Yubu 27 - Ngudradreadrekadhane Ka Sisiu 魯凱語聖經

¹ Ku Yubu pacungulu avavaga:

² Lri papiaku ki kai arakai ku aparamaramavane marasikai nakwane ka palralrawthu panianiake ka Twaumase kiketekete, lri papiaku ki patubi ki kidremedremeli ka wadulru sanaka manemane ka Twaumase kiketekete,

³ ai, sana ikaiyana ku niakeli, sana ikaiyana adringi nakwane ku niake ki Twaumase,

⁴ Kai bibianeli lri kai draedrangelre kawriva, kai lridameli lai kai lri tavuvulrucu lutuumane.

⁵ Pacengecengesu kainaku lri iya lutuumane; lri kakecengaku pakeela ki wapacai ka kiavuthaku.

⁶ Ngiathathingalaku ka kadrwa ku tapasalrivane, lri kainaku kalrupi lutumane kai takidremedremaneli; ku tapanianianiakaneli ku vai, lri kakecengaku kabula kai kidremedremeli.

⁷ Ku labadhali ani kipadradresenge ku tangimiane ki manganga ka umawmase; ku kiakaruburu nakwane ku laumawmase si kai madringelrese ka laumawmase ani mararamau kipathavungu.

⁸ Manemane ku sidramane ki kai mwasakene mukuludru ki Twaumase ka umawmase? Ku Twaumase lulri malranga ku niakeini, kwi lasu lai lri tumane?

⁹ Lu kela ku amatikurwane, ku kitubini lri kilalra ku Twaumase?

¹⁰ Kiatubinga kwi lasu kwigane ku patarumara ki wadulru sanaka manemane ka Twaumase ku akiragadhane? Waededenga papia ki Twaumase kitubi?

¹¹ Nau pelaela muswane luka thaininu ku puku ki Twaumase; nau lalrwai pelaela muswane ku takidremedremane ki wadulru sanaka manemane ka Twaumase.

¹² Ai, kaisu ka wadrelenga patakamacamaca patuelre? Asu iyanga kikai pamamama kai mamwamwa ki kakudhane ka vaga?

(Avavaga ku Zupare :)

¹³ Ku kelrete ki Twaumase ku vai ki manganga ka umawmase miyaiya kikai; ku wadulru sanaka manemane ka Twaumase lri pathavungu ki ngiakarakacane ka umawmase.

¹⁴ Kwi lasu alau takaalra ku lalalake, ai lri kipapacai makanaelre ikai ki takikaruburane; ku agaganeini kadruana ku takabucukane lu kane.

¹⁵ Kudra laabalu, lri kimwa ki swalrubu si pacai; adravane ka walibakane lri mialri kai tubi ki wapacai.

¹⁶ Adravane ka kaika asiasipanenga ku gingi ki manganga ka umawmase, la kai paratumatumane silaimai ku kalrane,

¹⁷ lrika madringelresenga ka umawmase kulri silaimai ku laimaini, ku kia vuutha ku umawmase lri kela si arakai kisupilri ku gingini.

¹⁸ Ku tudaane ki manganga ka umawmase mia ki lralravathe ku lrupiane, mia ki palralramathane ki duri ku tatudaanane kaika asudralrwalrwane.

¹⁹ Ku bibilrilinga kwi lasu lu apece maesaesaesai, sapacunu si ngidrakale, kadruanga ku tacekecekelane.

²⁰ Ku akakiwcane lri mia ki telebe pangitutuluku lriau iniane; ku valrigi ka umuku lri ikai ki maungu palai iniane.

²¹ Ku twalai tali talrawane valrigi, ngwakakai ki daaneini si palai iniane.

²² Ku maadrau ka valrigi lri ngukakai iniane, kadrwa ku tukurwanane; kwi lasu lri kisamula ubere, ai kadrwa ku paluludane.

²³ Ku tamatikurwanengaini, kiaragai carecare sanaka umawmase; twalai kidruanga ku mangiangiace ulralrakai iniane.