Yubu 26 - Ngudradreadrekadhane Ka Sisiu 魯凱語聖經

¹ Ku Yubu twabalre:

² Makalra kai paralubusu nakwane ka kadrwa ku dulru tumane ka umawmase! Maadrau ku palribulusu nakwane ka kadrwa ku puku ka umawmase!

³ Kwaku ka miyaiya kaika makulrungu ka umawmase, la baailringasu nakwane kai makalra kai tinukucingalrane ka sabulrwane!

⁴ Ai ala kidremedreema, aneane kulri kilalra kwi bulrusu? Aneane ku wakandu muswane iya kikai miyaiya kaika vaga?

(Avavaga ki Biledade :)

⁵ Ku yakai adringi ki kadaengane ku acilai si yakai adringi ka lapanianianiake makitwa mukuludru; ku abake swadriadringi masamali manugeregere.

⁶ Kai swadriadringi adrelane ikai cucubungu ki Twaumase; Ku taikaiyane ki aidridringane mialri ka kadrwa ku paidringi.

⁷ Ku Twaumase wapaipai ku belenge ki talikai dradha, la kelrai ki kadaengane pikai lepawngane.

⁸ Ku Twaumase wapwa ki makeceege ka ememe ku acilai, kai ememe la kai ngwalai ku telregane ki acilai si kabungathau.

⁹ La paidringi ku lringau ki malritetenga ka dramare, la malra ki ememe si sapa ikai belenge iniane.

¹⁰ La ikai belenge ki laveke giase ku sapagisane, la matatukudhanga kai ledra si dradrimitane.

¹¹ Sana kaelaela ki laulrudru belenge, ngiavelevele manugiligili.

¹² Ku madrau ka pukuini waruthuku ki laveke, ku thiathingalaneini patwabakebakenga ki maelaelane ka waudriwdripi ikai laveke ka Rahabe.

¹³ Waipi pakabula subelebelenge; ku alrimaini papacai ki mwabebere ka maelaelane ka waudriwdripi ikai laveke.

¹⁴ Ai, kikai yai tikiyane ka sapalalavane ka puku ki Twaumase, kilalrata ka akwatiiki ka lingau. Aneane kulri maka dulru paladeke drele ku adravane ku puku ki Twaumase?