Yubu 31 - Ngudradreadrekadhane Ka Sisiu 魯凱語聖經

¹ Nakiaketeketenga naku, ku kaika arakaiyaneli ku ngialisiane ka kidremedreme drele ki tawvailekete.

² Manemane ku baai ki Twaumase kelrete ku angimianeta? Ku wadulru sanaka manemane ka Twaumase twangitwatumane pangibilri ki kakwakudhane ki umawmase?

³ Kai lri pulebe ku amatikurwane baai ki kai madringelrese ka umawmase? Kai lri pulebe ku asutatwatumane pakakai ki manganganga ka umawmase?

⁴ Kai ka wadrele ku sanaka tapudrapalaneli? Kai ka wathingale ku tapianeli patuelre?

⁵ Lri lremeaku kiketekete, kadruana ku pianali ku malisi; la kainaku tavuvulrucwana ki palrapalra.

⁶ Ku Twaumase ani pikai nakwane belenge ki aparamaramavane ka tintingi; lri thingale nakwane ala ka kadrwa ku pasalriwli.

⁷ Alaiyasi thivalrau ki makalecege ka kadalranane kai drapaleli, la kikalrabelabethe kai kidremedremeli ki ngialisiane, swaeteane ki alrimali ku pasalrivane,

⁸ pakitalekanga ki palrapalra ku pawtalekeli; pakisupisupilranga ki palrapalra ku pawtalekeli.

⁹ Alaiyasi ngilisiane kai kidremedremeli papia ki taelrelre ki pasiagiagisi, si ikai ki lrawlrawdru lini lilili,

¹⁰ ani agaganga kai taelrelreli pasikai ki palrapalra; papecanga iniane pikai ki tapeapecane ki drumane ka sawvalai.

¹¹ Kikai yai maadrau turamuru ka pasalrivane; kikai yai akipathavungane ki papacai ka pasalrivane.

¹² Kikai pasalrivane lri ngimia kudra ki wamudu ka maadrau ka apwi, lama patuelre ku pawtalekeli.

¹³ Lu kai palrailraingi nakwane ku lasasiakawluli, kiacacaliigiraku kilalalra ku takawrivane lini, arakai ku aparamaramavane marasikai liniane.

¹⁴ Anakai ka ngimiyaiya kikai, lri tumanaku dulru cucubungu ki Twaumase? Lu saibange nakwane ku Twaumase, lri dulrwaku kawriva ku manemane?

¹⁵ Kwidra wabekace nakwane ka Twaumase kaika mialri bekace iniane? Ku wabekace mitane kaika thadaalrane ka amani kwini Twaumase?

¹⁶ Pasiaulringa naku ku apakubulane ki matiakukuru ka umawmase? Pakasulringa naku ki lawalibakane?

¹⁷ Nawakanekanengaku kabucuku, si la pakasilrasilrau ki lapakulrulrulu?

¹⁸ Ku tapanianianiakaneli siaraparapalaku liniane; miyaiyaku ki tama lapu liniane tuadrau.

¹⁹ Alaiyasi kipadradresengaku ku ngwalai ku kadrwa ku laimai si pacai ka umawmase, si drelaku ku matiakukuru laka kadrwa ku asilaimadhane,

²⁰ wamalraku ku ubale ki kiuli si tulaimai baai liniane. Kwi lalasu tengatengane kiaseasene nakwane.

²¹ Alaiyasi thingalaku ka lri akaciaku ikai ki tasaibaibangane, la ngwalai kwini si tavuvulrucu ki lapakulrulrulu,

²² ani kangetepe kai alrimali; lani kalruduthu kai tabalanganeli.

²³ Asi lwiyane mwakuludraku ku sapathavungane ki Twaumase, kainaku walreme pia kilakikai!

²⁴ Kadrwana ku tasatalwaneli ki paisu, lai kainaku satalu ki kakingiane lutumane.

²⁵ Kainaku ngwalaiyana ki sapaiswananeli si ngikalrilrigu, la kainaku ngwalaiyana ku takaesadhane si kiraragai.

²⁶ Kainaku ngwalai ku taledrane ki vai si sukubu iniane, la kainaku ngwalai ku takalrapungane ki dramare si sukubu iniane.

²⁷ Kainaku kia lrilrigiliana si drengedrengere liniane, la kainaku pangu uma pathingalane ku usakenane liniane.

²⁸ Kikai miyaiya kai ku kakudhane mararamau ki kai paswadalepe ki Twaumase ka abebeelengenga, ka madrau turamuru ku pasalrivane, ka lri kipathavungu kipapacai.

²⁹ Kadrwana ku takiraragadhaneli lu kwalrialri ku badhali, kadrwa ku kidremedremeli kiraragai lu matikurukuru kwi lalasu.

³⁰ Kainaku ngwalalai ku tapuswaneli liniane papacai la ulrabuku ikai ki pasalrivane.

³¹ Sanaka pasiakaainga nakwane kaungu ku umawmase wathiingale makanaelre, ka tara pasudalrwaku ki kaika thingathingaleli ka umawmase.

³² Wadawlaku ki singibadhabadhane kela ka umawmase mwa ki daaneli, kainaku pasulai liniane pikadalranane ki cekele.

³³ Yakai ku umawmase ku kiasanu subusubu ku la tapasalrivane lini, ai kainaku wasekesekete ku pasalriwli.

³⁴ Kadrwana ku ukuludruli ku kawriariariva ki palrapalra, kainaku ngwalai ku ulralrakai kaelaela ki retesane si kai maka kawriva, la ngiaelebe kai ulatalatadre.

³⁵ Bekace ka kadrwa ku umawmase ku kialalra ku tasidrurwaneli? Lri kiketeketaku, kai vagali tengatengane patuelre; ku wadulru sanaka manemane ka Twaumase ani tubalrenga nakwane. Ku wahukuku nakwane ku umawmase ani pacasenga ku pasalrivaneli, la nau maca drele.

³⁶ Lri kiraraagadhaku elrai pikai ki tabalangane, tupagamucu si sipagamucu.

³⁷ Lri papiaku ki Twaumase pelaela ku tapianeli patuelre, mia ki latalialalai lu mucucubungu iniane.

³⁸ Alaiyasi ribicinga naku ku umawma ki palrapalra, alra patwalai ki alrima ki pikadaenganane ribici,

³⁹ alaiyasi kanenga naku ku twalai kwini ki umawma ku lataleke, la pakasilrasilrau kudra ki wakaungu ku umawmase,

⁴⁰ ku cecenekane ka angatu si laubulu ani cebe suete kwini ki kadaengane, si kai ikainga ku tatititiki ka mugi, si tadradradrau ka mugi. Ku vaga ki Yubu akaelrenga kawriva.