subelebelenge itaibelenge ki awlrusu.

⁶ Alaiyasi pasalriwsu, kikai manemane ku amulisiane papia ki Twaumase? Adravane sangukalralesu pasalriu, lri dulrusu tulisi iniane?

⁷ Adravane aparamaramausu, papia ki Twaumase manemane ku aparalubane? Kadrwa ku apatwaladhaneini muswane malra ku akaesadhane.

⁸ Ku pasalrivanesu kathane ku thadalrane muswane ka umawmase ku lri kwalri; ku tapianesu ku mathariri lai lri mialri ka kathane kai kawmasane ka umawmase ku lri kaesai.

⁹ Kai umawmase lu kidredrepete watubi; kwi lalasu lu kitusinalrelreme wamwa kidruanga kitubi ku akiparalubane.

¹⁰ Ai kwi lalasu kai wathingale ngibangulu papia ki wabekace ka Tamatama lini, ka amani kudra patarwamara baai liniane ikai kadradridrimitane ku sasiadradrama ka Twaumase.

¹¹ Ku Twaumase patarwamara baai ku lrigilane ki umawmase, ka silrialribate ki langiapalapalai si walrawlrakwane ka waudriwdripi, Kai umawmase la kai thingale ngibangulu papia iniane.

¹² Kwi lalasu kiatubi, ai ku Twaumase kai twabalre, asi lwiyane kwi lalasu ngiakalrilrigu ngilisiane.

¹³ Ku kitubi lini lri avuthane sikakathane kadrwa ku paluludane; ku wadulru sanaka manemane ka Twaumase kai lri kilalra, kai lri marasikai.

¹⁴ Yubu, kainaku maka wadrele ki Twaumase amiasu; kiadila mukalava, ku tangimianesu wadarurunga cucubungu iniane.

¹⁵ Lu kidremedremesu kai lri pathavungu ku Twaumase amiasu; kai lri kithathengete ki pasalrivane amiasu.

¹⁶ Lu kawrivasu iya kikai kadrwa ku paluludane, asi lwiyane athingalanesu ka kai wathingale kwi iyaiyasu.