Yubu 3 - Ngudradreadrekadhane Ka Sisiu 魯凱語聖經

Ngiapapusu ku Yubu

¹ Ku Yubu la avavaganga, si puvaga ngipapusu ku takitulalakaneini.

^2-3 Twaumase, kiatubiaku pusua kudra ki takitulalakaneli ka vai; pusua kudra saka tau lri kikatawbaliraku sakamaungu.

⁴ Twaumase, kiatubiaku kudra ki vai kwini pakadradrimita. Si kai ngulringawnga kwini ki vai, si kai paledranga iniane.

⁵ Ani kipalrilri si adradrimitane kwini vai. Ku makeceege ka ememe ani kabungu iniane, la paidringi ki ledra ki vai ku dradrimitane.

⁶ Kwini maungu ani ki supilri, si kai kipasiasipinga kitilibi ki caili.

⁷ Ani amatisepelenga ka kadrwa ku aiyane, ka kadrwa ku kiarararagai ka maungu.

⁸ Kudra laumawmase ku wadulru kawriva ki yakaikai ki laveke ka maelaelane ka waudriwdripi ikai laveke, kudra la taraivigi ani kainganai si pusu kwini ki vai.

⁹ Madha palikalikathe ki latariau; Madha pasidramadrama ki dradrimitane ku akaliarane.

¹⁰ Puswa kudra ki takitulalakaneli ka maungu, asi lwiyane pakia padradresenge nakwane ku maadrau ku amatikurwane.

¹¹ Anau kai pacai ibarangane ki ina? Anau kai nguniakane sakilrabuthaku?

¹² Ani ibibi nakwane ku ina? Ani pathuthu lapu nakwane ku ina?

¹³ Ana paacainga naku sakamani kwidra, kaikameane nai sutelrainga naku isadra,

¹⁴ si taelre apece ki twapela tudaane ki daane ki talialalai ka talialalai, si amani ku warathudu,

¹⁵ taelre apecenga ki paswaete ki daane ku kingi si gingi ka lalake ki talialalai,

¹⁶ la taelre apece ki kialribate, si kaiyana wadrele ki ledra ka yabarangane ka lrulai.

¹⁷ Ikai tadralredralrekane, ku manganga ka umawmase yadrengere ku akangangane, ku kwalrialri ka tara kawaungu ka umawmase aseasane isadra.

¹⁸ Adravane ka pasalriu si kiemenge ku umawmase mialri isaselebane, Kai kilalranga ku kaelaelaela ki taradrangalrungalru;

¹⁹ Kai wasusunga ku maesaesaesai si matiakukuru ka madrau ku tikiane ka umawmase, yakaainga kwini makanaelre, adravane ka duri mialri ngilralrainginga.

²⁰ Ani pacungucungulwana papanianiake ki kwalrialri ka umawmase? Ani padredreeleana ki ledra kudra ki kiangeangeange ku kidremedreme ka umawmase?

²¹ Kwi lalasu adravane nau pacai iya kai maka ngiamia; kwi lalasu nai mwadringi ki balriu kamani, si kai malra ku tacekecekelane.

²² Kwi lalasu lu paacainga, si kidralrekenga, lri ikaai ku patengatengane ku akiragadhane.

²³ Ku Twaumase paidringi ku kadalranane ki angimiane lini, la twalai ki ngiathalringulu ruthuku liniane.

²⁴ Arakaiyaku ku dange pawbalrithi ki akaneane; lu dangaku karalealeale mia ki mwalwaludru ka acilai kai idrengedrengere.

²⁵ Ku la kakiwkiwculi mwataluvaivai patuelre; ku ukulukuludruli wakeelalringa.

²⁶ Kadrwa ku sulivataneli, si kai maka aseasane; Kai kawpupunguli kadrwa ku talikaiyane.