Yubu 33 - Ngudradreadrekadhane Ka Sisiu 魯凱語聖經

¹ Yubu, kaiasasane kilalalra kai vagali; kicacaligira kilalra kai aiyaneli patuelre.

² Ku nau iya iyaiya ki kidremedremeli lri subwaranaku putaluvaivai patuelre.

³ Kai vagali tengatengane; lu kawrivaku yai patengatengane ka vaga.

⁴ Ku Ri ki Twaumase wabekace nakwane; ku wadulru sanaka manemane ka Twaumase wabaai nakwane ku niake.

⁵ Alaiyasi ikai ku vagasu, tubalreaili; padulrwa ku lri ka satubalreanesu.

⁶ Maramaraamawta ikai cucubungu ki Twaumase; niarakaiyaneta ku dae bekace makanaelre.

⁷ La madha mukulukuludru nakwane; kainaku lri papia muswane dredrepete.

⁸ Kwini iyasu kilakikai vaga, kialalranga naku patuelre.

⁹ Amiasu kai: Kiavuthaku, kadrwa ku manemane ku pamamali; mabulaku, kadrwa ku manemane ku pasalrivaneli.

¹⁰ Ai, Twaumase ka wasiasilape ku atakaiyane si lrumai nakwane, twabadha lu drele nakwane.

¹¹ Arakai ku kicikici kerenge ki drapaleli; walelelepenge sanaka tangivelevelaneli.

¹² Ai Yubu, nau pelaela muswane, pasalriwsu; ku Twaumase sanianiange ki sanaka aneaneanenga.

¹³ Asu kaelaela ki Twaumase, si kai twabalrebalre lu sidrurwane ku umawmase iniane iya?

¹⁴ Ku Twaumase apapelaela kawriva, ai kai umawmase kai kiararakerakete kilalalra ku vagaini.

¹⁵ Lu apece kai umawmase lukamaungu, ku Twaumase yakai ki sipi, yakai ki maburusi kawriva.

¹⁶ Pakialalra ku vagaini liniane, la arakai ku sapakipapawlringavane kukuludru liniane.

¹⁷ Ku Twaumase kawariva, kidaila ki pasalrivane iya ki umawmase, ku kaika angitatwabelengane ngitatwadrau.

¹⁸ Kai walreme drele liniane lu muswadriadringi; lri palribulu liniane kidaili ki apacadhane.

¹⁹ Ku Twaumase arakai ku caemane pawlecege ku tapamamane ki umawmase, arakai ku sapakiangeangane ki kinawmasane bulru iniane.

²⁰ Ku macaeme ku umawmase kadrwa ku apikaneane, adravane ka malimemeemenga ka akaneane malraase si kalrabethale.

²¹ Ku kinawmasaneini marilai, acaculrale.

²² Ku abakeini wadethenga swadriadringi; ku niakeini yababiabilanga ki apacadhane.

²³ Ikai ki tathathatha ka lasasiakawlu ki Twaumase, alau lri ikaai ku tangea ku lri kela paralubu iniane, si pelaela ki umawmase ku naika atarapianeini ku awngane.

²⁴ Ngwalai ki kalithane, ku sasiakawlu belenge amia kai: Mukerenga iniane! Kai lri mwa papia ki valrulrange ka apacadhane; yakai kai sakitawbalrithaneli dulru langai ku angilralrainganeini.

²⁵ Kwi kinawmasaneini lri siwlriwlriane alavavalake; ku taicengecenganeini ku caili lai lri siwlringa kela.

²⁶ Kwi lasu lu inulri, ku Twaumase lri pukawnu; kwi lasu lri kiraragai ku kidremedreme sukubu ki Twaumase; ku Twaumase lri siwlriwlriane makakadalru iniane.

²⁷ Kwi lasu lri putaluvaivai pelaela: Yakai kai pasalrivaneli, wabalreaku ki pacengecenge si kai pacengecenge; ai ku Twaumase kai singiakai ki pasalrivaneli si pathavungu nakwane.

²⁸ Kai patwaverevere nakwane mwa ki valrulrange ka apacadhane; panianianiakeana naku pakela kaikameane.

²⁹ Ku tapiane kai ki Twaumase patuelre, apapelaela pasikai ki umawmase pia kilakikai,

³⁰ pakai ku apalribulane ki umawmase pakidaili ki valrulrange ka apacadhane, si pakisupilri iniane ku ledra ki niake.

³¹ Yubu, kaiasasane, kilalra kai vagali, isaselebana, la nau kawriva.

³² Alaiyasi ikai ku aiyanesu, lri kilalalraku; iya ku nau iya iyasu, padulrunga naku tarumara ka pacengecengesu.

³³ Alaiyasi kaisu kawriva, isaselebaana kilalalra kai vagali; lri bulrwaku muswane kai thingalane.