Yubu 28 - Ngudradreadrekadhane Ka Sisiu 魯凱語聖經

Wasenai drengedrengere ki lrigilane

¹ Kai gingi yakai ku tapatwalaladhane malra; kai kingi la ikai ku tagagane tukingi.

² Kai umawmase patwalai ki dae lruku si malra ku adreme, la patwalai ki lrenege aga ku lriwlu.

³ Kwi lasu padrelane kudra yakai adringi ku dradrimitane; kwi lasu wasilape musadriadringinga ki kadaengane, la patwalai ki dradrimitane lruku ku lrenege.

⁴ Kwi lasu yakai adaaili ki takakadrwane ki umawmase malra ku lrenege; yakai ki kaika tamwamwane ki umawmase ka matisepele kauawngu, yakai ki tadailane ki umawmase adringi ki lrubange ngitakeakeakelrai.

⁵ Kai kadaengane twataleke, ai ikai adringi ki kadaengane wakelrakelrakelrabe ku apwi.

⁶ Adringi ki kadaengane ku lrenege yakai ku salesese ka tinukucingalrane ka lrenege, kai dae kiaibu ku enai ka kingi.

⁷ Kai takanga kai wathingale ku papia adringi ki kadaengane ku kadalranane; ku segese kaiyana ngwakai kwini ngipalai.

⁸ Kadrwana ku tapudrapalane ki garagarange ka waudriwdripi, la kaiyana ngukakai ku raiyungu.

⁹ Kai umawmase walruku ki kakerangane ka alrisapesape, la patwalai ki taikaiyane ki madrau ka lregelrege patalula.

¹⁰ Kwi lasu yakai ki madrau ka lrenege lutu tukadalranane, la kidringai ku makaelaela ku tinukucingalrane ka lrenege.

¹¹ Kwi lasu wadungudungu ku tatwaladhane ki calakebe, la adrelane ku yadringi ku tinukucingalrane ka lamanemane.

¹² Ai, ku lrigilane lri mwinu madu silape? Ku thingalane lri mwinu madu kicawcakwane?

¹³ Ku kadalranane ki thingalane kadrwa ku umawmase ku maka kiadringai; ku kucingalrane ki thingalane kadrwa ku umawmase ku wathingale.

¹⁴ Ku kadrwa ku lebe ka valrulrange amia kai: Ku thingalane kai yakai kai; Kai laveke la iya kai: Kai taelre naiane.

¹⁵ Kai kingi kaidu lri maka langai iniane; adravane ka thainininu ku gingi lai kaidu maka balrithi iniane.

¹⁶ Ku kakingiane kaika apakiramaramavane; ku silu mialri kai lri maka kiramau iniane.

¹⁷ Ku kucingalraneini walribate ki kingi turaamuru; ku kakingiane si walikalikathe ka lrenege mialri kai lri dulru kiramau iniane.

¹⁸ Ku kucingalrane ki thingalane walribate turaamuru ki sanhu si walikalikathe ka lrenege; ku thingalane walribate turaamuru ki wamalra ku duduli ka tinukucingalrane ka lrenege.

¹⁹ Ku mathaithariringa ka bwaburavane ka pisi kai lri maka kiramau iniane; ku kakingiane mialri kai lri maka kiramau iniane.

²⁰ Laka yainu ku tatwaladhane ki thingalane? Ku lrigilane lri mwinu madu kicawcakwane?

²¹ Sanaka panianianiake kai maka wadrele iniane; kai ngiapapapalai ibelenge ka laadhadhame mialri kai maka drele.

²² Adravane ka apacadhane si akamudane kikai drusa mialri ngipapelaela ka kilalra lini sikakathane.

²³ Kathane ku Twaumase ka wathingale kwini ki kadalranane, ka wathingale mwinu silape ki thingalane;

²⁴ asi lwiyane ku macaini wadrele pakela ki talikaiyane ki kadaengane, wadredrele kai lebe si belenge sanaka manemane patuelre.

²⁵ Kai Twaumase lu patarumara baai ku puku ki valrigi, la kelrete ku akathaininwane ki laveke,

²⁶ kelrete ku audalane ki kalamanemanane, la giase ku kadalranane ki lrikace si dreredrere,

²⁷ luka amani kwidra, kwi lasu wadrelenga ki thingalane, la cegecege iniane, si palalavanga ku kucingalraneini.

²⁸ Ku Twaumase papia ki umawmase kawmasane iya kai: Ku mwasakene mukuludru ki Tamatama amani ku thingalane; ku wacilri ki ngilisianane amani ku malrigili.