Yubu 34 - Ngudradreadrekadhane Ka Sisiu 魯凱語聖經

¹ Ku Ilrihu pacungulu iya kai:

² Kunumi ka yakai ku thingalane ka umawmase kilalra kai vagali; kunumi ka yakai ku lrigilane ka umawmase kicacaligira kilalalra nakwane.

³ Kai calringa pathingale kilalra, mia ki lridame lu palalava ki akaneane.

⁴ Lakamani, ku pacengecenge si kai pacengecenge ngiakakamanita ka twaringaringau; ku mathariri si malisi amaningata ka wapilri si kalrithethe.

⁵ Kai Yubu kadrwa ku pasalriwli amia, amani ku Twaumase ka waribici ku naika angipapelaelaneli.

⁶ Kwi lasu kiavaga: Lri tumanaku dulru kadraedrangelre yakai ku pasalrivaneli iya? Kiavuthaku, ai kiatulisiaku turamuru.

⁷ Wadrelenga numi ku miyaiya ki Yubu ku umawmase? Kadrua ku usakenaneini ki Twaumase.

⁸ Kai lasu madalame sitalrailragi ki lamanganga ka umawmase; Kai lasu kiaredededele ki lamanganga ka umawmase.

⁹ Kai lasu amia kai, manemane ku takatharirane ki umawmase lu pasalaladhane ki Twaumase?

¹⁰ Kunumi ka mwalecege ngithingale ka umawmase, kilalra kai aiyaneli: Ku Twaumase paiya ku ngialisiane? Ku wadulru sanaka manemane ka Twaumase lri maka apakaelaela?

¹¹ Singiakaai ku kakwakudhane ki umawmase si bilri, la singikai ku naika akipathavunganeini si pathavungu iniane.

¹² Ku Twaumase kai lri pia ku ngialisiane lutuumane; ku wadulru sanaka manemane ka Twaumase kai lri tapathikele ku pacengecenge si kai pacengecenge.

¹³ Ku Twaumase patwalai ki aneane tarumara ku puku? Aneane ku siakawlu iniane marasikai kai kawmasane?

¹⁴ Ku Twaumase alaiyasi malra sawlri ku niake, alaiyasi malra sawlri ku abake,

¹⁵ sanaka panianianiake ka umawmase lri kamudu makanaelre, kudra lri tara paacai ka umawmase lai lri siwlri adae.

¹⁶ Luka mwalecegesu ngithingale, kilalra kai aiyaneli: Dradrela kilalra kai vagali.

¹⁷ Lri kaelaelasu ki madringelrese ka Twaumase? Lu kidremedremesu mavalracevace ki aparamaramavane amiasu?

¹⁸ Ku Twaumase lri dulru iya kai ki latalialalai: Kusu ka gurucucuki; si lai lri dulru iya kai ki latalialalai: Kusu ka mangangangacenga!

¹⁹ Kwi lasu kai pawakalrivili ki tara rathudu, la Kai tukucingalre ki sapaiswane si tudrekase ki matiakukuru; asi lwiyane kai umawmase bekaceini patuelre.

²⁰ Kai umawmase alau lri pangitutuluku pacai ikai ki maungu. Ku Twaumase walrumai, la amudu liniane; pakaduai amudu ki magarange ka umawmase.

²¹ Kwi lasu wadrele ku kadalranane ki sanaka umawmase; wakadrenge ku tapudrapalane ki umawmase.

²² Adravane ka dradrimitane, ka apacadhane, lri mialri kai maka sekete ki pasalriu ka umawmase.

²³ Kai Twaumase kai lri kelrete ku vai, si dawlu ki umawmase mucucubungu iniane kisaibange.

²⁴ Kai lri dreleana si ala ribici ku taetalane ki yakai ku puku ka tara rathurathudu, si pakamani ki palrapalra ubalrithi liniane.

²⁵ Kwi lasu wadrele pudriadringai ku kakwakudhane lini, yamauawngane balre liniane si amudu.

²⁶ Kwi lasu padredredrele ki laumawmase lrumai liniane, mia lu pathavungu ki pasalriu ka umawmase.

²⁷ Asi lwiyane kwi lalasu kai twapapalra iniane, twadrekase ku drekaseini patuelre.

²⁸ Kwi lalasu wavutha ki matiakukuru ka umawmase papia ki Twaumase kitubi; ku Twaumase kialalranga ku kitubi lini ku akiparalubane.

²⁹ Ku Twaumase alaiyasi iceelrebe, aneane ku lri dulru kaelaela iniane? Alaiyasi ngitatamenge kai drele, aneane ku lri dulru kiparalubu?

³⁰ Kai laumawmase manemane ku apiane, si kalrabuthu ki ngiakarakacane ka kadrwa ku ukuludrane ka tararathurathudu?

³¹ Yubu, ngiapapelaelangasu papia ki Twaumase ku pasalrivanesu, si kai pelanga pasalriu?

³² Yakainga ku takitubianesu ki Twaumase ka manemane ku tapasalrivanesu? Twabalrengasu si palraingi kai kangangaanga?

³³ Luka wabalresu ku tapiane ki Twaumase, lri dulrusu ukalava iniane ku apiane ku kitubisu? Ku lri turingaringau amanisu, kainaku ka amani; pelaela naiane ku kidremedremesu.

³⁴ Sanaka ngiathingale ka umawmase lri palraingi makanaelre; sanaka mwalecege ngithingale ka umawmase lu kilalra kai vagali lri iya kai makanaelre:

³⁵ Ku taiyane ki Yubu yai kadrwa ku thingale; ku vagaini kadrwa ku paluludane.

³⁶ Ala kidremedreema kwi taiyane ki Yubu, lri thingalesu kwi taiyaneini mia ki manganganga ka umawmase.

³⁷ Ku tabaebalreaneini arwa drima ku pasalrivaneini; Kai lasu yakai cucubungu ki mapapangale tusinalreme ki Twaumase.