Yubu 24 - Ngudradreadrekadhane Ka Sisiu 魯凱語聖經

¹ Ku wadulru sanaka manemane ka Twaumase ani kai kelrete ku asaibangane ku vai? Ani kai padrele ki wathingale iniane ka umawmase lu mulebe ku dringelresane?

² Yakai ku umawmase ku patalwaela ku pagisane, si aru drikisi malra ngwadrau ku kadaengane; kwi lalasu waribici ku lakiu ki palrapalra, si ngikakamani katwase pagwagu.

³ Kwi lalasu waribici ku laruba ki lapakulrulrulu, la malra ku lalwange ki lawalibakane tusadrepetane.

⁴ Kwi lalasu kai pakiasupilri ku naika akisupilrane ki lamatiakukuru ka umawmase, wakukuludru ki matiakukuru ka umawmase, la pasarau pamawbebere liniane.

⁵ Ku matiakukuru ka umawmase mia ki yaubulane ka ruba, ikai ubulane silasilape ku akaneane; kadrwa ku talidrumane ku amwane silape ku akaneane ki lalalake.

⁶ Kwi lalasu yakai ki umawma ki palrapalra kitaletaleke, kai budu ikai ki babudubudu ki tangangangace ka umawmase.

⁷ Kwi lalasu wavilralrakane apece, kadrwa ku laimai ku sangisasubusubane; lukamaungu si kakecelre turamuru, kadrwa ku asicawbane si kaculu.

⁸ Kwi lalasu madapenge ku takudalane ikai lregelrege, kathane ku lilibane ku amwane mulrilriane.

⁹ Kwi tangangangace ka umawmase wavutha ki lapakulrulrulu paaduri, la malra ku lalalake ki matiakukuru arakai mukiame.

¹⁰ Lu katwase ku matiakukuru, kadrwa ku sasubusubane ki kinawmasane ku lalaimai; kwi lalasu masasiabaisane tukudru ku nikitalekane.

¹¹ Kwi lalasu yakai tali daane ki saravadrane ka alradre ki tangangangace ka umawmase pepe ku abera ki ulrive; kwi lalasu wadredredre si pepe tubava ku budu, la kiadiadiadili ki kadhamane.

¹² Ikai ki cekele yakai ku umawmase ku madula si dadange, yakai ku wapacapaacainga ku umawmase si tubitubi, ai ku Twaumase kai twamanemane ku kitubitubi lini.

¹³ Yakai ku laumawmase ku kai tarwamara ki ledra; kwi lalasu la kai thingale ki ledra, mialri kai tupapalra ku taarakane ki ledra.

¹⁴ Lu kaiyana kaliare, ku tarapapacapacai ki umawmase ngiadrakaleenga; kwi lalasu matwase papacai ki matiakukuru ka umawmase, lukamaungu la katwase asadre.

¹⁵ Ku tarapasalrisalriu ki ababai siadrama ku akamaungane; kwi lasu ngiatatamenge ku lringau, ku kaika akidrelane ki palrapalra.

¹⁶ Luka maungu, ku sadre mabebetethe ki lrawlrawdru si mudaane; lukavaiyane, kwi lalasu la kilepenge, kai apia drele ki ledra.

¹⁷ Kwi lalasu makiwcu ki ledra ki vaiyane, kudra matikiwcu ka dradrimitane kwi lalasu makisudawdalru kamani.

(Avavaga ku Zupare :)

¹⁸ Ku tangangangace ka umawmase kialudru ki telebe. Ku kadaengane lini kiapusu ki Twaumase; kwi lalasu kai lri maka mwanga ki babudwane lini kaungu.

¹⁹ Mia ki meameale ka kadaengane, ku culwane ki cengelrau derenaunga ki pasabu, ku swadriadringi wakane lrungulrungu ki pasalrisalriu ka umawmase.

²⁰ Adravane ka tina lini kai maka pwalringawnga liniane; kwi lalasu lri mia ki cucumu ka angatu ki kanekane ki lalubalubai.

²¹ Asi lwiyane kwi lalasu pakiangeange ki lawalibakane, kadrwa ku kurwane ki mapulathe ka ababai.

²² Ku Twaumase arakai ku pukuini amudu ki ngiakararakacane ka umawmase; ku Twaumase sana ngivelevele, ku tangangangace ka umawmase lri paacai.

²³ Ku Twaumase papadawdalrwana pakasulivalivate liniane, ka kadrwa ku kathekethekelre, ai ku macaini talengethane liniane.

²⁴ Kai tangangangace ka umawmase padawdaalru lu ngiradhekane, ai lri padaalru lai lri ngimia ki ubulu si angatu kalraici, mia ki cebe ki taleke kiketabe.

²⁵ Aneane kulri dulru kai ngiamia iya kikai tangimiane? Aneane kulri dulru pelaela kadrwa ku tapatwaladhane iya kai vagali?