Yubu 29 - Ngudradreadrekadhane Ka Sisiu 魯凱語聖經

Bibilrilinga ku tasidrurwane ki Yubu

¹ Ku Yubu tarwamara si avavaaganga:

² Anatumane la peelana ikai kudra ngialribatenga ku caili ku dramare amiaku, mia kudra sapalakebeana nakwane ku Twaumase kudra vai.

³ Sakamani kwidra, ku tinaki ki Twaumase tapaledraane ibelenge ki awlruli; ku ledraini papalrali ngukakai ki kadradridrimitane.

⁴ Sakamani kwidra, yacengecengeana naku ngiesadhane sapukwane; ku thalradhane ki Twaumase palakebe ki daaneli.

⁵ Ku wadulru sanaka manemane ka Twaumase tapalra nakwane; ku lalalakeli ngiathalringulu nakwane.

⁶ Sanaka tamwaneli yakaai ku mireke si kaidu maka eleleme, adravane ka alrisapesape mialri mwalwaludru ku lawlau ki ulrive.

⁷ Ikai ki cekele sanaka tairuburubwane ki latarudrawdrange, la neneaku ikai ki taputaetalane lini nakwane,

⁸ ku la langukathathabarane sana drele nakwane mwathili; ku latarudrawdrange lu drele nakwane la musaakene acegecege makanaelre;

⁹ ku latalialalai ku tabebelenge yaceelrebe ku vaga lini, si ara alrima tamenge ki ngudwi lini.

¹⁰ Adravane ka latalialalai kai wathuru avavaga, mababiitingi ka kadrwa ku marariariau.

¹¹ Sanaka kialalra nakwane ku laumawmase makitu swabulrubulru nakwane; sanaka wadrele nakwane ku laumawmase makitu matetenge drengedrengere nakwane.

¹² Ku matiakukuru ku umawmase kiatubi ku akiparalubane, la tara kiraagadhaku paralubu; ku pakulrulrulu lu kitubi ku akiparalubane, tara watalaku ku alrimali si paralubu.

¹³ Ku mamwamudu ki sakwalrialri ku umawmase pasiakai nakwane subulrubulru; mialriaku pakiragai sasa ki lawalibakane.

¹⁴ Arakaiyaku ku dringelresane tulaimai si silaimai; ku aparamaramavane yai sapakabelenganeli ka laimai, ka pagamuculi.

¹⁵ Amacaku ki lamukimukici; la adrapalaku ki lamapiapilai.

¹⁶ Atamaku ki matiakukuru; tara pusakaikaiyaku ki kaika thingathingaleli ka umawmase.

¹⁷ Mabebetethaku ku puku ki ngiakarakarakacane, si paralubu kudra ki kia tusinalremelreme liniane ka umawmase.

¹⁸ Lu kidremedremaku miaku ki lri mutukui pacai; Kai cailili lai lri mia ki enai ku kalrane.

¹⁹ Miaku ki balace ki angatu daruru ki babiabila ki acilai, lukamaungu yakai ku lamu alreke ki vasauli.

²⁰ Sanaka umawmase makitwa drengedrengere nakwane; ku pukuli kai wasulusuludru.

²¹ Sanaka umawmase mwakalavalava ku sabulrwaneli, si kirarakete tarumara ku pelaelali.

²² Lu maka kawrivanga naku kadrwanga ku padrima; ku vagali mia ki lamu ka adidi ikai ki kinawmasane lini.

²³ Kwi lalasu mwakalavalava ku sabulrwaneli, mia ki tarakawaungu ka siadramadrama ku udale ki kalarigarigane.

²⁴ Lu kasulrisulri ku kidremedreme, papiaku liniane parangithi; ku sulrapelane lu mulrakadhaku pasapukwane liniane.

²⁵ Atarasangililukaku liniane, si turingaringau drekase ku angukakaiyane lini ku kadalranane; waililukaku liniane, mia ki talialalai lu ililuku ki lakwapingi, kwi lalasu lu kasulrisulri wasasaku liniane.