Yubu 32 - Ngudradreadrekadhane Ka Sisiu 魯凱語聖經

Vaga ki Ilrihu (32.1–37.24)

¹ Ngwalai ku takakeceengane ki Yubu ka kadrwa ku pasalriwini, kikai tatulru yacelrebenga.

² Ai yakai kudra tangeea ku siavavava ka sia Ilrihu (kai Ilrihu yai lalake ki Barakile ka agagane ki Buzi ka Rame ka zuku). Ngwalai ku tangitatu madringelresane ki Yubu si tasukai kalisi ki Twaumase, la kai maka drepetenga ku lisianeini.

³ La mialri, kai lasu papia ki tatulru ka talragi ki Yubu kalisi, lu kidremedreme kudra kai wathingale tubalre ki Yubu, taingeane ka kai palululudu ku kakudhane lu kawriva ku Twaumase amia.

⁴ Asi lwiyane ku Ilrihu vavavaalakenga, samaka kawrivanga ku palrapalra,

⁵ la drele liniane ka tatulru kai maka tubalre ki Yubu, la kalisi.

⁶ Ala kawriva ku Ilrihu: Vavavaalakenga naku, laka takatakataka numi, nakainaku wathuru nau kawriva iya kai kidredredremeli.

⁷ Lu kidremedremaku, nai pakawrivaku ki takatakataka, ku tarudrawdrawdrange la nai bulru pawcungulu ku lrigilane lini.

⁸ Ku patengatengane, kathane ku Ri ki wadulru sanaka manemane ka Twaumase ka wadulru patarumara baai ku lrigilane ki umawmase.

⁹ Sanaka madrawnga ku caili kaika wadulru drima ku lrigilane ki umawmase; ku makalra ku caili la kaika wathiingale pilri ku pacengecenge si kai pacengecenge.

¹⁰ Ngwalai kikai, kiatubiaku numiane kilalra kai aiyaneli; nau pelaela numiane kikai nau kawriva iyaiya ki kidremedremeli.

¹¹ Kwi makawrivarivariva numi kialalralalraku pudriadringai, mukalavalava ku atarumaraneli ku ngiathingale ka vaga.

¹² Kiacacaligiraku kilalalra kwi lavaga numi. La drelaku kwi taamalebeane numi; kadrwa numiane ku maka wadulru pamalebe kwi vaga ki Yubu.

¹³ Anu maka dulru kiadringainga nai ku lrigilane iya? Kathane ku Twaumase ku lri maka dulru pamalebe ki Yubu, ku umawmase kai lri maka dulru.

¹⁴ Ku Yubu papia numiane avavaga, kaika papia nakwane; ai, lutumane kainaku lri ngimia numiane tubalre iniane.

¹⁵ Yubu, kai lalasu kadrwa ku vaga lini kawriva muswane; Kai lalasu kadrwa ku lrika satubalreane muswane.

¹⁶ Kwi lalasu acegecege ikai kwini, si kadrwanga ku vaga ku aiyane lini; kwi lalasu mametemetenga, lri pacuungulwana naku mukalava?

¹⁷ Ini, kaiasasane lri tubalreaku muswane; lri pelaelaku kai kidremedremeli muswane.

¹⁸ Kainaku lri maka mukalavanga, malisi lu kaita putaluvaivai ku vaga ki kidremedreme.

¹⁹ Alaiyasi kainaku silape ku avavaganeli, lri miaku ki bavane ka bava ka swaete ki tabavane ka lrangici si tutatha.

²⁰ Kainaku wabeserenga ku akawrivane; lri tara avavagaku tubalre.

²¹ Kainaku lri pusakai ki aneane kwi tamakawrivarivarivane numi, lai lri kainaku kathaithariri ki aneeanenga.

²² Kainaku wathingale talravai ki umawmase, alaiyasi piaku kwini, ku wabekace nakwane ka Tamatama lri makakaai pathavungu nakwane.