Yubu 30 - Ngudradreadrekadhane Ka Sisiu 魯凱語聖經

¹ Ai kaikameane, ku agiagiagi nakwane mwalralrakai nakwane; ku latama lini amani ku tudreadrekaseli ka laumawmase; pakeelaku ku pakaicilri liniane pakiibu ki wadrangalrungalru ki kiuli ka latawpunguli.

² Kwi lalasu twaramuru ka kadrwa ku puku lini; kwi lalasu papia nakwane kadrwa ku paluludane.

³ Kwi lalasu matiakuru kasilrasilrau, karilai si pakurwane, lukamaungu yakai ubulane lrukulruku ku balace ki ubulu si kanekane ngubaisane.

⁴ Kwi lalasu yakai ububulane akwakucu kudra titimwane ka ubulu si pasuetete pungududhane, adravane ka mapalili ka balace ki angatu wamaalra si tu akaneane kane.

⁵ Makakaraleale makanaelre si saladha liniane, mia ki wasaladhalaadha ki sadre.

⁶ Kwi lalasu kathane ki valrwalru ku taikaikaiyane lini, yakaikai ki barungulu si lilibane.

⁷ Kwi lalasu yakai ubulane mia ki waudriwdripi girigiringi, la ikai adringi ki maububulane madrikidrikidrikisi.

⁸ Kwi lalasu yai amani kudra sakaredele ka kadrwa ku palululudane, kialrumalrumai ki umawmase, kipakatwatwase pulatadre ki cekele.

⁹ Kaiasasanenga, kilakikai umawmase la kainganainga si ulralralrakai nakwane; lu drele kwi lalasu, amaninga naku kudra sawlralrakadhane.

¹⁰ Kwi lalasu mavalracevace nakwane, si ngudadaaili ubebere nakwane; kwi lalasu wacapange papia ki lringawli sungalrai.

¹¹ Ku Twaumase patwaramuru nakwane ka kadrwa ku tamwane kiparalubu, kwi lalasu ngwalwadhane tusinalrelreme nakwane.

¹² Kilakikai kadrwa ku palululudane ka laumawmase kiadresenge nakwane lrumai; ngwaladhaku liniane mubebere; kwi lalasu padulrudulru ku bibilrilinga ku apangitutulukane lrumai nakwane.

¹³ Kwi lalasu waretege ki angukakaiyaneli mubere, savaevanga ku kidremedreme ku amudane nakwane; kadrwa ku umawmase ku watelenge ruthuku liniane.

¹⁴ Kwi lalasu walribatenga ki sapangilalakebaneli, si akucaaeme drepete ki kinawmasaneli.

¹⁵ Ku mukuludrane patwabakebakenga nakwane; ku lriguli twapapalranga ki valrigi ngipalai kawlrau, ku tacekecekelane si kiwsakenane mia ki ebelre ki ememe ngilribate kawlrau.

¹⁶ Kaiasasanenga wadethenga naku ki apacadhane; ai kai akwalriane thadalraneana ka taruthukane nakwane.

¹⁷ Luka maungu wangeange kai ngwacaculrawlrale ki kinawmasaneli, ku angeangane kai yasadrasadra kakace nakwane.

¹⁸ Ku Twaumase walrithethenga ki ilrili, la palricinga ki laimaili.

¹⁹ Patwabakebake nakwane pikai ki dedenge; kadrwanga ku tamakakaelaneli ki dedenge.

²⁰ Twaumase, papiaku muswane kitubi, la kaisu tubalre nakwane; papiaku muswane inulri, la mialrisu kai pulringalringau nakwane.

²¹ Akabalrithinga kwi kidremedremesu nakwane, si pakiangeangeange nakwane; arakaisu kwi sapukwane ka alrima tulilisi nakwane.

²² Pakiapalaisu nakwane ki madrau ka valrigi; wavereveresu nakwane pikai ki madrau ka valrigi.

²³ Wathingalaku muswane ka nau pakeela ki papacai amia nakwane, kalri pamwa nakwane kudra lrika amwane ki lri tara pacai ka umawmase.

²⁴ Asu lrumai kudra ki sulusuludru turamuramuru ka umawmase? Kathanenga ku apapiane muswane kitubi ku akikakalithane.

²⁵ Bekacaku kai tupapalra kudra ki kiapadradresedresenge ku akwalriane ku umawmase si taelre tubitubi? Bekacaku kai pasikai ki matiakukuru ka umawmase kwalri ku kidremedreme?

²⁶ Siadramaku ku amalrane ku akaesadhane la kipadradresengelringaku ku akwalriane kamani; mwakalavaku ki ledra la kipadradresengelringaku ki dradrimitane kamani.

²⁷ Mariladhaku si pakuruane ngwalai ki sakwalrialri ki upungane; ku vaiyane ku maungu yakaiyaku ki akwalriane.

²⁸ Yakaaiyaku ki atubiane masasawlriwlriwlri, kai maka drele ku ledra ki vai; acegecegaku ikai cucubungu ki tayelrelreane ki mapapangale, kitubitubi ku akiparalubane.

²⁹ Miaku ki yaubulane ka tawpungu alealeale; miaku ki tuniau tubitubi karaleale.

³⁰ Kai lrangicili maicelrengenga si ngucacilricilri; Kai culraleli ngwalai ki culwane kuculu.

³¹ Nakialalranga naku ku matikiragai ku senai, kaiasasanenga kathanenga ku maralealeale tubitubi ku kilalrali.